བསྟན་འཛིན་འགྲོ་དོན།འཛིན་གྲྭ་དགུ་པ། གུ་རུ་པུ་ར་སཾ་བྷོ་ཊ་ཉིན་སློབ། བོད་ལྗོངས་ནི་ང་ཡི་ཁྱིམ་ཡིན། ངས་མི་ཚེ་གང་བོར་བོད་ཅེས་འབོད་པའི་ཕ་ཡུལ་དེར་སླེབས་པའི་རེ་སྒུག་བྱེད་བཞིན་ཡོད། འོན་ཀྱང་ངས་ཕ་ཡུལ་བོད་མཐོང་མྱོང་མེད། ཡིན་ནའང་ཉིན་ལྟར་བོད་ལ་ལོག་རྒྱུའི་ཆེད་དུ་སློབ་སྦྱོང་ལྷོད་གཡེང་མེད་པར་སྦྱོང་གི་ཡོད། ངས་མཚན་མོ་གནམ་ལ་བལྟས་བའི་ཚེ་འོད་ཆེམ་ཆེམ་སྐར་མ་མང་པོ་ཤར་བ་དང། རླུང་བསིལ་པོ་འཇམ་པོ་ངའི་པགས་ལ་རེག་སྐབས་སེམས་ནང་ལ་བོད་དང། བོད་ཀྱི་གངས་རི་དཀར་པོ། ཁ་བ་གངས་རི་ནས་བཞུར་བའི་ཆུ་བོ། བོད་ཀྱི་རྒྱལ་པོ་ཆེན་པོ་སྲོང་བཙན་སྒམ་པོ་དང་རྒྱལ་བ་ལྔ་པས་བཞེངས་པའི་རྒྱལ་དབང་སྐུ་ཕྲེང་རིམ་བྱོན་གྱི་བཞུགས་ཡུལ་ཕོ་བྲང་པོ་ཏ་ལ། དེ་བཞིན་བོད་ཀྱི་སྒོ་ཕྱུགས་སེམས་ཅན་གཡག།བོད་གངས་ཅན་གྱི་རླུང་བསིལ་པོ་དེ་ཅི་འདྲ་ཞིག་ཡོད་ན་བསམ་གྱི་འདུག། ཕྱི་ལོ་༡༩༥༩ ལོར་བོད་དེ་རྒྱ་གཞུང་གིས་བཙན་བཟུང་བྱས་ནས་བཟུང་བོད་མི་སྟོང་ཕྲག་མང་པོ་༧གོང་ས་སྐྱབས་མགོན་ཆེན་པོ་མཆོག་དང་ལྷན་དུ་བོད་ནས་རྒྱ་གར་དུ་བཙན་བྱོལ་དུ་འབྱོར་བ་རེད། ཁོང་གི་བཀའ་དྲིན་གྱིས་ད་ལྟ་ང་ཚོ་བོད་པ་བཙན་བྱོལ་བ་ཚང་མ་རྒྱ་གར་སོགས་རྒྱལ་ཁབ་གཞན་དུ་ཞི་བདེའི་ངང་འཚོ་བ་རོལ་བཞིན་ཡོད། དུས་དེ་ནས་བཟུང་བོད་མི་མང་པོ་ཞིག་རྒྱ་བལ་འབྲུག་གསུམ་དུ་བོད་ནས་བཙན་བྱོལ་དུ་རྒྱུན་མ་ཆད་པར་འབྱོར་ཡོད། ང་རང་ནི་རྒྱ་གར་དུ་སྐྱེས་པ་རེད། རང་བཙན་ཡོད་པའི་རྒྱལ་ཁབ་གཞན་གྱི་ཡུལ་མི་ཚོ་རང་གི་རྒྱལ་ཁབ་ནང་བདེ་སྐྱིད་ངང་འཚོ་བ་སྐྱེལ་བཞིན་པ་མཐོང་སྐབས་སེམས་སྡུག་ཆེན་པོ་ཡོང་གི་འདུག ང་ཡང་རྒྱལ་ཁབ་གཞན་གྱི་ཡུལ་མི་ཚོ་ནང་བཞིན་རང་བཙན་ཡོད་ན་བསམ་ནས་བོད་ལ་ལོག་རྒྱུ་བྱུང་ན་བསམ་པའི་འདོད་པ་ཆེན་པོ་ཡོད། དེང་སང་བོད་རིགས་རྒན་གྲས་ཚོ་མ་ཟད་བོད་རིགས་གཞོན་ནུ་ཚོ་ཡང་ཕྱི་རྒྱལ་དུ་འགྲོ་རྒྱུ་དང་གནས་རྒྱུར་དམིགས་ནས་མི་ཚེའི་ནང་དཀའ་ལས་ཧ་ཅང་རྒྱག་གི་འདུག དེ་ནི་སྡུག་བསྔལ་གྱི་འཚོ་བ་ཞིག་རེད། གང་ཡིན་ཟེར་ན། ང་ཚོ་བོད་པ་ཚོ་རང་བཙན་མེད་པའི་མི་རིགས་ཤིག་ཡིན་པའི་ཆ་ནས་སོ་སོའི་རང་བཙན་ཆེད་དུ་སེམས་ཤུགས་ནམ་ཡང་མ་ཆག་པར་དཀའ་ལས་དང་འབད་བརྩོན་མུ་མཐུད་ནས་སྔར་ལས་ལྷག་པ་རྒྱག་དགོས། ཉིན་ཞིག་བོད་རང་བཙན་ཐོབ་ནས་ང་ཚོ་ལ་སྐྱིད་པའི་ཉི་མ་ཤར་གྱི་རེད། ང་ཚོ་བོད་པ་བཙན་བྱོལ་བ་ཚང་མ་བོད་ལ་ལོག་རྒྱུའི་བསམ་བློ་མ་བཏང་བར་བོད་རིགས་མང་ཆེ་བ་ཕྱིའི་རྒྱལ་ཁབ་ཏུ་འགྲོ་རྒྱུའི་བསམ་བློ་མང་པོ་བཏང་ནས་ད་ལྟ་ནང་བཞིན་རྒྱུན་མ་ཆད་པར་ཕྱིན་པ་ཡིན་ན། དེའི་རྐྱེན་གྱིས་ང་ཚོ་བོད་ཀྱི་རིན་ཐང་བྲལ་བའི་ཆོས་དང་རིག་གནས། ང་ཚོའི་སྐད་ཡིག ང་ཚོའི་གོམས་གཤིས་བཟང་པོ་སོགས་མྱུར་དུ་མེད་པར་གྱུར་ནས་ག་ལེར་ང་ཚོའི་བོད་ཅེས་པའི་རྒྱལ་ཁབ་དེ་ཡང་མེད་པར་འགྱུར་སྲིད། འོན་ཀྱང་ད་ལྟ་ང་ཚོའི་བླ་མ་༧གོང་ས་སྐྱབས་མགོན་ཆེན་པོ་མཆོག་དང་། རྒྱ་གར་གཞུང་མང་གཉིས་ཀྱི་བཀའ་དྲིན་གྱིས་ང་ཚོར་རྒྱ་གར་ལུང་པའི་ནང་བོད་ཀྱི་སྐད་ཡིག་དང། རིག་གནས་ཚང་མ་སློབ་སྦྱོང་བྱ་རྒྱུའི་གོ་སྐབས་ཡོད། ང་རང་བོད་རིགས་ཤིག་ཡིན་པའི་ངོས་ནས་རང་ཉིད་ཀྱི་རྒྱལ་ཁབ་ཏུ་དྲོ་སྐྱིད་ལྡན་པའི་འཚོ་བ་སྐྱེལ་བའི་གོ་སྐབས་མ་ཐོབ་ཀྱང་། ངས་དེའི་ཆེད་དུ་ཉིན་ལྟར་སློབ་སྦྱོང་ལ་དུས་ཚོད་འཕྲོ་བརླག་ཏུ་མ་བཏང་བར་ཧུར་ཐག་འབད་བརྩོན་བྱེད་ཀྱི་ཡོད། ངས་རང་གི་ཕ་ཡུལ་བོད་ལྗོངས་དྲན་མ་མྱོང་བ་དང། བོད་ནང་དུ་ལྷག་པའི་བོད་རིགས་དེ་ཚོ་ལ་སྨོན་ལམ་འདེབས་མ་མྱོང་བ་ཉིན་གཅིག་ཀྱང་ཕལ་ཆེར་བྱུང་མྱོང་མེད། འོན་ཀྱང་རང་དབང་ལུང་པར་ཡོད་པའི་བོད་མི་དེ་ཚོ་བོད་ཀྱི་སྐད་ཡིག་དང་རིག་གནས་ཆ་ཚང་སྦྱང་རྒྱུའི་གོ་སྐབས་ཡོད་ཀྱང་། བོད་ཀྱི་རིག་གནས་དང་སྐད་ཡིག་ལ་དོ་སྣང་བྱེད་མཁན་ཇེ་ཉུང་དུ་འགྲོ་བཞིན་ཡོད། བོད་སྐད་བརྒྱབ་པའི་སྐབས་སུ་ཕྱེད་ཀ་བོད་སྐད་ཕྱེད་ཀ་སྐད་རིག་གཞན་མཉམ་བསྲེས་བྱས་ནས་བརྒྱག་གི་ཡོད། བོད་སྐད་རྒྱག་མི་ཤེས་མཁན་ཡང་མང་པོ་ཡོད། བོད་ནང་རྒྱ་མིའི་བཙན་འོག་ཏུ་བོད་ཀྱི་རྒྱལ་དར་བསྒྲེང་འཛུགས་བྱེད་མི་ཆོག བོད་ཀྱི་ཆོས་དང་རིག་གཞུང་ལ་བཀག་འགོག་ཡོད། དེ་བཞིན་བོད་ཀྱི་སྐད་ཡིག་རྩ་མེད་བཟོ་རྒྱུའི་ངན་བྱུས་སྣ་ཚོགས་སྤེལ་དང་སྤེལ་བཞིན་ཡོད་ཀྱང་། སོ་སོའི་ཆོས་དང་རིག་གཞུང་། སྐད་ཡིག་ལ་བདག་གཅེས་བྱ་རྒྱུར་དོ་སྣང་ཧ་ཅང་ཆེན་པོ་ཡོད། དེ་ནི་བོད་ནང་ཡོད་པའི་བོད་མི་ཚོའི་རྒྱལ་གཅེས་ལྷག་བསམ་དང་། ཞུམ་པ་མེད་པའི་སྙིང་སྟོབས་ཡོད་པའི་རྐྱེན་གྱིས་རེད། དེ་འདྲ་སོང་ཙང་ང་བོད་ལ་ལོག་ནས་བོད་ལ་ཡོད་པའི་བོད་ཚོ་མཉམ་དུ་མཉམ་ཞུགས་བྱས་ནས་བོད་ཀྱི་ཆོས་དང་རིག་གཞུང་། བོད་ཀྱི་སྐད་ཡིག་སྐྱོབ་འདོད་ཀྱི་འདུན་པ་ཆེན་པོ་ཡོད།