བསྟན་འཛིན་བརྩོན་འགྲུས། འཛིན་གྲྭ་དྲུག་པ། དཔེ་སྟོན་སློབ་གྲྭ། མི་རིགས་ཚང་མར་སྐད་ཡིག་མི་འདྲ་བ་རེ་ཡོད། མི་རིགས་ཚང་མར་རང་རང་གི་སྐད་ཡིག་ཅིག་ངེས་པར་དུ་ཡོད་དགོས། རྒྱུ་མཚན་ནི། སྐད་ཡིག་ནི་མི་རིགས་ཤིག་གི་ངོ་བོ་མཚོན་རྟགས་གཙོ་བོ་ཞིག་དང། མི་རིགས་ཀྱི་བླ་སྲོག་ལྟ་བུ་ཡིན། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་བོད་ཀྱི་སྐད་ཡིག་སྲུང་སྐྱོབ་ཇི་ལྟར་བྱེད་དགོས་པ་ནི། ཐོག་མར་བོད་སྐད་གཙང་མ་བཤད་དགོས་པ་དང་བོད་ཆས་གྱོན་པ། ནང་ཆོས་ལ་སློབ་སྦྱོང་དང་ཉམས་ལེན་བྱེད་དགོས་པ། བོད་ཡིག་ལ་སློབ་ཚན་གཞན་ལས་ལྷག་པ་སྦྱོང་དགོས་པ་བཅས་ཡིན། ང་ཚོ་བོད་ཆོལ་ཁ་གསུམ་གྱི་རྒྱལ་ཁབ་ཆེན་པོ་དེ་རྒྱ་དམར་གྱིས་བཙན་བཟུང་བྱས་པའི་རྐྱེན་གྱིས་བོད་ཀྱི་རིག་གནས་སྤྱི་ལ་གནོད་སྐྱོན་ཆེན་པོ་བྱུང་བ་རེད། དེ་ཡང་རྒྱ་དམར་གཞུང་གི་དམིགས་ཡུལ་གཙོ་བོ་ནི་བོད་ཀྱི་སྐད་ཡིག་དེ་ཉམས་རྒུད་དང་རྩ་གཏོར་གཏོང་རྒྱུ་དེ་ཡིན། གལ་སྲིད་ང་ཚོ་བོད་ཀྱི་སྐད་ཡིག་དང་རིག་གཞུང་ཉམས་པ་ཡིན་ན། མ་འོངས་བོད་ཀྱི་གནས་སྟངས་ལ་འགྱུར་བ་ཆེན་པོ་ཞིག་ཐེབས་སྲིད་པ་དང། ཕ་སྐད་ཉམས་པ་མ་ཟད་མི་རབས་ནས་བརྒྱུད་ཡོང་བའི་རིག་གཞུང་དེ་མེད་པར་གྱུར་བ་མ་ཟད། མི་རིགས་རྩ་མེད་དུ་འགྲོ་རྒྱུ་གཏན་འཁེལ་རེད། ང་ཚོ་བོད་ཀྱི་སྐད་ཡིག་གཞན་དང་མི་འདྲ་བར་ཚིག་ཕྱུག་པ་དང། ཡིག་གཟུགས་ཀྱང་འབྲི་སྟངས་རྣམ་པ་མི་འདྲ་བ་མང་པོ་ཡོད་པས་རྒྱལ་ཁབ་གཞན་གྱི་མི་རྣམས་ཀྱིས་ཀྱང་བོད་ཀྱི་སྐད་ཡིག་ལ་ཧུར་བརྩོན་ཆེན་པོས་སློབ་སྦྱོང་བྱེད་བཞིན་པ་མཐོང་དུས་ང་རང་སྤོབས་སེམས་སྐྱེ་ཡི་འདུག བོད་ཀྱི་སྐད་ཡིག་ནི་ཐོག་མར་དུས་རབས་བདུན་པའི་ནང་ཆོས་རྒྱལ་སྲོང་བཙན་སྒམ་པོའི་སྐུ་རིང་ལ་སློབ་དཔོན་ཐོན་མི་སམ་བྷོ་ཊ་ཁོང་རྒྱ་གར་འཕགས་པའི་ཡུལ་དུ་ཕེབས་ཏེ་སྐུ་ལས་ཚད་མེད་བསྐྱོན་ཏེ་བོད་མི་ཚང་མས་བཤད་ཐུབ་པའི་ཕ་སྐད་གཙང་མ་ཞིག་གསར་གཏོད་གནང་བ་རེད། སྐད་ཡིག་དེ་བོད་མི་རྣམས་ཀྱིས་སྲུང་སྐྱོབ་བྱས་པའི་རྐྱེན་གྱིས་དེང་སང་ང་ཚོས་བཀོལ་སྤྱོད་བྱེད་པའི་སྐད་ཡིག་དེ་ད་བར་གནས་ཐུབ་པ་བྱུང་བ་རེད། ང་ཚོ་བོད་མི་ཚང་མའི་དཔྲལ་བའི་མིག་དང་ཁོག་པའི་སྙིང་ལྟ་བུ་༸གོང་ས་སྐྱབས་མགོན་ཆེན་པོ་མཆོག་གིས་དུས་ནམ་ཞིག་ཡིན་ནའང་ང་ཚོའི་བོད་ཕྲུག་ན་གཞོན་རྣམས་ལ་རང་གི་སྐད་ཡིག་དང་ཆོས་རིག་གཞུང་དེ་དག་ལ་དོ་སྣང་དང་བདག་ཉར་བྱེད་རྒྱུ་དེ་གལ་ཆེན་པོ་ཡིན་པའི་བཀའ་སློབ་ཡང་ཡང་བསྩལ་གནང་གི་ཡོད། གལ་སྲིད་མ་འོངས་པར་བོད་ཕྲུག་རྣམས་བོད་ཡིག་འབྲི་ཀློག་ཡག་པོ་ཤེས་དགོས་ན་ཆུང་དུས་ནས་བོད་སྐད་གཙང་མ་རྒྱག་རྒྱུ་དང་བོད་ཡིག་གི་སྒྲུང་དེབ་མང་ཙམ་བཀླག་རྒྱུའི་གོམས་གཤིས་བཟང་པོ་འཇགས་དགོས། དང་པོ་རང་མི་རིགས་ཀྱི་སྐད་ཡིག་དེ་མཐར་ཕྱིན་པ་ཞིག་ཤེས་ན་གཞན་གྱི་སྐད་ཡིག་ནི་རང་བཞིན་གྱིས་ཤེས་པར་སླའོ། བོད་ཡུལ་ནི་སྙན་གྲགས་ཆེན་པོ་ཡིན་ལ་བོད་ཀྱི་སྐད་ཡིག་དང་རིག་གཞུང་ཡང་དེ་ལས་ལྷག་པ་ཡིན། ང་ཚོས་བོད་ཀྱི་སྐད་ཡིག་ངེས་པར་དུ་ང་ཚོའི་འཚོ་བའི་ནང་བཀོལ་སྤྱོད་གང་མང་གནང་དགོས། གུས་པ་ནི་མེས་དབོན་གཙུག་ལག་དཔེ་སྟོན་སློབ་གྲྭའི་སློབ་ཕྲུག་ཅིག་ཡིན་པའི་ཆ་ནས། བོད་ཀྱི་སྐད་ཡིག་གི་རྨང་གཞི་གཞན་ལས་ལྷག་པ་ཞིག་དགོས། གང་ཡིན་ཟེར་ན་བོད་ཡིག་རྒན་ལགས་རྣམས་ཀྱིས་ཉིན་མཚན་ལྟོས་མེད་སྦྱོང་ཚན་བཟོས་ཏེ་ང་ཚོ་སློབ་ཕྲུག་ཚོར་གནང་བ་དང། སྦྱོང་ཚན་འབྲི་སྦྱོང་ཙམ་མ་ཡིན་པར་འགྲེལ་བཤད་གསལ་པོ་གནང་བ། ཚིག་གསར་དག་གི་ཀློག་སྟངས་སློབ་པ་སོགས་གནང་གི་ཡོད་ཙང་བོད་ཡིག་ཡག་པོ་ཤེས་ཀྱི་ཡོད། ད་དུང་ང་ཚོས་རྒན་ལགས་ཀྱིས་གང་གསུངས་པ་དེ་བློ་ལ་ངེས་ནས་རང་འགུལ་ངང་བསྐྱར་སྦྱོང་བྱས་པས། ད་ཆ་དཔེ་སྟོན་སློབ་གྲྭའི་སློབ་ཕྲུག་རྣམས་ཀྱི་བོད་ཡིག་རྨང་གཞི་དང་སྐད་ཆ་ཤོད་སྟངས་སོགས་གཞན་ལས་ལྷག་པ་ཞིག་ཡོད་པར་ངོས་འཛིན་གནང་གི་ཡོད། དེ་འདྲ་སོང་ཙང་ང་ཚོས་མུ་མཐུད་འབད་བརྩོན་དང་ཡར་རྒྱས་གཏོང་དགོས། ད་དུང་ངས་བོད་ཕྲུག་རྣམས་ལ་མ་འོངས་པར་མི་བཟང་ཞིག་དང་སྤྱི་ཚོགས་ལ་ཕན་ཐོགས་ཐུབ་པའི་ཕུལ་བྱུང་གི་མི་སྣ་ཞིག་བྱེད་དགོས་པའི་རེ་བ་དང་འབོད་སྐུལ་ཞུ་ཡི་ཡོད། ང་ཚོ་བོད་ཕྲུག་ཅིག་ཡིན་པའི་ཆ་ནས་བོད་ཀྱི་སྐད་ཡིག་དོ་སྣང་དང་སློབ་སྦྱོང་མ་བྱས་ན་རིམ་བཞིན་ཉམས་རྒུད་དང་རྩ་མེད་དུ་འགྲོ་རྒྱུ་ཉག་ཅིག་རེད། གལ་སྲིད་འདི་འདྲའི་གནས་ཚུལ་ཞིག་ཏུ་གྱུར་ན་ང་ཚོས་དཔྲལ་བའི་མིག་དང་ཁོག་པའི་སྙིང་ལྟ་བུ་༸གོང་ས་སྐྱབས་མགོན་ཆེན་པོ་མཆོག་གི་བཀའ་དགོངས་མ་གྲུབས་པ་དང་ཁོང་ལ་གུས་བརྩི་མེད་པ་མཚོན་གྱི་ཡོད། གུས་པས་རེ་སྐུལ་ཞིག་ཞུ་རྒྱུ་ཡོད། ང་ཚོས་སྙིང་ནས་བརྩེ་བའི་བོད་ཀྱི་སྐད་ཡིག་སློབ་ཁྲིད་གནང་མཁན་རྒན་ལགས་རྣམ་པ་ཚོས་སློབ་ཕྲུག་རྣམས་ལ་གཞན་ལས་ལྷག་པའི་སློབ་ཁྲིད་གནང་གི་ཡོད་པ་ང་ཚོས་གསལ་པོ་ཤེས་ཀྱི་ཡོད། ཡིན་ནའང་སློབ་ཕྲུག་སྦྱངས་འབྲས་ཞན་པ་དང་ཤེས་ཚད་སྐྱོ་བ་རྣམས་ལ་དམིགས་བསལ་སློབ་ཁྲིད་དང་ཟུར་ཁྲིད་གནང་དགོས་པའི་མྱོང་ཚོར་ཞིག་བྱུང། གང་ཡིན་ཟེར་ན། སློབ་ཕྲུག་ཁ་ཤས་བོད་ཡིག་ཤེས་ཚད་ཞན་པོ་ཡོད་ཙང་གཞན་གྱི་རྗེས་མ་ཟིན་པ་དང། སློབ་ཕྲུག་གཞན་སྤྱི་ཡོངས་ཀྱི་དུས་ཚོད་ཀྱང་ཆུད་ཟོས་སུ་འགྲོ་ཡི་ཡོད་པས། རྒན་ལགས་རྣམས་ཀྱིས་ཁོ་ཚོའི་བོད་ཡིག་ཤེས་ཚད་ཡར་རྒྱས་གཏོང་རྒྱུའི་ཆེད་རང་ནུས་ཅི་ལྕོགས་ཀྱིས་ཟུར་ཁྲིད་གནང་རྒྱུའི་རེ་བ་ཡོད། །