བསྟན་འཛིན་ཉི་མ། དཔེ་སྟོན་སློབ་གྲྭ། འཛིན་གྲྭ་བདུན་པ། དེ་རིང་གུས་མོ་ངས་བོད་ཕྲུག་ཚོས་ངེས་པར་དུ་བོད་ཀྱི་སྐད་ཡིག་ལ་སློབ་སྦྱོང་བྱེད་དགོས་ཞེས་པའི་བརྗོད་གཞིའི་ཐོག སློབ་སྦྱོང་བྱེད་དགོས་པའི་རྒྱུ་མཚན་ཁག་ཅིག་ཞུས་ན་བསམ་བྱུང། རེད་ཡ། བོད་ཕྲུག་ཚོས་བོད་ཡིག་སྦྱོང་དགོས་པ་དང་རྒྱུན་གཏན་བོད་སྐད་བཤད་པ་དང་བོད་ཡིག་བེད་སྤྱོད་གཏོང་དགོས་ཀྱི་རེད། དམིགས་བསལ་ང་ཚོ་བཙན་བྱོལ་ནང་ཡོད་དུས་རང་ཉིད་ཀྱི་ཕ་སྐད་སྦྱོང་རྒྱུ་དང་ཤོད་སྟངས་ཉམས་རྒུད་འགྲོ་བཞིན་ཡོད་དུས་བོད་ཀྱི་སྐད་ཡིག་སྲུང་སྐྱོབ་བྱ་རྒྱུའི་ཆེད་བོད་ཀྱི་སྐད་ཡིག་སྦྱངས་ཏེ་ཉམས་པ་སླར་གསོ་བྱེད་དགོས། གལ་ཏེ་ང་ཚོ་བོད་ཀྱི་མ་འོངས་སོན་རྩ་ཚོས་བོད་སྐད་མ་བཤད་པ་དང་བོད་ཡིག་མ་སྦྱངས་ན་ནམ་ཞིག་བོད་ཀྱི་སྐད་ཡིག་དང་བོད་ཅེས་པ་སྟོང་ལ་ཉེ་བའི་སྲོག་ཆགས་བཞིན་རྩ་མེད་ཤུལ་མེད་དུ་འགྲོ་བའི་ཉེན་ཁ་ཆེན་པོ་ཡོད། དེ་ཡང་རྒྱ་ནག་གི་གཙོ་འཛིན་མའོ་ཙེ་ཏུང་གིས་ཀྱང་བོད་མི་རིགས་རྩ་གཏོར་གཏོང་དགོས་ན་སྔོན་ལ་བོད་ཀྱི་སྐད་ཡིག་དང་རིག་གཞུང་རྩ་མེད་དུ་གཏོང་དགོས་ཞེས་བཤད་ཡོད། མ་ཟད་པཎ་ཆེན་རིན་པོ་ཆེ་མཆོག་གིས་ཀྱང་སྐད་རིགས་སྣ་ཚོགས་ཤེས་པ་དེ་ངའི་འཇོན་ཐང་དང་ཡོན་ཏན་རེད། འོན་ཀྱང་ངས་རང་ཉིད་ཀྱི་ཕ་སྐད་མ་ཤེས་ན་དེ་ནི་ངའི་ངོ་ཚ་རེད། ཅེས་གསུངས་མྱོང་ཡོད་རེད། དེས་མ་ཟད་མི་ཞིག་ལ་སྙིང་མེད་ན་གནས་མི་ཐུབ་པ་དང་མི་རིགས་ཤིག་ལ་སྐད་ཡིག་མེད་ན་མི་རིགས་དེ་མེད་པ་དང་གཅིག་མཚུངས་རེད། མ་ཟད་བོད་ཀྱི་སྐད་ཡིག་དེས་ང་ཚོའི་རྒྱལ་ཁབ་རང་བཙན་གཙང་མ་ཡིན་པའི་རྒྱལ་ཁབ་ཅིག་ཡིན་པ་མཚོན་ཐུབ་ཀྱི་ཡོད། ཆབས་ཅིག་རྒྱ་ནག་དང་ཐ་དད་ཡིན་པའི་རྒྱལ་ཁབ་ཅིག་ཡིན་པའི་དཔང་རྟགས་ཁུངས་འཁྱོལ་བ་ཞིག་ཡིན། དེར་བརྟེན་བོད་ཕྲུག་ཚོས་བོད་སྐད་ཤོད་པ་དང་བོད་ཡིག་སྦྱོང་རྒྱུ་ཧ་ཅང་གལ་ཆེན་པོ་ཡིན། རྒྱུ་མཚན་གཞན་ཞིག་ནི་གལ་སྲིད་རང་ཉིད་ཀྱི་ཕ་སྐད་ཡག་པོ་ཤེས་ན་སྐད་རིགས་གཞན་གང་ཞིག་སྦྱངས་ནའང་ལས་སླ་པོའི་ངང་ཤེས་ཐུབ་ཀྱི་རེད། ཅེས་༸གོང་ས་མཆོག་གིས་གསུངས་མྱོང་ཡོད་རེད། རང་གི་སྐད་ཡིག་མ་ཤེས་པར་སྐད་ཡིག་གཞན་ཁོ་ན་བེེད་སྤྱོད་བྱས་ན་དེ་ནི་གླེན་པའི་རྟགས་རེད། དེ་འདྲ་སོང་ཙང་ང་ཚོས་ཁོང་གི་བཀའ་སློབ་ཉན་པོ་ཙམ་མ་ཟད་རྣ་རྒྱབ་རླུང་བུར་མ་བསྐུར་བར་རྒྱུན་གཏན་འཚོ་བའི་ནང་ལག་བསྟར་ཉམས་ལེན་བྱེད་དགོས། ང་ཚོས་དེ་ལྟར་བོད་ཡིག་དང་བོད་སྐད་བེད་སྤྱོད་བྱས་ན་བོད་ཡིག་མ་ཉམས་སླར་གསོ་ཐུབ་ཀྱི་རེད། དེར་བརྟེན་ང་ཚོ་ན་ཆུང་བོད་ཕྲུག་ཚོས་བོད་ཡིག་སྦྱངས་པ་དང་བོད་སྐད་གཙང་མ་བཤད་དགོས། གལ་སྲིད་ང་ཚོ་བོད་ཕྲུག་ཚོས་བོད་ཡིག་མ་ཤེས་ན་བོད་ཀྱི་ཆོས་དང་རིག་གཞུང་སློབ་སྦྱོང་བྱེད་ཐུབ་ཀྱི་མ་རེད། རྒྱུ་མཚན་ནི་བོད་པའི་ཆོས་དང་རིག་གཞུང་ཚང་མ་བོད་ཡིག་གི་ནང་འཐིམས་ཡོད། བོད་ཀྱི་སྐད་ཡིག་ནི་ང་ཚོ་བོད་པ་ཐུན་མོང་གི་སྐད་ཡིག་ཅིག་ཡིན་སྟབས་གལ་སྲིད་བོད་ཡིག་མེད་ན་ང་ཚོ་ཆོལ་གསུམ་བོད་མི་ཚང་མ་མཐུན་སྒྲིལ་ངང་གནས་ཐུབ་ཀྱི་མ་རེད། བོད་ཡིག་ལ་སློབ་སྦྱོང་མ་བྱས་ན་ང་ཚོས་ཤེས་བཞིན་དུ་རྒྱ་དམར་གཞུང་གི་སྲིད་ཇུས་དང་མཐུན་པ་ཞིག་བྱས་པ་དང་ཁྱད་པར་གང་འདུག པཎ་ཆེན་རིན་པོ་ཆེས། ཁྱེད་ཀྱིས་བོད་ཆས་གྱོན་མི་འདོད་ན་མ་གྱོན་ནའང་འགྲིག བོད་སྐད་བཤད་མི་འདོད་ན་མ་བཤད་ནའང་འགྲིག ང་ཚོའི་ཤ་དང་རུས་པ་དེ་ནམ་ཡང་བརྗེས་ཐུབ་ཀྱི་མ་རེད། ཅེས་གསུངས་གནང་ཡོད། ང་ཚོས་ད་ལྟ་ནས་བོད་ཀྱི་སྐད་ཡིག་དང་རིག་གཞུང་ལ་སློབ་སྦྱོང་མ་བྱས་ན། ལོ་མང་པོའི་རྗེས་སུ་འགྲེམས་སྟོན་ཁང་གི་གནའ་རྫས་ལྟ་བུར་གྱུར་དུས་འགྱོད་པ་སྐྱེས་ཀྱང་འཕྱིས་དྲགས་པ་རེད། དེར་བརྟེན་གུས་པ་ངའི་མཐའ་མཇུག་གི་རེ་བ་ནི། ང་ཚོ་བོད་ཕྲུག་ཚོས་བོད་སྐད་དྭངས་མ་ཞིག་བཤད་པ་དང། ར་མ་ལུག་གི་སྐད་ཆ་ཉུང་ཙམ་བཤད་རོགས་གནང། ང་ཚོས་བོད་མི་རིགས་ཀྱི་སྐད་ཡིག་རིན་ཐང་བྲལ་བ་དེ་རྩ་སྟོང་མ་འགྲོ་བའི་ཆེད་དུ་བོད་ཡིག་སྦྱོང་རྒྱུར་དགའ་པོ་དང། བོད་སྐད་སྦྱོང་རྒྱུར་དགའ་པོ་གནང་བའི་རེ་བ་ཞུ་རྒྱུ་ཡིན། མ་འོངས་པའི་བོད་མི་རིགས་གནས་དང་མ་གནས་གཙོ་བོ་བོད་པའི་སྐད་ཡིག་དང་རིག་གཞུང་གནས་དང་མ་གནས་ལ་ཐུག་ཡོད། དེར་བརྟེན་ན་ཆུང་བོད་ཕྲུག་ང་ཚོས་ཤེས་པར་བྱས་ཏེ་བོད་ཡིག་ངེས་པར་དུ་སྦྱོང་དགོས། །