བསྟན་འཛིན་འོད་ཟེར། སྦེལ་ཀོབ་སཾ་བྷོ་ཊ། འཛིན་གྲྭ་བཅུ་གཉིས། ཤེས་གསལ་ལྟར་ཤེས་ཡོན་སློབ་སྦྱོང་ཟེར་བ་གལ་ཆེན་པོ་རེད། ཡིན་ནའང་ང་དང་ང་འདྲ་བའི་སློབ་མ་རྣམས་ཀྱིས་ཤེས་བྱ་ཡོན་ཏན་ཏེ། རྒྱུ་མཚན་གང་ལ་བརྟེན་ནས་སྦྱོང་དགོས་པ་དེ་ཤེས་ན། རང་རེ་ཚོས་སློབ་སྦྱོང་ལ་དོ་སྣང་མང་བ་བྱེད་ཐུབ་ཀྱི་རེད་སྙམ་གྱི་འདུག སློབ་ཕྲུག་ཞིག་ཡིན་ན་སློབ་སྦྱོང་དེ་ཐོག་མར་སོ་སོ་རང་ཉིད་ཀྱི་དོན་དུ་སྦྱོང་དགོས། གང་ཡིན་ཟེར་ན་ང་ཚོས་མི་ཚེ་གང་ཚང་སོ་སོའི་ཕ་མ་ལ་བརྟེན་མི་ཐུབ་པས་རང་སོ་སོའི་རྐང་པའི་སྒང་ལ་ལངས་ནས་མི་བཟང་པོ་ཞིག་ཆགས་ཐུབ་པ་བྱེད་དགོས། གཉིས་པ་རང་གི་བརྩེ་བའི་ཕ་མ་གཉིས་ཀྱི་ཆེད་དུ་སྦྱོང་དགོས། ཁོང་ཚོས་ང་ཚོ་སློབ་གྲྭ་རུ་ཤེས་ཡོན་སྦྱོང་ཆེད་བཏང་བ་རེད། དེར་བརྟེན་ཤེས་ཡོན་ལ་ཧུར་ཐག་བྱེད་རྒྱུ་དེ་ལས་འགན་དང་ཁོང་ཚོའི་བཀའ་དྲིན་འཇལ་བའི་ཐབས་ལམ་ཞིག་ཀྱང་ཡིན། ༧སྐྱབས་མགོན་༸རྒྱལ་བ་རིན་པོ་ཆེ་མཆོག་གི་དགོངས་པ་ལྟར་ཤེས་ཡོན་ཡག་པོ་སྦྱངས་ནས་སོ་སོའི་སྤྱི་ཚོགས་ལ་ཞབས་སྤྱི་ཞུ་ཐུབ་པ་བྱེད་དགོས། བརྩོན་འགྲུས་གཅིག་པོས་སློབ་སྦྱོང་བྱས་ན་གང་ཤེས་པ་དེ་བློ་ཡུལ་དུ་རྒྱུན་རིང་པོ་མི་གནས་པ་དང། ད་དུང་དེས་དུས་ཚོད་མང་པོ་ཞིག་ཆུས་ཟོས་སུ་འགྲོ་བ། མ་ཟད་ལ་ལས་མཚན་མོར་གཉིད་མ་ཉལ་བ་དང། ཡི་གེ་སྦྱོང་དུས་བར་སེང་མ་ལེན་པ་སོགས་བྱས་ནས་ལུས་སེམས་གཉིས་ཀར་དཀའ་ངལ་ཆེན་པོ་འཕྲད་ཀྱི་ཡོད། དེར་བརྟེན་སློབ་སྦྱོང་ངམ་ཡི་གེ་གྲུང་པོ་བྱས་ནས་སྦྱོང་རྒྱུ་དེ་གལ་ཆེན་པོ་ཡིན། དུས་ཚོད་མང་ཉུང་གི་གྲངས་འབོར་ལས་ག་ཚོད་ཤེས་ཡོད་མེད་ཀྱི་སྤུས་ཀ་དེ་གལ་ཆེ་བ་རེད། གྲུང་པོའི་ཐོག་ནས་སྦྱངས་ན་དུས་ཚོད་ཐུང་ཐུང་ཞིག་ལ་མང་པོ་ཤེས་ཐུབ་ལ། གོ་དོན་རྣམས་ཐབས་ལམ་འདྲ་མིན་ཁག་བེད་སྤྱོད་བཏང་ནས་སྦྱངས་ན་རང་གིས་དོན་ཡག་པོ་ཤེས་པ་མ་ཟད། ཡུན་རིང་བློ་རུ་ངེས་པའི་ཕན་ཡོན་ཡང་ཡོད། སློབ་སྦྱོང་གྲུང་པོའི་ཐོག་སྦྱང་གནང་རྒྱུའི་ཐབས་ལམ་ནི་ཐོག་མ་དེ་འཛིན་གྲྭའི་ནང་མདུན་དུ་བསྡད་ན་ལེགས་པ་ཡོད། མདུན་ལ་བསྡད་མ་ཐུབ་ཚེ་འཛིན་གྲྭའི་ནང་དགེན་ལགས་ཀྱིས་སློབ་ཚན་ཁྲིད་པའི་སྐབས་སུ་ཡག་པོ་བྱས་ནས་ཉན་པ་དང། དོ་སྣང་ཡག་པོ་གནང་ནས་ནང་དུ་དགེན་ལགས་ཀྱིས་སློབ་ཁྲིད་གནང་བ་རྣམས་བསྐྱར་སྦྱོང་བྱེད་ཐུབ་ན་རང་གི་སློབ་སྦྱོང་གོང་འཕེལ་དུ་ཕྱིན་པ་ཙམ་དུ་མ་ཟད། ཡིག་རྒྱུགས་སྐབས་སུའང་ཁེ་ཕན་ཆེན་པོ་ཡོད་རེད། ཡང་གལ་ཆེའི་དོན་གནད་རྣམས་ཤོག་བུ་ཆུང་ཆུང་སྟེང་བྲིས་ན་དྲན་པར་སླེབས་མྱུར་བ་དང། རང་གིས་སྦྱངས་ཟིན་པའི་སློབ་ཚན་གྱི་ནང་དོན་རྣམས་བང་རིམ་བསྒྲིགས་ནས་ས་ཁྲ་འདྲ་བ་ཞིག་བྲིས་ཚེ། གང་སྦྱངས་ཟིན་མིན་གསལ་པོར་ཤེས་པ་དང་སྦྲགས་བསྐྱར་སྦྱོང་བྱེད་སླ་བ་ཡང་ཡོད། དེ་བཞིན་གང་སྦྱོང་རྒྱུ་ལྷག་པ་རྣམས་དང་སློབ་སྦྱོང་གི་འཆར་གཞི་རྣམས་དེབ་ཆུང་ནང་དུ་བཀོད་ཚེ་ནང་ལས་ཡིན་ནའང་དུས་ཐོག་ཏུ་བྱེད་ཐུབ་པ་དང། སློབ་ཚན་ཆད་རྣམས་ཆད་ལྷག་མེད་པར་དུས་ཐོག་ཏུ་སྦྱོང་ཐུབ་པའི་ཁྱད་ཆོས་ཡོད། མ་ཟད་དགེན་ལགས་ཀྱིས་དྲི་བ་ཁག་གི་ལན་གང་བྲིས་གནང་བ་དེ་རང་གིས་མགོ་མ་ཚོད་པ་དང་། རིང་དྲགས་པ་སོགས་ཡོད་ན། རང་གི་ཚིག་ཐོག་ཏུ་བསྡོམས་བརྒྱབ་ནས་ལན་ཐུང་ངུ་ཞིག་སྦྱོང་སླ་བའི་ཆེད་དགེན་ལགས་ལ་བཀའ་འདྲི་ཞུས་ནས་བྲིས་ན་ཕན་རླབས་ཧ་ཅང་ཆེན་པོ་ཡོད། ལྷག་པར་དུ་རང་གི་འཛིན་གྲོགས་དང་མཉམ་དུ་སློབ་ཚན་དང་འབྲེལ་བའི་གྲོས་བསྡུར་བྱས་ན་ཕན་ཐོགས་ཆེ། རང་གིས་གང་ཤེས་པ་དེ་རོགས་པ་གཞན་ལ་བསླབས་པ་ཡིན་ན། ཁོ་རང་ཚོར་ཕན་ཐོགས་པ་ཙམ་མ་ཟད། རང་ལ་ཡང་བསྐྱར་སྦྱོང་ཡོང་གི་རེད། སློབ་སྦྱོང་བྱེད་སྐབས་བར་སེང་ལེན་རྒྱུ་གནད་འགག་ཅིག་རེད། གལ་སྲིད་ཆུ་ཚོད་གཅིག་རིང་སྦྱངས་ན་སྐར་མ་བཅུ་རིང་བར་སེང་ལེན་པ་སོགས་བྱེད་དགོས། ད་དུང་རང་གིས་སྦྱངས་ཟིན་པ་རྣམས་རང་སོ་སོས་སོ་སོར་ཡིག་རྒྱུགས་གཏོང་བ་དང། བོད་ཡིག་འདྲ་ཡིན་ཚེ་དེབ་ཐོག་ཏུ་ཕབས་ནས་སྦྱངས་ན་རྗེས་སུ་ཡིག་རྒྱུགས་སྐབས་དག་ཆར་ནོར་འཁྲུལ་ཉུང་བ་སོགས་ཀྱི་ཕན་ཐོགས་ཡོད། སློབ་སྦྱོང་ལས་ལྷག་པ་འཕྲོད་བསྟེན་ཡིན་སྟབས་ཞལ་ལག་དང་ཆབ་སོགས་དུས་ཐོག་ཏུ་མཆོད་དགོས། ཡང་ལུས་རྩལ་རྩེད་ན་སློབ་སྦྱོང་ནུས་པ་ཆེ་བ་བྱེད་ཐུབ་པ་ཡང་ཡོད། འཕྲོད་བསྟེན་ཡག་པོ་ཡོད་ན་རང་བཞིན་གྱིས་སློབ་སྦྱོང་བྱེད་པར་དོ་སྣང་དང་ནུས་པ་ཆེ་བ་ཐོན་གྱི་རེད། ནང་ལས་བྱེད་སྐབས་མང་ཉུང་ལ་མ་བལྟོས་པར་དོ་སྣང་སྤྲད་ནས་བྱས་ན་ནང་ལས་མགྱོགས་པ་ཚར་བ་དང། ནང་ལས་དུས་ཐོག་ཏུ་ཚར་ན་བསྐྱར་སྦྱོང་དང་དཔེ་དེབ་གཞན་བཀླག་རྒྱུའི་དུས་ཚོད་མང་པོ་འཐོབ་པ་ནི་ཆོས་ཉིད་རེད། དེང་སང་སློབ་ཕྲུག་ཚོར་ལག་ཐོགས་ཁ་པར་མེད་པ་ཕལ་ཆེར་མེད་པས་ཁ་པར་བལྟས་ནས་དུས་ཚོད་སྐྱེལ་དྲགས་ན། མིག་དང་འཕྲོད་བསྟེན་གཉིས་ཀར་གནོད་སྐྱོན་ཤུགས་ཆེན་པོ་བཟོ་ཡི་ཡོད་པ་དང། དམིགས་བསལ་གྱིས་སློབ་སྦྱོང་བྱེད་པར་ཁ་པར་གྱིས་བར་ཆད་ཧ་ཅང་ཆེན་པོ་བྱེད་ཀྱི་ཡོད། དེར་བརྟེན་རང་སྦྱོང་བྱེད་སྐབས་ཁ་པར་རྒྱང་ཐག་རིང་ཙམ་བཞག་པ་དང་། ཡང་ན་མཁའ་འགྲུལ་རྣམ་པ་(Airplane Mode)ལ་བཞག་གནང་དགོས། ཡིག་རྒྱུགས་དུས་སྐབས་སུ་ཁ་པར་ལ་ལག་པ་མ་འཆང་ན་ལེགས། ཡང་ཁ་པར་གྱིས་སློབ་སྦྱོང་བྱེད་པར་བར་ཆད་ལས་མཐུན་རྐྱེན་མི་བྱེད་པ་མིན་ཏེ། […]

བསྟན་འཛིན་ཟླ་སྒྲོན། སྦེལ་ཀོབ་སཾ་བྷོ་ཊ། འཛིན་གྲྭ་བཅུ་གཉིས། ༄༅། ། མིག་དཔེ་བལྟ་ཡུལ་ཟེར་ན་མི་གང་ཞིག་ལ་བལྟས་ནས་རང་གིས་ལས་ཀ་ཞིག་བྱེད་པར་སེམས་ཤུགས་དང་བློ་སྤོབས་འཕེལ་བར་འགྱུར་བའི་མི་དེ་ལ་ཟེར།  མིག་དཔེ་བལྟ་ཡུལ་དེ་མི་སུ་ཡིན་ནའང་ཡིན་སྲིད་པ་རེད། དཔེར་ན། རང་གི་ཕ་མ་དང། དགེ་རྒན། གྲོགས་པོ། གྲོགས་མོ། སྙན་གྲགས་ཅན་གྱི་མི་བཅས་སོ། ། ན་གཞོན་ཚོར་མིག་དཔེ་བལྟ་ས་ཞིག་ཡོད་པ་ཡིན་ན། དེ་ལ་དཔེ་བལྟས་ནས་རང་གི་དམིགས་ཡུལ་བསྒྲུབ་པར་སེམས་ཤུགས་འཕར་མ་ཞིག་སྐྱེས་པ་དང། ཡང་མིག་དཔེ་བལྟ་ཡུལ་དེས་རང་གི་དམིགས་ཡུལ་དེ་བསྒྲུབས་པ་ལ་ལམ་སྟོན་པ་ལྟ་བུའི་ལམ་སྟོན་ཡང་བྱེད་ཐུབ། མི་སོ་སོ་ལ་མིག་དཔེ་ལྟ་ཡུལ་ཞིག་མེད་པ་ཡིན་ན། སོ་སོའི་མི་ཚེའི་ནང་ལ་ཡོད་པའི་དམིགས་ཡུལ་དེ་བསྒྲུབ་ཡག་ལ་དཀའ་ལས་འབྱུང་བ་དང་། སོ་སོ་ལ་བློ་སྤོབས་སྤེལ་མཁན་དང་རྒྱབ་སྐྱོར་བྱེད་མཁན་མེད་པ། སོ་སོའི་ནང་མིས་སོ་སོའི་དམིགས་ཡུལ་བསྒྲུབ་རྒྱུར་རྒྱབ་སྐྱོར་བྱེད་པའི་སྒང་ལ། མིག་དཔེ་བལྟ་ཡུལ་ཞིག་ཡོད་པ་དེས་སོ་སོ་ལ་རྒྱབ་སྐྱོར་ཞིག་བྱུང་བ་ཡིན་ན། སོ་སོའི་ནང་གི་བློ་གཏད་མཐོ་རུ་ཕྱིན་ནས་དམིགས་ཡུལ་བསྒྲུབ་ཡག་ལ་དཀའ་ལས་མང་བ་རྒྱག་ཐུབ་ཀྱི་རེད། མིག་དཔེ་ལྟ་ཡུལ་ཡོད་པ་ཙམ་གྱིས་མི་ཆོག་པར་མིག་དཔེ་ལྟ་ཡུལ་དེ་མ་ནོར་བ་ཞིག་ཀྱང་ཡིན་དགོས། མིག་དཔེ་ལྟ་ཡུལ་མ་ནོར་བ་ཞིག་ཡིན་དགོས་པ་དང་། མི་དེའི་མི་ཚེའི་ལོ་རྒྱུས་ཆ་ཚང་རང་གིས་ཤེས་དགོས་པ་གལ་ཆེན་པོ་རེད། ཁོས་མི་ཚེའི་ནང་དུ་སྐུ་ལས་བརྒྱབས་པའི་ལོ་རྒྱུས་ཤེས་ན་རང་གིས་ཀྱང་དེ་ལྟར་དཀའ་ལས་རྒྱག་རྒྱུའི་འདོད་པ་སླེབས་པ་དང། དེའི་གཤིས་ཀ་རང་ལ་འཇགས་ན་ཁེ་ཕན་ཆེན་པོ་ཡོད་པ་བཅས་ཤེས་དགོས། དེང་སང་བོད་པའི་ན་གཞོན་མང་པོས་འཛམ་གླིང་ནང་གི་སྙན་གྲགས་ཅན་གྱི་གཞས་པ་གཞས་མ་དང། གློག་བརྙན་འཁྲབ་སྟོན་པ་ལ་སོགས་པར་སོ་སོའི་མིག་དཔེ་ལྟ་ཡུལ་དུ་བྱེད་ཀྱི་ཡོད། དེ་ནོར་བ་རེད་ཅེས་ཟེར་མི་ཐུབ། མང་པོས་སྙན་གྲགས་ཅན་གྱི་འཁྲབ་སྟོན་པ་དེའི་སྐད་གྲགས་གཅིག་པོ་མཐོང་བ་མ་གཏོགས། དེས་སྙན་གྲགས་ཅན་ཆགས་པར་དཀའ་སྡུག་ག་ཚོད་མྱངས་ཡོད་མེད་མཐོང་མཁན་དཀོན་པོ་རེད། ཡང་སྙན་གྲགས་ཡོད་པ་ཙམ་གྱིས་མིག་དཔེར་ལྟ་འོས་ཞིག་ཡིན་པ་བཤད་མི་ཐུབ། དཔེར་ན་དེང་སང་སྙན་གྲགས་ཅན་མང་པོས་ཆང་རག་ཚོད་མེད་འཐུང་བ་དང། དེ་མིན་གྱི་ནག་ཉེས་མང་པོ་གསོག་མཁན་ཡང་ཡོད། དེར་བརྟེན་མིག་དཔེ་བལྟ་ཡུལ་ནོར་བ་ཡིན་ན། རང་གི་མི་ཚེ་འཕྲོ་བརླག་ཏུ་འགྲོ་པ་དང། ཡང་རང་གི་མི་ཚེའི་དམིགས་ཡུལ་སྒྲུབ་པར་དེས་ཕན་པའི་ཚབ་ཏུ་གནོད་ཀྱང་སྐྱེལ་སྲིད། སོང་ཙང་རང་གི་མིག་དཔེ་བལྟ་ཡུལ་མ་ནོར་བ་ཞིག་གདམ་རྒྱུ་ཧ་ཅང་གལ་ཆེ བུ་མོ་ང་རང་གི་མིག་དཔེ་ལྟ་ཡུལ་སྐོར་བཤད་ན། ངའི་མིག་དཔེ་ལྟ་ཡུལ་དེ་ནི་ང་རང་གི་པ་ལགས་ཡིན། གང་ཡིན་ཞེ་ན། ངའི་པ་ལགས་ནི་ཞིང་པ་ཞིག་ཡིན་པ་དང་། པ་ལགས་ཁོང་རང་གཅིག་པུས་ང་དང་ངའི་གཅུང་མོ་གཉིས་ལོ་ན་བདུན་ནས་གསོ་སྐྱོང་གནང་དང་གནང་བཞིན་པ་ཡིན། པ་ལགས་ཞིང་པ་ཞིག་ཡིན་པའི་ཆ་ནས་ནང་དུ་དཀའ་ངལ་མི་འདྲ་བ་མང་པོ་ཞིག་འཕྲད་ཡོད་ཀྱང། ངའི་པ་ལགས་ཀྱིས་དཀའ་ངལ་དེ་དག་ལ་གདོང་ལེན་གནང་སྟངས་ལས་ངས་གང་ཤེས་སོང་ངམ་ཞེ་ན། མི་ཚེའི་ནང་དུ་དཀའ་ངལ་ག་ཚོད་དང་སྡུག་པོ་ག་ཚོད་འཕྲད་ནའང་འཛུམ་མདངས་དང་བཅས་གདོང་ལེན་བྱེད་དགོས་པ་དེ་ཡིན། པ་ལགས་ཀྱིས་ནམ་ཞག་རྒྱུན་དུ་ནས་མིའི་མི་ཚེའི་ནང་དཀའ་ངལ་འཕྲད་རྒྱུ་ཡིན་པ་ཞིག་ལ་ཡིད་ཆེས་གནང་གི་ཡོད་པ་དང། འཛམ་བུ་གླིང་འདིའི་ནང་དུ་དཀའ་ངལ་མེད་པའི་མི་སུ་གཅིག་ཀྱང་མེད་པར་བརྟེན་དཀའ་ངལ་འཕྲད་སྐབས། ངུས་ནས་མ་བསྡད་པར་དཀའ་ངལ་དེ་སེལ་ཐབས་གང་ཡོད་སྐོར་བསམ་བློ་གཏོང་དགོས་པ་དང་། ངུས་ནས་བསྡད་ན་དཀའ་ངལ་དེ་དེ་བས་སྡུག་ཏུ་གཏོང་བ་མ་ཟད་སོ་སོའི་འཕྲོད་བསྟེན་ལ་ཡང་གནོད་སྐྱོན་བྱེད་ཀྱི་ཡོད་པ་གསུངས་ཀྱི་རེད། མཐར་རང་གི་དམིགས་ཡུལ་གང་ཡིན་བསྒྲུབ་ཐུབ་པར་བྱས་ཏེ། རང་གིས་རང་ལ་ཡིད་ཆེས་ཡོད་པ། གཞན་ལ་གུས་བརྩི་བྱེད་པ། […]

བསྟན་འཛིན་ཀུན་གསལ། སཾ་བྷོ་ཊ་གུ་རུ་པུ་ར་སློབ་གྲྭ འཛིན་གྲྭ་དགུ་པ། ལོ་ངོ་སྟོང་ཕྲག་སྔོན་བོད་མི་རྣམས་གཅིག་སྒྲིལག་གྱི་གོང་བུ་ཅིག་ཏུ་གྱུར་ཡོད། ཕྱི་ལོ་༨༦༦ ཙམ་ལ་བོད་དང་རྒྱ་ནག་གཉིས་མ་མཐུན་པར་བོད་དམག་ཚོས་རྒྱ་ནག་གི་ཡུལ་མང་པོ་བཅོམ་ནས་རྒྱ་ནག་གི་རྒྱལ་ས་བར་དམག་བརྒྱབ་ནས་རྡོ་རིང་སླང་ཡོད། བོད་ཀྱི་རྒྱལ་རབས་ལ་བལྟས་ན་བོད་ནི་རང་བཙན་གཙང་མའི་རྒྱལ་ཁབ་ཅིག་ཡིན་པ་དང་། རྒྱ་ནག་ཡང་བོད་དང་དམག་འཁྲུག་ཤོར་ནས་བོད་མིས་རྒྱ་ནག་ལ་བཙན་འཛུལ་བྱས་པ་ཡང་བྱུང་ཡོད། འོན་ཀྱང་རྒྱ་མི་འདི་ཚོས་བོད་འདི་རྒྱ་ནག་གི་ཆ་ཤས་ཡིན་ཞེས་ཨུ་ཚུགས་ཀྱིས་རྫུན་གཏམ་བཤད་ནས་འཛམ་གླིང་གང་སར་བཤད་དང་ཤོད་བཞིན་པ་རེད། སྔར་གྱི་༸རྒྱལ་བ་གོང་མ་རྣམས་ནས་ཆབ་སྲིད་ཀྱི་ཐུགས་འགན་བཞེས་པའི་ལོ་ནི་དགུང་ལོ་བཅོ་བརྒྱད་ནས་ཡིན་ཡང་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ནི་དགུང་གྲངས་༡༦ ལ་ཆོས་སྲིད་གཉིས་ཀྱི་འགན་འཁུར་བཞེས་དགོས་བྱུང་བ་རེད། ༡༩༥༤ ལོར་༸གོང་ས་མཆོག་དང་རྒྱ་གར་གྱི་སྲིད་བློན་ནཱེ་རུ་མཆོག་མཇལ་འཕྲད་གནང་བ་དང་། རྒྱ་ནག་པེ་ཅིང་གི་དུས་ཆེན་ཞིག་ལ་ཡང་རྒྱ་ནག་གཞུང་གིས་མགྲོན་འབོད་བྱས་པ་ལྟར་ཕེབས་པ་རེད། ༡༩༥༦ ལོར་༸གོང་ས་མཆོག་རྒྱ་གར་དུ་སངས་རྒྱས་མྱ་ངན་ལས་འདས་པའི་དུས་ཆེན་ལ་ཕེབས་ནས་༸གོང་ས་མཆོག་ནས་རྒྱ་གར་གྱི་སྲིད་བློན་ནཱེ་རུ་མཆོག་ལ་ད་ལྟ་བོད་ནང་གནད་དོན་ཛ་དྲག་ཡོད་པའི་སྐོར་ལ་བཀའ་མོལ་མང་པོ་གནང་བ་དང་། དེ་ནས་ ༡༩༥༩ ཟླ་ ༠༣ ཚེས་ ༡༧ ཉིན་༸གོང་ས་མཆོག་དང་དཔོན་གཡོག་ཧྲག་བསྡུས་ཤིག་མ་འོངས་པའི་བོད་ཀྱི་དཀའ་སྡུག་སེལ་ཆེད་དུ་གཞན་ཡུལ་དུ་སྐྱབས་བཅོལ་ལ་མ་ཕེབས་ཀ་མེད་བྱུང་བ་རེད། ཁོང་རྣམས་པས་དེའི་སྐབས་སུ་གཞུང་ཞབས་ཁག་ཅིག་རྒྱ་གར་དང་ཁག་གཅིག་འབྲུག་ལ་གཏོང་དགོས་དགོངས་པ་རེད། རྒྱ་གར་གཞུང་གིས་ཕེབས་བསུ་དང་སྣེ་ལེན་གྲ་སྒྲིག་ལེགས་པོས་བྱུང་བས་སེམས་ནང་དགའ་སྣང་དང་སྦྲགས་རྒྱ་གར་དུ་ཕེབས་པ་རེད། དེ་དུས་༸གོང་ས་མཆོག་ནས་རྒྱ་གར་གྱི་སྲིད་བློན་ནཱེ་རུ་དང་མཇལ་འཕྲད་གནང་བ་དང་བོད་དོན་སྐོར་ཆེད་དུ་ཞུས་པ་རེད། ༡༩༥༡། ༡༩༥༩། ༡༩༦༡ ལོ་ལོ་སོ་སོར་འཛམ་གླིང་མཉམ་འབྲེལ་རྒྱལ་ཚོགས་ལ་སྙན་ཞུ་རབ་དང་རིམ་པ་ཕུལ་བ་རེད། དེ་དུས་འབྲས་བུ་གང་ཡང་ཐོན་ཐུབ་པ་བྱུང་མེད། དེ་ནས་༸གོང་ས་མཆོག་གི་དགོངས་པར་སྔ་ཕྱི་མ་གཏོགས་རྒྱ་ནག་དང་བོད་གཉིས་མཉམ་དུ་སྐད་ཆ་བཤད་དགོས་པ་འགྱུར་གྱི་རེད། དུས་ཚོད་དེ་ཡི་སྐབས་སུ་ད་དུང་ང་ཚོས་རང་བཙན་གྱི་སྐད་ཆ་བཤད་ནས་བསྡད་པ་ཡིན་ན་རྒྱ་ནག་དམར་པོའི་གཞུང་དང་སྐད་ཆ་བཤད་ཐབས་མེད་པ་སྔོན་ནས་༸གོང་ས་མཆོག་ནས་མཁྱེན་གྱི་ཡོད་རེད། དེའི་རྗེས་ཡིད་བཞིན་ནོར་བུ་མཆོག་ནས་རྒྱ་བོད་གཉིས་ལ་ཕན་པའི་ལམ་ཞིག་དགོས་འདུག་དགོངས་ནས་ཕྱི་ལོ་༡༩༦༤ ལོར་གཉིས་ཕན་དབུ་མའི་ལམ་འདིར་དགོངས་པ་བཞེད་ནས་ཐུགས་གཏན་འཁེལ་གནང་བ་རེད། དེ་ནས་བཟུང་དབུ་མའི་ལམ་གྱི་ལྟ་ཚུལ་དང་ལངས་ཕྱོགས་འདིར་ཕྱི་ནང་གི་རྒྱལ་ཁབ་ཀྱི་དབུ་ཁྲིད་མང་པོས་བསྟོད་བསྔགས་དང་། ལངས་ཕྱོགས་ཀྱི་རྩ་བ་འདིར་ཕྱིས་སུ་རྗེས་སུ་ཡིད་རངས་དང་བསྟོད་བསྔགས་ཡང་ཆེན་པོ་བྱུང་བ་རེད། ༸གོང་ས་ཡིད་བཞིན་ནོར་བུ་མཆོག་ནས་དབུ་མའི་ལམ་འདི་ཕན་ཐོགས་ཆེན་པོ་ཡོང་བ་གཟིགས་པ་ནང་བཞིན་བྱུང་བ་རེད། དེ་ནས་བཟུང་བོད་ཀྱི་གནད་དོན་ཐད་ལ་རྒྱབ་སྐྱོར་བྱེད་མཁན་མང་དུ་མང་དུ་ཕྱིན་ནས་བོད་པའི་གནས་ཚུལ་འདི་འཛམ་བུའི་གླིང་དུ་ངོ་འཕྲོད་བྱུང་བ་མ་ཟད། བོད་པའི་མི་རིགས་འདིས་དཀའ་ལས་མང་པོ་བརྒྱབས་ནས་འཛམ་གླིང་ཀུན་ལ་རྒྱ་མིས་བོད་འདི་བཙན་བཟུང་བྱས་ནས་འཕྲོག་པ་ཞིག་ཡིན་པ་གསལ་སྟོན་བྱས་པ་མ་ཟད། བོད་པའི་སྐད་དང་། ཡི་གེ རིག་གཞུང་བཅས་རྒྱ་ནག་དང་ཐ་དད་པ་ཞིག་ཡིན་པ་ཤེས་ཐུབ་པ་བྱུང་བ་རེད། དེ་དང་མཉམ་དུ་དུས་ཚོད་དེའི་སྐབས་སུ་བཙན་བྱོལ་དུ་ཡོད་པའི་བོད་མིའི་ཕྲུ་གུ་རྣམས་ལ་རྒྱ་གར་གཞུང་མང་གི་ཐུགས་རྗེའི་བཀའ་དྲིན་དང་། རྒྱལ་སྤྱིའི་རོགས་རམ་བཅས་ལ་བརྟེན་ནས་སློབ་གྲྭ་ཁག་གསར་འཛུགས་གནང་སྟེ་ད་ལྟའི་བར་དུ་བོད་ཕྲུག་མང་པོ་ལ་སློབ་སྦྱོང་གི་གོ་སྐབས་ཐོབ་པ་རེད། བོད་མི་རྣམས་ཀྱི་རང་བཞིན་གྱི་རིག་གཞུང་དང་། ཆོས། གོམས་གཤིས་བཟང་པོ་རྣམས་མི་ཉམས་གོང་འཕེལ་ཆེད་དུ་གཞིས་ཆགས་ཡང་ཟུར་དུ་གསར་འཛུགས་ཐུབ་པ་བྱུང་བ་རེད། དེ་ནས་རིམ་གྱིས་བོད་མིའི་སྒྲིག་འཛུགས་དང་བཀའ་ཤག དགེ་འདུན་པའི་དགོན་སྡེ་ཁག་གསར་འཛུགས་གནང་ནས་ད་ལྟའི་བར་དུ་བོད་མི་ཚོས་བོད་དོན་ཆེད་དུ་སྐུ་ལས་ཚད་ལས་བརྒལ་བ་སྐྱོན་བཞིན་ཡོད། ༸གོང་ས་མཆོག་གཙོ་བོར་བྱས་པའི་ང་ཚོའི་མི་རབས་རྒན་པ་རྣམས་ལ་བུ་མོ་ངས་ཐུགས་རྗེ་ཆེ་ཞེས་ཞུ་བཞིན་ཡོད། །

ཀུན་དགའ་ཚེ་སྒྲོན། ཅོན་ཏ་ར་བོད་ཁིམ། འཛིན་གྲྭ་བཅུ་པ་གདུགས། མི་ལུས་རིན་ཆེན་ཕ་མ་ཁྱེད་ཀྱིས་གནང་། ། མི་གྲལ་ཚུད་པའི་ཤེས་ཡོན་སློབ་སྦྱོང་སྤྲད། ། ཕ་མའི་དྲིན་གྱིས་བསྐྱངས་པའི་བུ་མོ་ངས། ། ནམ་ཡང་ཁྱེད་གཉིས་མགོ་བོའི་ཐོག་ཏུ་བཀུར། ། འཛམ་བུ་གླིང་འདིའི་ནང་ཞོགས་པ་ཉལ་ས་ནས་གཉིད་སད་པ་དང་། མིག་ནང་ལྷང་ངེར་དྲན་པ་ནི་ངའི་དྲིན་ཅན་ཕ་མ་གཉིས་ཡིན་ལ། ལྷག་པར་དུ་ཕ་མ་གཉིས་ཀྱི་བཀའ་དྲིན་ནི་ཧ་ཅང་རྒྱ་ཆེ་བས་འཇིག་རྟེན་འདིའི་ནང་ཕ་མ་ཞེས་པ་སངས་རྒྱས་ལྷ་དང་འདྲ་མཉམ་ཡིན་སྙམ་པ་འདུག ཕ་མ་གཉིས་ཀྱི་བཀའ་དྲིན་ཧ་ཅང་ཆེ་བས་ཁོ་མོས་ཤོག་བུ་དཀར་པོའི་སྟེང་ལ་བཀོད་པ་ཡིན་ནའང་བྲིས་ནས་རྫོགས་ཐབས་མེད་པ་ཞིག་ཡིན། དེར་བརྟེན་དེ་རིང་འདིར་ངས་རང་ཉིད་ཀྱི་གང་དྲན་པ་རྣམས་ཅུང་ཟད་འགོད་རྒྱུ་ཡིན། ཕ་མ་གཉིས་ནི་ཕྲུ་གུའི་ཆེད་དུ་ཁྱད་དུ་འཕགས་པའི་མི་སྣ་ཞིག་ཡིན་པ་མ་ཟད། ཨ་མའི་མངལ་ནང་ཟླ་བ་དགུ་ལྷག་གཅེས་ཉར་བྱས་པ་མ་ཟད། རང་ཉིད་ཀྱི་མངལ་ནང་ཡོད་པའི་ཕྲུ་གུར་མི་གནོད་པའི་ཆེད་དུ་ཟས་རིགས་སྣ་ཚོགས་ལ་དོ་སྣང་བྱས་ཏེ། རང་ཉིད་ཀྱི་དགའ་བའི་ཟས་རིགས་སྣ་ཚོགས་འཛེམས་པ་མ་ཟད། ཕྲུ་གུ་གཙོ་བོ་བྱས་ནས་བཟའ་བཏུང་བྱས་པ་དེ་ཡིན། དེ་བཞིན་པ་ལགས་ཀྱིས་ཀྱང་དུས་ནམ་ཡང་ཨ་མའི་མངལ་ནང་ཡོད་པའི་ཕྲུ་གུའི་ཆེད་དུ་ག་དུས་ཡིན་ནའང་ཨ་མའི་མཉམ་དུ་དུས་ཚོད་སྐྱེལ་བ་དང་། རྒྱུན་དུ་ཨ་མའི་ལས་ཀ་ཡོངས་རྫོགས་འགན་འཁུར་ནས་གྲུབ་ཐབས་ལ་འབད་བརྩོན་བྱས། དེར་བརྟེན་ཁོང་རྣམས་ཀྱི་བཀའ་དྲིན་དང་བྱམས་བརྩེའི་འོག་ང་ཚོར་ཡངས་པའི་འཇིག་རྟེན་ཡིད་དུ་འོང་བ་དེ་མཐོང་རྒྱུ་བྱུང་ཡོད་ལ། དགའ་སྐྱོ་སྤྲོ་གསུམ་ངང་ནས་མི་ཚེ་དོན་དང་ལྡན་པ་ཞིག་སྐྱེལ་རྒྱུ་བྱུང་བ་ནི་གཙོ་བོ་ཕ་མ་ལྷན་རྒྱས་གཉིས་ཀྱི་བཀའ་དྲིན་ཉག་ཅིག་ལ་བརྟེན་ནས་ཡིན། དེ་ལྟར་ངའི་ཕ་མ་གཉིས་པོས་ཀྱང་ང་ལ་ཆུང་བྱིས་པའི་དུས་ནས་བཟའ་སྟངས་དང་། འགྲོ་སྟངས། སྡོད་སྟངས་བཅས་ཀྱི་བསླབ་བྱ་བཟང་པོ་གནང་ཡོད་ལ། ང་ལ་ཡོད་པའི་ཡ་རབས་བཟང་པོའི་སྤྱོད་ཚུལ་ཅུང་ཟད་དེ་ཡང་ཕ་མ་གཉིས་ལ་བརྟེན་ནས་བྱུང་བ་ཞིག་ཡིན། ད་དུང་ཁོ་མོ་ཆུང་དུས་ནས་ཕ་མས་གཙང་སྦྲ་འཕྲོད་བསྟེན་དང་ཟས་གོས་ཀྱི་མཐུན་འགྱུར་གང་ཡག་སྦྱར་ཏེ་ཅོན་ཏ་ར་སློབ་གྲྭ་འདི་ལྟ་བུ་ཞིག་གི་ནང་དུ་སློབ་སྦྱོང་ཆེད་བཏང་ཡོད་པ་མ་ཟད། མ་འོངས་པར་མི་ཚེའི་ནང་ངལ་རྩོལ་ཆེ་བའི་དཀའ་ངལ་མྱོང་མི་དགོས་པའི་ཆེད་རེ་བ་དང་འགྲོ་སོང་འཕར་མ་བཏང་ནས་ང་ལ་ད་ལྟ་ཤེས་ཡོན་ཡག་པོ་ཐོབ་པའི་གོ་སྐབས་བྱུང་ལ། ཐ་ན་ཕ་མ་གཉིས་པོས་རང་ཉིད་ཀྱི་མི་ཚེའི་ནང་དཀའ་ངལ་མང་པོ་བསྐྱོན་ནས་དངུལ་དང་རྒྱུ་ནོར་ལོངས་སྤྱོད་ཅུང་ཟད་བསགས་པ་མཐའ་དག་ངའི་སློབ་སྦྱོང་དང་འཚར་ལོངས་བཟང་པོ་ཡོང་ཐབས་སུ་དམིགས་པ་གཙོ་བོ་ཡིན་པ་ངས་རྒྱུན་དུ་ཚོར་གྱི་འདུག ཨ་མས་ད་དུང་ང་ལ་རྒྱུན་དུ་བསླབ་བྱ་བསྐྱོན་གནང་བ་ནི་སློབ་སྦྱོང་ལ་འབད་བརྩོན་བྱ་རྒྱུ་དང་། མ་འོངས་པར་༸གོང་ས་སྐྱབས་མགོན་ཆེན་པོ་མཆོག་གི་བཀའ་བཞིན་ལས་ཀ་བསྒྲུབ་དགོས་རྒྱུ་གསུང་གི་ཡོད། ཁོང་གཉིས་ཀྱི་རྒྱུན་དུ་རྒྱལ་བ་རིན་པོ་ཆེ་དང་། བོད་མིའི་སྒྲིག་འཛུགས་གཉིས་ནི་སོ་སོའི་སྒེར་གྱི་ལས་དོན་དང་། རྒྱུ་ནོར་ལོངས་སྤྱོད་ལས་གལ་ཆེ་བ་འཛིན་གྱི་ཡོད་པ་ངས་རྒྱུན་དུ་མཐོང་སྣང་བྱུང་། ང་ཚོའི་ནང་ཆོས་ལས་བཤད་པའི་སེམས་པ་བཟང་པོ་བྱ་རྒྱུའི་བསམ་བློ་དེ་ཁོང་གཉིས་ལ་ཧ་ཅང་ཤུགས་ཆེན་པོ་ཡོད། གྲོང་པ་མཁྱིམ་ཚེས་དང་། མི་ངོ་མ་ཤེས་པ་སུ་ཡིན་ནའང་ཁོང་གཉིས་ཀྱི་སྙིང་རྗེ་ཆེན་པོས་ལྟ་སྐྱོང་གནང་གི་ཡོད། མདོར་ན་ཁོང་གཉིས་ནི་ངའི་དགེ་རྒན་ཞིག་དང་ཁྱད་པར་རྩ་བ་གཉིས་ནས་མེད། ཁོང་གཉིས་ཀྱི་བྱེད་སྟངས་བྱེད་ལུགས་ལ་བརྟེན་ནས་ངས་ཤེས་ཡོན་མང་པོ་ཤེས་རྒྱུའི་གོ་སྐབས་བྱུང་། ། དེས་ན་ང་ལྟ་བུར་མི་ཚེའི་མདུན་ལམ་ཡག་པོ་ཡོང་བ་ནི། དྲིན་ཅན་ཕ་མ་གཉིས་ཀྱི་བཀའ་དྲིན་ཡིན་ལ། ཁོང་གཉིས་ཀྱིས་ང་ཚོའི་ཆེད་དུ་སྐུ་ལས་ཚད་མེད་བསྐྱོན་པ་རྣམས་ང་ཚོ་སློབ་ཕྲུག་སོ་སོས་སེམས་ལ་གངས་རི་བཞིན་བརྟན་པོར་ཡིད་ལ་བཟུང་ནས། ང་ཚོས་རྗེས་སུ་དྲིན་ལན་འཇལ་དགོས་པ་ནི་གནད་འགག་ཡིན། ཕ་མ་ལོ་ན་རྒན་པོ་ཆགས་དུས་རྒན་གསོ་ཁང་ལྟ་བུར་སྐྱེལ་བ་ནི་ཧ་ཅང་ནོར་འཁྲུལ་ཡིན་ལ། ཁོང་རྣམས་ལ་བྱམས་སྐྱོང་དང་ལྟ་སྐྱོང་གནང་དགོས་པ་ནི་ཕྲུ་གུའི་ལས་འགན་གཡོལ་ཐབས་མེད་པ་ཞིག་ཡིན། འཇིག་རྟེན་འདིའི་ནང་ཕ་མའི་དྲིན་གྱི་འོག་མ་འཚོ་མཁན་སུ་ཡང་མེད་སྟབས་ང་ཚོས་ཕ་མ་གཉིས་པོའི་བཀའ་དྲིན་དྲན་ནས། མ་འོངས་པར་རང་གི་ཕྲུ་གུ་རྣམས་ལའང་བྱམས་བརྩེའི་ངང་སྐྱོང་དགོས་རྒྱུ་ནི་ཧ་ཅང་གལ་ཆེ་བ་ཡིན། དེ་ལྟར་བྱས་ན་ཆེ་ས་ནས་ང་ཚོས་འཛམ་བུ་གླིང་ཁྱོན་ཡོངས་ལ་ཞི་བདེ་དང་བདེ་སྐྱིད་བསྐྲུན་པའི་ས་བོན་ཡིན་པ་ནི་བརྗོད་མི་དགོས། མདོར་ན་ཕ་མ་ཁྱེད་གཉིས་སྐུ་ཚེ་ཡུན་རིང་བརྟན་ཅིང་། ནད་མེད་ཚེ་རིང་ཡོང་བའི་སྨོན་འདུན་དང་བཅས་སོ། །

བསྟན་འཛིན་ནོར་བུ། སཾ་བྷོ་ཊ་ཀོ་ལེ་གྷལ་ཉིན་སློབ། འཛིན་རིམ་བཅུ་པ། གནའ་སྔ་མོ་བོད་ཀྱི་ལྷོ་ཕྱོགས་སུ་བདེ་བ་ཞེས་པ་ལྷ་ཡུལ་དང་འདྲ་བའི་གྲོང་སྡེ་ཞིག་ཡོད། དེའི་མཐའ་སྐོར་ཡོངས་རྫོགས་གངས་རི་ཡིས་བསྐོར་བ་དང་ཡུལ་དེ་ལ་སྤངས་ལྗོངས་མཛེས་ཤིང་ས་རྣམས་གཙང་བ་སོགས་ཡིད་དུ་འོང་བའི་ས་ཆ་ཞིག་རེད། ཡུལ་དེ་ལ་སློབ་གྲྭ་གཅིག་ཡོད་པ་དང་སློབ་གྲྭ་དེའི་ནང་གི་འཛིན་རིམ་བཅུ་པའི་ནང་སློབ་མ་ཧ་ཅང་འཆམ་མཐུན་ཡོད་པའི་སློབ་ཕྲུག་གཉིས་ཡོད། གཅིག་གི་མིང་ལ་བཀྲ་ཤིས་ཟེར་བདང་གཞན་དེའི་མིང་ལ་ཀརྨ་ཟེར། སློབ་མ་ཀ་རྨ་ནི་རྒྱུན་གཏན་ནས་དཀའ་སྤྱད་སྙིང་རུས་བྱས་ནས་སློབ་སྦྱོང་ཧུར་ཐག་བྱེད་མཁན་ཞིག་རེད། བཀྲིས་ཡང་ཀརྨ་ལྟར་སློབ་སྦྱོང་ལ་འབད་བརྩོན་གནང་མཁན་ཞིག་རེད། ཡིན་ན་ཡང་ཁོང་ནི་ཆང་རག་དང་ཐ་མག་འཐེན་རྒྱུར་དགའ་བོ་ཡོད་ཙང་ཉེ་འགྲམ་གྱི་ཚོང་ཁང་དང་ངན་པ་ལག་འབྲེལ་བྱེད་ཀྱི་ཡོད། རིམ་བཞིན་བཀྲིས་ཀྱིས་ཆང་དང་ཐ་མག་ཚོད་མེད་འཐུང་བའི་གོམས་གཤིས་ངན་པ་ཞིག་རང་གི་རྒྱུད་ལ་གཏན་དུ་འཇགས་པ་རེད། དེའི་རྐྱེན་གྱིས་ཁོང་རང་གི་སློབ་སྦྱོང་ཐོག་རང་བཞིན་གྱི་ཉམས་རྒུད་་དང་འཐུས་ཤོར་སོང་བར་བརྟེན་ཀརྨ་ཡིས་དུས་རྟག་ཏུ་བསླབ་བྱ་མང་པོ་བརྒྱབས་ན་ཡང་ཕན་ཐོགས་གང་ཡང་བྱུང་གི་མེད། དུས་ཚོད་ནི་འགྱུར་བ་འགྲོ་བཞིན་གྲོགས་པོ་གཉིས་ཀྱི་འཆམ་མཐུན་ཡང་རྒྱང་རིང་དུ་ཕྱིན་པ་རེད།     ཉིན་ཞིག་ཀརྨ་སློབ་གྲྭ་ནས་ནང་དུ་ལོག་ཡོང་བའི་སྐབས་ཤིག་ལ་ལམ་གྱི་གཡས་སུ་མི་མང་པོས་ཆང་འཐུང་ཞོར་སྐད་ཅོར་རྒྱག་བཞིན་ཡོད་པ་ཞིག་མཐོང་བ་རེད། འོན་ཀྱང་། ཀ་རྨས་དེའི་ཕྱོགས་སུ་དོ་སྣང་སྤྲོད་རྒྱུ་ཕར་བཞག་མིག་གིས་ལྟ་ཙམ་ཡང་མ་བྱས་པར་ཤར་རྒྱག་འགྲོ་བའི་སྐབས། གློ་བུར་ཐོག་རྒྱག་ཅིག་ཏུ་དེ་སྔ་ནས་སྐད་ངོ་ཤེས་པའི་སྐད་མདངས་ཤིག་རྣ་བའི་ལམ་དུ་སིམ་སིམ་དུ་འཛུལ་འོང་བ་རེད། དེ་མ་ཐག་ཏུ་ཁོང་གི་རྒྱབ་ལ་ཕྱི་ལྟ་ཞིག་བྱེད་དུས་མི་ཚོགས་མང་པོའི་དཀྱིལ་ནས་ཁོང་གི་གྲོགས་པོ་བཀྲིས་མཐོང་བ་རེད། ཁོས་བཀྲིས་ཆང་རག་བཏུང་བ་མཐོང་དུས་རང་དབང་མེད་པར་མིག་ནས་མིག་ཆུ་ཤོར་ཏེ་ངོ་གདོང་ཡོངས་མིག་ཆུས་བརླན། སྐབས་དེར་ཀ་རྨ་ཁོང་ཁྲོ་མེ་ལྕེ་ལྟར་འབར་ཏེ་གློ་བུར་དུ་རྒྱུག་ཕྱིན་ནས་བཀྲིས་ཀྱི་སྟེང་མཆོངས་ནས་ཁོའི་གདོང་ལ་འགྲམ་ལྕགས་ཚ་བོ་ཞིག་བཞུས། གཡས་གཡོན་གྱི་མི་རྣམས་ཧང་སང་ཧོན་ཐོར་ནས་ཀརྨ་བཀག་འགོག་བྱས་ཀྱང་ཀརྨས་སྐད་ཤུགས་ཆེན་པོའི་ངང་བཀྲིས་ཆང་རག་འཐུང་མཚམས་བཞག་དགོས་ཟེར་བ་དང་། མིག་ནས་མིག་ཆུ་ཤོར་བ་མ་ཟད་གདོང་ཡང་དམར་པོར་གྱུར། ཡིན་ན་ཡང་བཀྲིས་ཀྱིས་གང་ཡང་མ་བཤད་པར་དེ་ནས་ཐོན།   དེ་ལྟར་རིམ་བཞིན་ཡིག་ཚད་གཏོང་བའི་དུས་ཤིག་ལ་སླེབས་པ་རེད། ཡིག་ཚད་ཀྱི་ཉིན་དེར་ཀརྨ་ཡིས་རྒྱུགས་སྤྲོད་བཏང་ནས་ནང་ལ་ལོག་འགྲོ་སྐབས། ཁོང་གི་འཛིན་གྲོགས་ཤིག་གིས་བཀྲིས་སྨན་ཁང་དུ་བསྡད་ཡོད་པའི་སྐོར་བཤད་པ་རེད། སྐད་ཆ་དེ་གོ་བ་དང་སེམས་ནང་བཤད་མི་ཤེས་པའི་ན་ཟུག་ཆེན་པོ་ཞིག་དང་ལྷན་དུ་བསམ་བློ་གཞན་གང་ཡང་མ་བཏང་བར་སྨན་ཁང་དུ་ཕྱིན། སྨན་ཁང་གི་རྟག་དཔྱད་ཁང་གི་སྒོ་འགྲམ་དུ་སླེབས་པ་དང་བཀྲིས་ཀྱི་ཕ་མ་གཉིས་ཤུམ་བཞིན་ཡོད་པ་མཐོང་བ་དང་ལམ་སང་ཁོང་གི་སེམས་པ་རྡོ་ལྗིད་པོ་ཞིག་གིས་གནོན་པ་དང་འདྲ་བར་སེམས་ལ་སྡུག་བསྔལ་ཚད་ལས་བརྒལ་བ་ཞིག་བྱུང་བ་རེད། དེ་ནས་སྨན་པ་ལགས་ཀྱིས་གསུངས་དོན་ལ། ཁོང་གིས་ཆང་རག་དང་ཐ་མག་ཚོད་མེད་བཏུང་ཙང་གཟུགས་པོའི་ནང་གི་དབང་པོ་ཡོངས་དང་། གློ་བ་ལ་གནོད་ཚབས་ཆེན་པོ་ཡོད་ཙང་སྐྱོབ་ཐབས་བྲལ་ཚར་འདུག དགོངས་པ་མ་ཚོམས་རོགས་ཞེས་བཞུས་སོང་། གནས་ཚུལ་དེ་ནི་ངས་མཐོང་གིན་མཐོང་གིན་བཀག་འགོག་ནན་པོ་མ་བྱུང་ཙང་ད་ལྟ་ཕམ་པོ་ཞེ་དྲག་བྱུང་བ་མ་ཟད་གནོང་འགྱོད་ཀྱང་ཆེན་པོ་ཞེ་དྲགས་བྱུང་སོང་། དེ་འདྲ་སོང་ཙང་། དེ་རིང་ངས་རྩོམ་ཡིག་འདི་བརྒྱུད་ནས་འཇིག་རྟེན་གྱི་སྐྱེས་པ་ཕོ་ཡོད ་ཚད་ལ་བཤད་སྙིང་འདོད་པ་གཅིག་ཡོད། དེ་ནི་དུས་ནམ་ཡང་ཆང་རག་དང་ཐ་མག་རིགས་ལ་ལག་པ་མ་འཆང་རོགས་གནང་ཞེས་འབོད་སྐུལ་དང་དྲན་གསོ་ཞུ་རྒྱུ་ཡིན་ནོ། །

སྐལ་བཟང་དབྱངས་སྐྱིད། སཾ་བྷོ་ཊ་གུ་རུ་པུ་ར་སློབ་གྲྭ འཛིན་གྲྭ་བཅུ་པ། བོད་གངས་ཅན་ལྗོངས་ཀྱི་ལྷ་གཅིག་ཕྱག་ན་པདྨོ་༸སྤྱི་ནོར་གོང་ས་༸སྐྱབས་མགོོན་ཆེན་པོ་མཆོག་ནི་སྤྱི་ལོ་༡༩༣༥ ཟླ་བ་༧ ཚེས་༦ ཉིན་སྐུ་འཁྲུངས་པ་དང་། ༸གོང་ས་མཆོག་སྐུ་ན་ཆུང་བའི་སྐབས་སུ་མཚན་ལ་ལྷ་མོ་དོན་གྲུབ་ཞུ་བ་རེད། ༸གོང་ས་མཆོག་ཁོང་དགུང་ལོ་༥ ལ་ཕེབས་སྐབས་སྐུ་གོང་མའི་ཡང་སྲིད་དུ་ངོས་འཛིན་ཞུས་པ་དང་ཁོང་ནི་བོད་ཀྱི་བླ་ན་མེད་པའི་དབུ་འཁྲིད་དང་། ཁོང་དགུང་ལོ་བཅུ་དྲུག་ནས་བཟུང་སྟེ་བོད་རྒྱལ་ཁབ་ཆེན་པོའི་ཆོས་སྲིད་གཉིས་ཀྱི་མཛད་འཕྲིན་ཕྱག་ཏུ་བཞེས་པ་རེད། བོད་ཁ་བ་ཅན་གྱི་རང་དབང་རང་བཙན་རྒྱ་ནག་དམར་པོས་ཕྲོགས་པའི་རྗེས་སུ་༸གོང་མཆོག་རྒྱ་གར་བཙན་བྱོལ་ཕེབས་ནས་རྒྱ་གར་གྱི་སྲིད་བློན་ནཱེ་རུ་མཆོག་དང་མཇལ་འཕྲད་དང་བཀའ་མོལ་གནང་སྟེ་བོད་མི་རྣམས་རྒྱ་གར་ནང་བཙན་བྱོལ་དུ་བཞུགས་བཅུག་པའི་རེ་འདུན་ཞུས་པ་བཞིན། བློན་ཆེན་ནཱེ་རུ་མཆོག་ནས་དེར་དགོངས་བཞེས་གནང་བ་རེད། དེ་ནས་བཟུང་༸མགོན་པོ་མཆོག་ནས་བོད་མི་སྐྱབས་བཅོལ་བ་ཚོ་ལ་གཞིས་ཆགས་མང་པོ་བཙུགས་པ་དང་གཞི་ཆགས་ནང་ལ་སྨན་ཁང་དང་། དགོན་པ་རྩ་ཆེན་པོ་མང་པོ་དེ་བཞིན་བཟོོ་གྲྭ་སོགས་གསར་པ་བཟོས་པ་རེད། ད་དུང་༸མགོན་པོ་མཆོག་ནས་བོད་མི་མང་གི་ཆེད་དུ་ཕྱི་རྒྱལ་ཁག་ལ་ཕེབས་ནས་བོད་མིའི་བདེན་དོན་དུ་འབྲེལ་བ་གནང་བ་མ་ཟད་སྐྱབས་བཅོལ་དུ་ཡོད་པའི་བོད་མི་ཚོའི་ཤེས་ཡོན་ཆེད་དུ་སྐུ་ལས་ཤིན་ཏུ་མང་པོ་བསྐྱོན་ཡོད། ཁོང་ནི་འཛམ་གླིང་ཡོངས་ལ་བཀའ་དྲིན་ཆེན་པོ་དང་ད་དུང་ཁོང་གིས་ད་ལྟའི་དུས་ཚོད་འདི་ལ་འཛམ་ཡོངས་ལ་ཞི་བདེ་ཡོང་ཐབས་གནང་གི་ཡོད། ཕྱི་ལོ་༡༩༨༩ ཟླ་༡༢ ཚེས་༡༠  ཉིན་ནོ་སྦེལ་ཞི་བདེའི་གཟེངས་རྟགས་ཡང་ཁོང་ལ་ཕུལ་གནང་བ་རེད། དེ་བཞིན་དུ་རིམ་པས་གཟེངས་རྟགས་འདྲ་མིན་ཧ་ཅང་མང་པོ་ཚོགས་པ་མི་འདྲ་བ་དང་རྒྱལ་ཁབ་མི་འདྲ་བ་མང་པོས་རིམ་པས་ཕུལ་བ་རྣམས་ད་ལྟའང་དངོས་སུ་དྲ་ལམ་ཁག་ནས་མཇལ་ཐུབ་ཀྱི་ཡོད། མགོན་པོ་མཆོག་གི་སྐུ་ལས་འདི་འདྲ་མང་པོ་གནང་སྐབས་བོད་མི་མང་ཆེ་བ་སེམས་སྐྱོ་ཡི་ཡོད་པ་དང་། ད་དུང་མི་མང་ཆེ་བས་ཁོང་ལ་དགའ་མོས་གནང་གི་ཡོད། ༸གོང་ས་མཆོག་ནི་བོད་མི་མང་གི་དབུ་ཁྲིད་དང་སློབ་ཕྲུག་རྣམས་པ་ལ་སློབ་སྦྱོང་དང་ལམ་སྟོན་གནང་མཁན་གྱི་མི་སྣ་གཙོ་བོ་དེ་ཡིན། ཁོང་གིས་ག་དུས་ཡིན་ནའང་བོད་པ་གཅིག་པུའི་ཆེད་དུ་སྐུ་ལས་མ་བསྐྱོན་པར་འཛམ་གླིང་སྤྱི་ཡོངས་ཀྱི་ཆེད་དུ་སྐུ་ལས་གནང་གི་ཡོད་པས། ད་དུང་ཁོང་གིས་སློབ་ཕྲུག་ཚོས་སློབ་སྦྱོང་ཡག་པོ་བྱེད་དགོས་པ་དང་། མཐར་བོད་རང་བཙན་ལེན་ཐུབ་པ་བྱེད་དགོས་པའི་བསླབ་བྱ་ཡང་ཡང་གསུང་གནང་གི་ཡོད། འཛམ་གླིང་རྒྱལ་ཁབ་ཚང་མས་ཁོང་གི་བཀའ་སློབ་ཉན་རྒྱུའི་ཆེད་དུ་ཁོང་ས་ཕྱོགས་གང་དུ་ཕེབས་ཀྱང་དེར་བཀའ་སློབ་ཉན་ཐུབ་པ་བྱེད་ཀྱི་ཡོད། ང་རང་གིས་ག་དུས་ཡིན་ནའང་༸སྐྱབས་མགོན་ཡིད་བཞིན་ནོར་བུ་མཆོག་སྐུ་ཚེ་ཡུན་རིང་བརྟན་པའི་སྨོན་ལམ་བཏབ་པ་དང་བོད་རང་བཙན་མྱུར་དུ་ཐོབ་པ་ཤོག་ཞེས་སྐད་ཤུགས་ཆེན་པོས་འབོད་བཞིན་ཡོད། ད་ལྟ་བར་ཡིད་བཞིན་ནོར་བུ་མཆོག་ནས་བོད་པ་གཅིག་པོ་མིན་པར་འཛམ་གླིང་གི་ས་ཆ་གང་སར་བྱམས་པ་དང་སྙིང་རྗེ། བརྩེ་བ་ཟེར་བ་འདི་འབུ་ཆུང་ཆུང་གཅིག་ལ་ཡིན་ནའང་སྤྲད་དགོས་པ་དང་རང་གིས་ཡང་ཉམས་ལེན་བྱས་པ་ཡིན་ན་སོ་སོའི་འཕྲོད་བསྟེན་དང་ཁོང་ཁྲོ་མི་བཟའ་བ་ལ་ཕན་ཐོགས་ཆེན་པོ་ཡོད་པ་གསུངས་ཀྱི་ཡོད། ཁོང་གི་དེང་སང་འཛམ་གླིང་མི་རྣམས་ལ་བཟང་སྤྱོད་འདི་གལ་ཆེན་པོ་ཡིན་མ་ཟད་མི་ཚང་མས་བཟང་པོའི་སྤྱོད་པ་གཅིག་འཁྱེར་བ་ཡིན་ན་འཛམ་གླིང་འདི་ཡི་ནང་དུ་ཞི་བདེ་དང་བདེ་སྐྱིད་ཡོང་ཐུབ་ཀྱི་རེད་གསུང་གི་ཡོད། ང་ཚོ་བོད་མི་ཚོས་ཁོང་གི་གསུངས་པའི་བཀའ་སློབ་དེ་དག་ཉན་དུས་སེམས་ནང་ཞི་བདེ་ཡོང་གི་ཡོད་རེད། ཁོང་གི་གསུངས་པའི་བཀའ་སློབ་ཉན་མཁན་ནི་འཛམ་གླིང་ནང་དུ་མི་མཁས་དབང་དང་སྙན་གྲགས་ཅན་མང་པོ་ཡོད་རེད། ང་ཚོ་བོད་མི་ཚོས་ཁོང་གི་གསུངས་པའི་བཀའ་སློབ་ཆ་ཚང་ལ་དོ་སྣང་བྱེད་མ་ཐུབ་ནའང་ཕན་ཐོགས་པའི་ལས་ཀ་ཆུང་ཆུང་རེ་བྱས་ནས་༸གོང་ས་མཆོག་གི་བཀའ་སྒྲུབ་ཐུབ་པ་བྱེད་དགོས་རེད། མཐའ་མ་དེར་ ༸གོང་ས་མཆོག་ལ་བཀའ་དྲིན་ཆེ་ཞེས་ཞུ་རྒྱུ་ཡིན། །