བསྟན་འཛིན་རང་གྲོལ།་ འཛིན་གྲྭ་དགུ་པ། གོ་པལ་པུར་བོད་ཁྱིམ། སྨྲ་ཤེས་ཤིང་དོན་གོ་བ་འགྲོ་བ་མིའི་རིགས་ཆེ་ཆུང་ཡོད་དོ་ཅོག་ལ་སོ་སོར་འཚམ་པའི་མ་འོངས་པའི་དམིགས་ཡུལ་ཞིག་ཡོད་པ་ཏན་ཏན་རེད། དེ་ནི་ངས་ཐག་བཅད་ནས་བརྗོད་ཐུབ། མཐོ་རྒྱལ་པོའི་སྲས་དང་། དམའ་དབུལ་པོའི་བུ་ཕྲུག་ཕོ་མོ་གཉིས་ཀར་སོ་སོའི་ནུས་པ་དང་མཐུན་པའི་དམིགས་ཡུལ་མི་འདྲ་ཙམ་རེ་ཡོད། ང་རང་སྒེར་ལ་མཚོན་པ་ཡིན་ན། དམིགས་ཡུལ་ཆེན་པོ་དེ་འདྲ་མེད་ཀྱང་སོ་སོའི་བྱ་འདོད་པའི་དམིགས་ཡུལ་ཞིག་ཡོད་ཅིང་། དམིགས་ཡུལ་དེ་བསྒྲུབ་པར་སོ་སོས་དཀའ་ལས་ག་ཚོད་རྒྱག་དགོས་ཀྱང་འབད་བརྩོན་བྱས་ནས་དམིགས་ཡུལ་དེ་སྒྲུབ་པ་བྱ་བརྩིས་ཡོད། གལ་སྲིད་མི་གཅིག་ལ་དམིགས་ཡུལ་མེད་པ་ཡིན་ན། མི་དེ་ནི་འཛམ་གླིང་འདིའི་སྟེང་འཚོ་ཐུབ་ཙམ་ལས་དམིགས་བསལ་གྱིས་དགེ་སྐྱོན་གང་ཡང་མེད་པས། དེ་ནི་ཁྱད་ཆོས་གང་ཡང་མེད་པའི་ཅ་དགོས་ཤིག་དང་འདྲ། སོ་སོར་དམིགས་ཡུལ་ཞིག་ཡོད་རྒྱུ་གལ་འགངས་ཆེ་ལ། དེ་ལས་གལ་ཆེ་བ་ནི་དམིགས་ཡུལ་དེ་བསྒྲུབ་པར་དཀའ་སྡུག་གང་བྱུང་ཡང་སེམས་ཤུགས་ཆགས་རྒྱུ་མེད། དཔེར་ན། ང་ཚོས་བོད་ཡིག་སློབ་ཚན་ནང་སྦྱངས་བའི་“ཕོ་རོག་གིས་ཆུ་འཐུང་བ་” ཞེས་པ་ལྟ་བུ་རེད། དེ་རིང་ཁ་སང་གི་མིའི་སྤྱི་ཚོགས་ནང་མི་གཅིག་གིས་དམིགས་ཡུལ་གཅིག་ཁོ་ནར་དོ་ནན་པོ་བྱེད་མི་ཐུབ་པར་དམིགས་ཡུལ་གསུམ་བཞི་ཙམ་ཉར་གྱི་འདུག དེ་ཡང་ཐབས་ཤེས་ཡག་པོ་ཞིག་ཡིན་པ་འདྲ་ཡང་ང་ཚོ་བོད་མིའི་གཏམ་དཔེར་“བློ་རྩེ་གཉིས་ཀྱིས་དོན་མི་སྒྲུབ། ཁབ་རྩེ་གཉིས་ཀྱིས་ཚེམ་བུ་མི་ཡོང་།” ཟེར་བ་ལྟར་དམིགས་ཡུལ་ངོ་མ་དེའི་ཐོག་རིག་པ་བསྒྲིམ་ནས་བསྒྲུབ་རྒྱུ་དཀའ། རྒྱུ་མཚན་ནི་ལས་སླ་བོ་རེད། ཁྱོད་ཀྱིས་ནུས་ཤུགས་གཅིག་ཏུ་སྤུང་མི་ཐུབ་པར་གས་ཡོད་མ་རེད་དམིགས་ཡུལ་འདི་མ་སྒྲུབ་ནའང་ང་ལ་དམིགས་ཡུལ་གཞན་དེ་ཡོད་བསམ་ནས་དུས་ཚོད་རྫོགས་འགྲོ་གི་རེད། ངའི་དམིགས་ཡུལ་ནི་བོད་ཡིག་དགེ་རྒན་ཞིག་ཡིན་པ་གང་ཞིག་ལ་བོད་ཡིག་རྩོམ་པ་པོ་དང་། ཨིན་སྒྲུང་བོད་བསྒྱུར་བ་ཞིག་བྱ་རྩིས་ཡོད། ངས་དམིགས་ཡུལ་དེ་འདྲ་ཞིག་བྱ་དགོས་པའི་རྒྱུ་མཚན་ནི། ངས་བསམ་བློ་དྲུག་གསུམ་བཅོ་བརྒྱད་བཏང་དུས་དམིགས་ཡུལ་དེ་ངའི་མི་ཚེ་དང་འབྲེལ་བ་དམ་ཟབ་འདུག་ལ། བོད་ཀྱི་སྐད་དང་རིག་གཞུང་སྲུང་སྐྱོབས་ཆེད་དུ་བོད་ཡིག་དགེ་རྒན་དང་། དེའི་སྒང་ལ་བོད་དབྱིན་གཉིས་ཀའི་ཐོག་བསྒྱུར་རྩོམ་བྲིས་ན་དམིགས་ཡུལ་ངོ་མ་དེའི་ཐོག་ཕན་ཐོགས་ཆེན་པོ་ཡོད་པ་ཤེས་བྱུང་། ད་ལྟ་ང་རང་སློབ་མ་ཞིག་ཡིན་པ་གང་ཞིག་ལ་འཛིན་རིམ་དགུ་བ་ཡིན་པས་ངའི་དམིགས་ཡུལ་དེ་གཏན་འཁེལ་བ་ཞིག་ཡོང་མི་སྲིད་སྙམས། འོན་ཀྱང་། དམིགས་ཡུལ་དེའི་ཆེད་ངས་སོ་སོའི་དམ་བཅའ་ཞིག་འཛིན་བཞིན་ཡོད། དམ་བཅའ་དེ་ཡང་དམིགས་ཡུལ་དེ་བསྒྲུབ་ཆེད་དུ་ཡིན། གལ་སྲིད་ངས་དམ་བཅའ་ཞིག་མ་བཟུང་ན་ངའི་དམིགས་ཡུལ་དེ་ཡང་འགྱུར་བ་འགྲོ་སྲིད། གལ་སྲིད། ཁྱོད་ཚོས་ངས་དམིགས་ཡུལ་གཉིས་གསུམ་ཉར་འདུག་བསམ་སྲིད་ཀྱང་། དངོས་གནས་བྱས་ན་ང་ལ་དམིགས་ཡུལ་གཅིག་རང་ཡོད། དེ་ནི་དགེ་རྒན་བྱ་རྒྱུ་དེ་རེད། ཡིན་ཡང་ང་རང་དགེ་རྒན་ཞིག་བྱ་དགོས་སྙམ་དུས་མཉམ་དུ་རྩོམ་པ་པོ་བྱ་མི་ཆོག་ཟེར་མཁན་སུ་ཡང་མེད། དེ་ནི་ངས་དུས་ཚོད་སྟོང་པར་རྩོམ་དང་སྒྲུང་བྲིས་པ་སོགས་བྱས་ན་དགེ་རྒན་གྱི་ལས་ཀ་ལའང་མཉམ་དུ་ཕན་ཐོགས་དང་དགེ་མཚན་ཆེ་བ་ཡོད། “3 idiots” གླེན་པ་གསུམ་ཞེས་པའི་རྒྱ་གར་གློག་བརྙན་དེའི་ནང་ཧྥ་རན་ཞེས་པའི་བུ་དེ་སྐྱེས་དུས་ཁོང་གི་པཱ་ལགས་ཀྱིས་“ངའི་བུ་ཆེན་པོ་ཆགས་དུས་(engineering) བཟོ་སྐྲུན་རིག་གནས་པ་ཞིག་བྱ་དགོས་ཡོད།” ཅེས་རེ་བ་དང་དམིགས་ཡུལ་ཞིག་ཨུ་ཚུགས་གིས་བཅངས་ཡོད། འོན་ཀྱང་། རྗེས་སུ་ཧྥ་རན་གྱི་གྲོགས་པོ་རཱན་ཇུས་ཁོའི་པཱ་ལགས་ལ་འདི་འདྲ་ཞུས་ཡོད་“ཧྥ་རན་ནི་པར་རྒྱག་མཁས་པ་མ་ཟད། དེའི་ཐོག་དོ་སྣང་དང་དགའ་བོ་ཡང་བྱེད་ཀྱི་འདུག་པས། ཁྱོད་ཚོས་ཁོ་ལ་མི་དགའ་བ་དང་། འདོད་པ་མེད་པའི་ལས་ཀ་ཞིག་བྱེད་བཅུག་ན་དེ་ནི་ཁྱོད་ཚོས་ནོར་བ་རེད། དམིགས་ཡུལ་ཟེར་བ་དེ་མི་སོ་སོའི་སེམས་ནང་ཡོད་པ་དེ་ལས་མི་གཞན་གྱི་འདོད་པ་དང་སྟབས་བདེ་ཇུས། ད་དུང་བཙན་པོ་དབང་ཡོད་ཀྱིས་ལས་ཀ་འདི་བྱོས་་་་་་་འདི་མ་བྱེད་ཟེར་ན་མི་དེ་ལ་དམིགས་ཡུལ་གཅིག་ཡོད་པ་དེ་ཡང་རྩ་མེད་ཆགས་ཀྱི་རེད།” ཅེས་སེམས་བཟང་གིས་འགྲེལ་བཤད་བརྒྱབ་པ་རེད། སྐབས་དེ་དུས་ཧྥ་རན་གྱི་པཱ་ལགས་རླུང་ཟ་ཐག་ཆོད་ནས་ཁོ་ཚོ་གྲོགས་པོ་གསུམ་ལ་དགོང་མོའི་ཁ་ལག་ཀྱང་སྤྲད་མེད་པ་རེད། […]

བསྟན་འཛིན་བདེ་སྐྱིད། འཛིན་གྲྭ་བཅུ་གཉིས། སྦེལ་ཀོབ་སཾ་བྷོ་ཊ། དམིགས་ཡུལ་ཟེར་བ་དེ་འཛིན་དགོས་པ་ནི་ཧ་ཅང་གི་གལ་ཆེན་པོ་རེད། དམིགས་ཡུལ་བཟུང་བ་ཡིན་ན་ཁེ་བཟང་མ་གཏོགས་གྱོང་ཁྱོན་ནས་མེད།ཥ གལ་སྲིད་རང་ཉིད་ལ་དམིགས་ཡུལ་ཞིག་ཡོད་པ་ཡིན་ན་སོ་སོའི་མ་འོངས་མདུན་ལམ་དེ་ཤེས་ནས་དེ་སྒྲུབ་པའི་ཆེད་དུ་དཀའ་ལས་དང་འབད་བརྩོན་ཡང་བྱེད་ཐུབ་ཀྱི་རེད། དམིགས་ཡུལ་ཞེས་པ་དེ་ཆུང་དུས་ནས་འཛིན་ཐུབ་ན་ཡག་པོ་ཡོད། དམིགས་ཡུལ་དེ་ཆུང་དུས་ནས་འཛིན་མ་ཐུབ་པ་ཡིན་ན། རྗེས་སུ་སློབ་གྲྭ་ནས་ཐོན་པའི་སྐབས་སུ་སོ་སོས་གང་ཞིག་བྱེད་དགོས་མིན་ཧ་མ་གོ་བར་ལས་ཀ་གང་བྱུང་ཞིག་ནང་འཛུལ་ན་རྗེས་སུ་རང་ཉིད་ལ་ཧ་ཅང་གི་དཀའ་ལས་འཕྲད་སྲིད་པ་རེད། སོ་སོའི་མི་ཚེ་དེ་འཕྲོ་བརླག་འགྲོ་བ་དང་། སྤྱི་ཚོགས་ལ་གང་ཡང་ཕན་མི་ཐོགས་པ། མ་འོངས་པར་རང་དང་རང་ཉིད་ཀྱི་ཕྲུ་གུའི་ལྟོ་གོས་དང་འཚར་ལོངས་ཆེད་དུ་དངུལ་གསོག་མི་ཐུབ་པ་སོགས་ཀྱི་དཀའ་ངལ་ཆེན་པོ་འཕྲད་སྲིད་པ་རེད། ང་རང་ལ་ཆ་མཚོན་ན། ངའི་དམིགས་ཡུལ་ནི་ཨེམ་ཆི་ཡིན། ངའི་དམིགས་ཡུལ་འདི་ང་རང་གི་ངོས་ནས་བསམ་བློ་ཞེ་དྲག་བཏང་ནས་འཛིན་པ་ཡིན། དམིགས་ཡུལ་འདི་འཛིན་དགོས་དོན་ནི་སྤྱི་ཚོགས་ལ་ཞབས་ཕྱི་ཞུ་རྒྱུ་དང་། མི་གཞན་ཚོ་ལ་ཕན་ཐོགས་བྱེད་རྒྱུ། དེ་དང་མཉམ་དུ་ང་རང་ཡང་མི་གཞན་དང་མཉམ་དུ་མཐུན་པོ་བྱེད་སྟངས་ཤེས་པ་དང་ཉམས་མྱོང་གསར་པ་མང་པོ་ཤེས་པའི་ཆེད་དུ་ཡིན། ངའི་དམིགས་ཡུལ་འདིས་འགྲོ་བ་མི་གཅིག་པོར་མ་ཡིན་པར་སེམས་ཅན་ཐམས་ཅད་ལ་ཕན། ཨེམ་ཆི་བྱས་པ་ཡིན་ན་ཉེན་ཁ་ཡང་འབྱུང་སྲིད། དཔེར་ན་རང་གིས་མི་ཞིག་གི་སྲོག་སྐྱོབ་མ་ཐུབ་ན་སེམས་པ་སྐྱིད་པོ་མེད་པ་ཆགས་སྲིད། ཡིན་ན་ཡང་དེ་ལས་གལ་ཆེ་བ་དེ་ནི་མི་ཞིག་གི་སྲོག་བསྐྱབས་ནས་དགེ་བ་གསག་རྒྱུ་དེ་ཡིན། དེ་ལྟར་བྱེད་ཐུབ་ན་མི་ཚོས་ཀྱང་རང་ལ་ཆེ་མཐོང་དང་གུས་ཞབས་བྱེད་ཀྱི་རེད། ང་རང་གི་བསམ་པ་ལ་ཨེམ་ཆི་ཞིག་ཆགས་པར་ཚང་དགོས་པའི་ཆ་རྐྱེན་མང་པོ་ཡོད་པ་ལས་ང་རང་གིས་ཁ་ཤས་ཤིག་ཞུས་ན། ངང་རྒྱུད་རིང་པོ་དགོས་པ་དང་། སེམས་ཁུར་ཆེན་པོ་དགོས་པ། ཚ་གི་ཚི་གེ་མེད་པ། ནད་པ་རྣམས་ཀྱི་ཆེད་དུ་སེམས་ཁྲལ་ཡོད་མཁན། མི་དང་མཉམ་དུ་མཐུན་པོ་བྱེད་མཁན་ཞིག་དགོས། གལ་ཆེ་ཤོས་དེ་ནི་རང་ཉིད་ངོས་ནས་གང་ཐུབ་ཅི་ཐུབ་ཀྱིས་འབད་བརྩོན་བྱེད་མཁན་ཞིག་དགོས། ང་རང་གིས་དམིགས་ཡུལ་འདི་འགྲུབ་པའི་ཆེད་དུ་སློབ་སྦྱོང་ལ་དཀའ་ལས་བརྒྱབ་དང་རྒྱག་བཞིན་པ་ཡིན། དུས་རྒྱུན་དུ་ང་རང་གིས་ཨེམ་ཆི་དང་འབྲེལ་བའི་སྒྲུང་དེབ་ཀློག་པ་མ་ཟད་ཁ་པར་ནས་ཀྱང་གནས་ཚུལ་མཁོ་སྒྲུབ་བྱེད་ཀྱི་ཡོད། མཐའ་མ་དེ་ལ་གོ་སྐབས་འདི་བརྒྱུད་ནས་སའི་གོ་ལ་འདིའི་ནང་དུ་ཡོད་པའི་སྨན་པ་དང་སྨན་རོགས་རྣམ་པ་ཚང་མ་ལ་ཐུགས་རྗེ་ཆེ་ཞུ་རྒྱུ་དང་། ང་རང་ཡང་མ་འོངས་པར་ཁོང་ཚོ་ནང་བཞིན་སེམས་ཅན་ལ་ཕན་ཐོགས་བྱེད་ཐུབ་པའི་ཨེམ་ཆི་ཞིག་ཏུ་འགྱུར་བའི་རེ་སྨོན་ཡོད།

བསོད་ནམས་ལྷ་མོ། འཛིན་གྲྭ་བཅུ་གཉིས། མོན་གྷོ་སམ་བྷོ་ཊ་གཏན་ཉིན་སློབ་གྲྭ། དམིགས་ཡུལ་ཅེས་པའི་ཚིག་འདི་ནི་ཚིག་འབྲུ་དམིགས་པ་དང་ཡུལ་ཅེས་ལས་གྲུབ་པ་ཡིན་ལ། དམིགས་པ་ཅེས་པ་ན་སེམས་གཏོད་པ་དང་། སེམས་པའམ་སྒོམ་པ་ལ་གོ་བ་དང་། ཡུལ་ནི་ས་ཆའམ་ལུང་པ་ལ་གོ་བས་བསམ་བློ་གཏོང་སའི་གནས། ཡང་ན། བློས་ཆེད་དུ་དམིགས་པ་གཏད་པའམ་བློ་ཁ་ཕྱོགས་པའི་ཡུལ་ལ་དམིགས་ཡུལ་ཅེས་བྱ། གོ་ལ་འདིར་འཚོ་བཞིན་པའི་མི་འབོར་ས་ཡ་མང་པོ་ཡོད་པ་ཚང་མ་ཐུན་མོང་མ་ཡིན་པའི་ཁྱད་ཆོས་རེ་ཡོད་པ་ལྟར། ཚང་མའི་མ་འོངས་པའི་དམིགས་ཡུལ་ཡང་དེ་ལྟར་མི་མཚུངས་ཡིན། དེའི་དགོས་པ་ནི་ཚང་མའི་འཚར་ལོངས་བྱེད་སའི་ཁོར་ཡུག་དང་། དེ་བཞིན་རང་རང་སོ་སོའི་ཉེ་ཁོར་ལ་ཡོད་པའི་རྒན་རབས་དང་། ཡང་ན་ན་ཚོད་མཉམ་པའི་གྲོགས་ཕོ་མོ་འདྲ་མིན་ལ་དམིགས་དཔེ་བལྟས་ཏེ་རང་སོ་སོའི་མ་འོངས་མི་ཚེའི་དམིགས་ཡུལ་འཛིན་གྱི་ཡོད་པ་ནི་སྐྱེ་བོ་ཚང་མའི་གནས་སྟངས་གཅིག་མཚུངས་མིན་པའི་རྐྱེན་གྱིས་ཡིན་ནོ།། དམིགས་ཡུལ་མེད་པའི་མི་བུ་ནི་སྐྱ་གཤོག་མེད་པའི་གྲུ་དང་གཅིག་མཚུངས་ཡིན་ལ། དེའི་རིགས་ལ་དོན་དང་ལྡན་པའི་མི་ཚེ་ཞིག་ཡོང་རྒྱུ་ཧ་ཅང་ཁག་པོ་རེད། གལ་ཏེ་རང་ལ་དམིགས་ཡུལ་ཞིག་ལྡན་ན་རང་སོ་སོའི་དམིགས་ཡུལ་དེ་བསྒྲུབ་པའི་ཆེད་འབད་བརྩོན་དང་ལྷན་དུ་དཀའ་སྡུག་ཀྱང་མང་པོ་མྱོང་དགོས་པས་རང་ཉིད་ལ་ཉམས་མྱོང་མང་པོ་ཐོབ་སྟེ་རིམ་པས་ཡར་རྒྱས་ལ་སྐུལ་འདེད་གཏོང་བ་དང་། དམིགས་ཡུལ་གྱི་སླད་ཉིན་མཚན་མེད་པར་དཀའ་སྤྱད་སྙཱིང་རུས་ཀྱིས་སློབ་སྦྱོང་བྱས་ཏེ་རང་ཉིད་ཤེས་ཡོན་དང་གོ་རྟོགས་ཅན་གྱི་མི་ཞིག་ཏུ་འགྱུར་ངེས། དམིགས་ཡུལ་མེད་པའི་མི་ཞིག་ལ་མཚོན་ན་མི་དེས་ལས་དོན་ཇི་འདྲ་སྒྲུབ་ཀྱང་འདོོད་པ་མེད་པ་དང་། ཉོབ་སྣང་ངང་སེམས་པ་མ་སྐྱིད་པ་བཅས་ཀྱི་ཤུགས་རྐྱེན་གྱིས་ལས་དེ་དོན་དང་ལྡན་པའི་ངང་བསྒྲུབ་མི་ཐུབ། དེ་བཞིན་མི་དེ་ཚོས་རང་གི་ཉེ་འཁོར་གྱི་མི་དང་ཆེ་སར་སྤྱི་ཚོགས་ཁྱོན་ཡོངས་ལ་ཤུགས་རྐྱེན་ངན་པ་སྤྲད་ཀྱི་རེད། དམིགས་ཡུལ་ལྡན་པའི་མི་ཞིག་དང་དམིགས་ཡུལ་མེད་པ་ཞིག་གི་བར་ཁྱད་པར་ནི། དམིགས་ཡུལ་ལྡན་པ་ཞིག་གི་དུས་ཚོད་དང་རང་ངོས་སྒྲིག་ལམ་གལ་འགངས་ཆེན་པོ་ཡིན་པ་ཤེས་པ་གང་ཞིག་ལ། དུས་རྒྱུན་དུ་དུས་ཚོད་སྟངས་འཛིན་གང་གཟབ་ཀྱིས་བྱེད་ཀྱི་རེད། དེར་བརྟེན་དམིགས་ཡུལ་འཛིན་རྒྱུ་ནི་མི་ཚེ་དོན་དང་ལྡན་པ་ཞིག་ཏུ་འགྱུར་རྒྱུའི་ཆ་ཤས་གལ་གནད་ཆེན་པོ་ཞིག་ཡིན། གོང་བརྗོད་ལྟར་མི་ཞིག་གིས་དམིགས་ཡུལ་འཛིན་སྐབས་རང་གི་ཁོར་ཡུག་ལ་ཡོད་པའི་མི་རྣམས་ཀྱིས་ཤུགས་རྐྱེན་བཟང་ངན་སྤྲད་ཀྱི་ཡོད། དེ་བཞིན་རང་གི་དགའ་ཕྱོགས། ཡང་ན། དབྱིངས་གང་གི་ཐོག་ཡོད་པ་ངོས་བཟུང་སྟེ་དམིགས་ཡུལ་གཟུང་དགོས། ཅི་སྟེ་རང་གི་འདོད་པ་མེད་བཞིན་དུ་སྤྱི་ཚོགས་དང་རྒན་པ། རང་གི་གྲོགས་པོ་གྲོགས་མོའི་འདོད་པ་བཞིན་དུ་དམིགས་ཡུལ་བཟུང་ན་མ་འོངས་པར་སོ་སོ་ལས་དོན་གང་ཞིག་གི་ཐོག་སླེབས་ཀྱང་སེམས་མ་སྐྱིད་པ་དང་སྔར་རང་གི་འདོད་པ་བཞིན་དམིགས་ཡུལ་མ་བཟུང་བས་བློ་འགྱོད་ཆེན་པོ་ཡོང་བའི་གནས་སྟངས་ཤིག་ཏུ་ལྷུང་སྲིད། དེ་འདྲ་སོང་ཙང་དམིགས་ཡུལ་འཛིན་སྐབས་དང་པོ་རང་གི་དབྱིངས་ཡང་ན་དགའ་ཕྱོགས་ངོས་འཛིན་དགོས། གཉིས་པ་རང་ཉིད་ཀྱི་འཇོན་ཐང་ཡང་ན་ནུས་ཚད་ངོས་འཛིན་བྱེད་དགོས། རང་ཉིད་ཀྱི་ནུས་ཚད་དང་མཉམ་པའི་དམིགས་ཡུལ་ཞིག་བཟུང་དགོས། གསུམ་པ་རང་གི་བདམས་ཟིན་པའི་དམིགས་ཡུལ་དེའི་དགོས་པ་དང་རྒྱུ་མཚན་ཤེས་དགོས་པ་ཧ་ཅང་གི་གལ་ཆེ། གལ་སྲིད་རང་གི་དེ་མ་ཤེས་ན་མ་འོངས་པར་དམིགས་ཡུལ་དེ་གྲུབ་ཀྱང་འདོད་པ་ཁེངས་ངེས་ཀྱི་ཚོར་སྣང་ཐོབ་མི་སྲིད། བྱས་ཙང་རང་ཉིད་ལ་རན་པའི་དམིགས་ཡུལ་ཞིག་འཛིན་རྒྱུ་དེ་ཧ་ཅང་གི་གལ་འགངས་ཆེ། དམིགས་ཡུལ་བཟུང་པ་ཙམ་གྱི་མ་འགྲིག་པར་དམིགས་ཡུལ་དེའི་སླད་གདོང་ལེན་ཡང་བྱེད་དགོས། དེའི་ཆེད་རང་ཉིད་རྒྱུན་དུ་ནས་ཧུར་པོ་དང་གཟུགས་གཞི་བདེ་ཐང་དགོས་པ་དེ་གལ་ཆེན་པོ་རེད། རང་ཉིད་གཟུགས་པོ་བདེ་ཐང་མེད་ན་བྱེད་དགོས་པའི་ལས་དོན་རྣམས་བསྒྲུབ་མི་ཐུབ་པའི་དཀའ་ངལ་ཆེན་པོ་འཕྲད་སྲིད། དེ་དང་ལྷན་དུ་ཉིན་འགྱངས་ཞག་འགྱངས་བྱེད་པའི་གོམས་གཤིས་དེ་ངེས་པར་དུ་སྤོང་དགོས། ཚང་མས་མཁྱེན་གསལ་ལྟར་དུས་ཚོད་རྒྱུག་ཆུ་ལྟར་འགྲོ་ཡི་ཡོད་པས་དུས་ཚོད་དམ་འཛིན་བྱ་རྒྱུ་དེ་ཧ་ཅང་གིས་གལ་ཆེན་པོ་རེད། ཉིན་འགའ་ཡི་སྙིང་རུས་ཧུར་ཐག་གིས་དམིགས་ཡུལ་འགྲུབ་རྒྱུ་མ་རེད། དེའི་ཆེད་དུ་རང་ཉིད་ནས་ཉིན་ལྟར་འགྱུར་བ་མེད་པར་འབད་བརྩོན་ཧུར་ཐག་བྱེད་དགོས། དམིགས་ཡུལ་ཞིག་འགྲུབ་པའི་ལམ་ཕྱོགས་ཏུ་དཀའ་ངལ་དང་བར་ཆད་འཕྲད་ངེས་ཡིན་པས། དེའི་སྐབས་སོ་སོ་སེམས་ཤུགས་མི་ཆགས་པར་དཀའ་ངལ་དེ་རྣམས་མི་ཚེའི་སློབ་ཚན་ལྟ་བུ་ལེན་དགོས། གཙོ་བོ་རང་ཉིད་རང་ལ་ཡིད་ཆེས་དང་གདེང་ཚོད་དགོས་པ་དེ་གལ་ཆེ་ཤོས་ཡིན། ང་རང་ལ་མཚོན་ན་ངའི་མ་འོངས་པའི་དམིགས་ཡུལ་ནི་ངའི་དགའ་ཕྱོགས་ཀྱི་སློབ་ཚན་དང་རན་པ་ཞིག་རེད། དེ་ཡང་གུས་མོ་ང་རང་གི་མ་འོངས་པའི་དམིགས་ཡུལ་ནི་སྨན་གྱི་ཐོག་སློབ་སྦྱོང་བྱས་སྟེ་སྨན་པ་ཞིག་ཆགས་རྒྱུ་དེ་ཡིན། ཆུང་བྱིས་པའི་དུས་ནས་བཟུང་ངས་སྨན་ཁང་དུ་ཡོད་པའི་སྨན་པ་རྣམས་གཟི་བརྗིད་ཅན་ཞིག་ཏུ་མཐོང་བ་དང་། ཁོ་ཚོས་ནད་པ་རྣམས་ལ་སྨན་བཅོས་བྱེད་པ་དེ་ཧ་ཅང་གི་ལས་བཟང་པོ་ཞིག་ཡིན་པ་ཚོར་གྱི་ཡོད། མི་ཚོས་རང་གི་འཕྲོད་བསྟེན་དང་བདེ་ཐང་ཆེད་སྨན་པ་ལ་བསྟེན་པས་སྨན་པ་ནི་སྤྱི་ཚོགས་ཤིག་གི་ཆ་ཤས་གལ་ཆེན་པོ་ཞིག་ཡིན། དེ་མིན་ང་རང་མིའི་གཟུགས་ཕུང་མ་ལག་འགྲུབ་ཚུལ་ཐོག་སློབ་སྦྱོང་བྱ་རྒྱུར་དགའ་མོས་ཆེན་པོ་ཡོད། གཙོ་བོ་རང་གི་ལས་གང་འདྲ་ཞིག་བྱས་ཀྱང་འཕྲོད་བསྟེན་མེད་ན་མེད་ཐབས་ཡིན་པས་སྨན་པའི་ལས་དེ་ཧ་ཅང་གི་བཟང་པོ་ཞིག་ཡིན་པ་ཚོར་སོང་། ངས་གོང་ལ་ཞུས་པའི་དམིགས་ཡུལ་དེ་འགྲུབ་པའི་ཐབས་ལམ་རྣམས་ང་རང་གིས་ཉིན་ལྟར་ལག་ལེན་བགྱིས་སྟེ་རང་གི་དམིགས་ཡུལ་དེ་དངོས་སུ་འགྲུབ་པའི་ཆེད་འབད་བརྩོན་བྱེད་ཀྱི་ཡོད། […]

བསྟན་འཛིན་ལྷ་མོ། འཛིན་རིམ་བཅུ་པ། བདེ་སླར་སམ་བྷོ་ཊ་སི་ཝི་པི་ཉིན་སློབ། འཛམ་གླིང་ནང་མི་འདྲ་མིན་སྣ་ཚོགས་ཡོད། ཁ་ཤས་མི་ཚེ་སྐྱིད་པོ་དང་ཁ་ཤས་མི་ཚེ་སྡུག་པོ་སྐྱེལ་གྱི་ཡོད། ཡིན་ཡང་ཚང་མ་མ་ཤི་བར་དུ་མི་ཚེ་སྐྱེལ་དགོས་པ་གཅིག་པ་རེད། མི་ཚེའི་དམིགས་ཡུལ་ཡོད་ན་རེད་མེད་ན་རེད། མི་ཚང་མ་མི་ཚེ་སྐྱིད་པོ་ཞིག་སྐྱེལ་འདོད་ཡོད། ཡིན་ཡང་མི་སོ་སོའི་བསོད་ནམས་དང་། ལས། རྣམ་དཔྱོད། འཇོན་ཐང་སོགས་འདྲ་མིན་ལ་བརྟེན་ནས་མི་ཚེ་ཡང་འདྲ་མིན་སྣ་ཚོགས་སྐྱེལ་གྱི་ཡོད། སོ་སོའི་བསམ་བློ་ནང་བཞིན་མི་ཚེ་སྐྱིད་པོ་དང་ཡག་པོ་ཡོང་ཐུབ་ཀྱི་མེད། དེ་གང་ལ་རག་ལས་པ་རེད་དམ། དེ་ག་ནང་བཞིན་མི་ཚེ་ནང་དམིགས་ཡུལ་ཡོད་མཁན་ཡང་ཡོད་ལ་མེད་མཁན་ཡང་མང་པོ་ཡོད། དམིགས་ཡུལ་འཁྱེར་སྟངས་ལའང་རིགས་འདྲ་མིན་སྣ་ཚོགས་ཡོད། དམིགས་ཡུལ་ཁ་ཤས་དངོས་གནས་རེད། དམིགས་ཡུལ་ཁ་ཤས་རྫུན་མ་རེད། དམིགས་ཡུལ་ཁ་ཤས་སོ་སོའི་སེམས་གཏིང་ནས་ཡོང་བ་རེད། དམིག་ཡུལ་ཁ་ཤས་གཞན་ལ་ལྟ་ནས་ཡོང་བ་རེད། དམིག་ཡུལ་ཁ་ཤས་གཞན་གྱིས་བཟོས་པ་རེད། དམིགས་ཡུལ་ཁ་ཤས་རང་བཞིན་གྱིས་བྱུང་བ་རེད། དམིགས་ཡུལ་ཁ་ཤས་ལས་ཀྱིས་བཟོས་པ་རེད། དམིགས་ཡུལ་ཁ་ཤས་གནས་སྟངས་ཀྱིས་བཟོས་པ་རེད། ཡིན་ན་ཡང་དམིགས་ཡུལ་ཡོད་པ་དང་མེད་པ་གཉིས་ལ་ཁྱད་པར་ཆེན་པོ་ཡོད། དམིགས་ཡུལ་ཡོད་མཁན་ཚོ་ལ་མི་ཚེ་གོ་རིམ་དང་ལྡན་པ་དང་སྒྲིག་འཛུགས་འདྲ་པོ་ཡོད་པ་རེད། བུ་མོ་ང་རང་མ་འོངས་པར་ཕྱི་རྒྱལ་ལ་འགྲོ་འདོད་ཡོད། ཕྱི་རྒྱལ་ལ་འགྲོ་འདོད་པའི་རྒྱུ་མཚན་ནི། དེང་སང་བོད་པ་མང་ཆེ་བ་ཕྱི་རྒྱལ་ལ་འགྲོ་ཡ་བསམ་བློ་རང་གཏོང་གི་འདུག ཕ་མ་སོ་སོ་འགྲོ་མ་ཐུབ་ན་ཡང། སོ་སོའི་ཕྲུ་གུ་དེ་གཏོང་འདོད་བྱེད་ཀྱི་འདུག ང་ཚོའི་སློབ་གྲྭ་ནས་ལོ་རྟག་པར་ཕྲུ་གུ་གསུམ་བཞི་འགྲོ་གི་འདུག ད་དུང་འགྲོ་ཡི་ཡིན་ཟེར་མཁན་མང་པོ་ཡོད་རེད། ང་རང་ཡང་རྗེས་མ་ཨ་མེ་རི་ཀ་ལ་འགྲོ་འདོད་ཡོད། ངའི་ཨ་ཞང་ཨ་རི་ལ་ཡོད་རེད། ཁོང་གིས་ང་རྗེས་མ་ཆེན་པོ་ཆགས་ན་རོགས་པ་བྱེད་ཀྱི་ཡིན་ལབ་སོང་། ཁོང་གིས་ང་རྒྱ་གར་ནང་སྡོད་དུས་བོད་ཡིག་ཡག་པོ་མ་སྦྱངས་ན་རྗེས་མ་ཨ་རི་ལ་སླེབས་ན་བོད་ཡིག་སྦྱངས་ཡ་ཡོད་མ་རེད་ལབ་སོང་། ང་རྗེས་མ་ཨ་རི་ལ་སླེབས་ན་དངུལ་མང་པོ་གསོག་གི་ཡིན། གང་ཡིན་ཟེར་ན། དེང་སང་དངུལ་མེད་ན་མི་ཚེ་ཡག་པོ་ཡོང་གི་མ་རེད། མི་ཚོས་ཀྱང་མཐོང་ཆུང་བྱེད་ཀྱི་རེད། རང་ལ་དཀའ་ངལ་འཕྲད་དུས་དངུལ་མེད་ན་དཀའ་ལས་ཁག་པོ་རེད། གལ་སྲིད་ང་ལ་དངུལ་མང་པོ་ཡོད་ན། ཕ་མ་དང་སྤུན་མཆེད་ཚོས་ཡག་པོ་བྱེད་ཀྱི་རེད། གྲོགས་པོ་ཡང་མང་པོ་རག་གི་རེད། དངུལ་མང་པོ་ཡོད་ན། ངས་མི་སྐྱོ་པོ་རྣམས་ལ་རོགས་པ་བྱེད་ཀྱི་ཡིན། བོད་པ་ཁ་ཤས་སྐྱོ་པོ་རེད། ཡིན་ཡང་བོད་པ་མང་ཆེ་བ་ཕྱུག་པོ་རེད། རྒྱ་གར་ནང་སྐྱོ་པོ་མང་པོ་ཡོད་རེད། ང་ཚོའི་གྲོང་སྡེའི་འགྲམ་ལ་རྒྱ་གར་གྲོང་གསེབ་ཆུང་ཆུང་ཞིག་ཡོད། ཁོང་ཚོ་མང་ཆེ་བ་སྐྱོ་པོ་རེད། ཁ་ལག་དང་དུག་ལོག་ཡག་པོ་མེད། ཁོང་ཚོ་ང་ཚོ་བོད་པའི་ཞིང་ཁ་དང་ནང་ལ་ལས་ཀ་བྱེད་ཀྱི་ཡོད་རེད།

བསོད་ནམས་ལྷ་མོ།་ འཛིན་གྲྭ་བཅུ་གཉིས། དྷོ་ལན་ཇི་སམ་བྷོ་ཊ་ཉིན་སློབ། འཇིག་རྟེན་འདིའི་ནང་མི་རིགས་འདྲ་མིན་ལས་གྲུབ་པའི་རྒྱལ་ཁབ་མི་འདྲ་བ་མང་པོ་ཡོད་པ་ལས། བོད་ནི་དེའི་ཁོངས་སུ་རྟོགས་པའི་ལོ་རྒྱུས་ཡོད་པའི་རྒྱལ་ཁབ་ཞིག་ཡིན། རྒྱལ་ཁབ་ཚང་མ་ལ་སོ་སོའི་སྐད་དང་རིག་གཞུང་གི་ཁྱད་ཆོས་དམིགས་བསལ་རེ་ཡོད།རྒྱལ་ཁབ་དང་མི་རིགས་གནས་མ་གནས་ནི་རྒྱལ་ཁབ་དེའི་ནང་གནས་སྡོད་བྱེད་མཁན་གྱི་མ་འོངས་ན་གཞོན་ཚོའི་ནུས་པ་མཉམ་སྤུངས་དང་ཤེས་ཡོན། སྐད་ཡིག་རིག་གཞུང་འཛིན་སྐྱོང་ཐུབ་མ་ཐུབ་ལ་རག་ལས་ཡོད། བོད་པའི་མི་རིགས་གནས་མི་གནས་ཀྱང་མི་རིགས་དེའི་གཞོན་སྐྱེས་ཚོས་མ་འོངས་མདུན་ལམ་གྱི་ཁ་ཕྱོགས་གང་འདྲ་ཞིག་ཡིན་པ་དང་དེའི་བརྒྱུད་ནས་རྒྱལ་ཁབ་དང་སྤྱི་ཚོགས་ལ་ནུས་པ་ཐོན་པའི་གྲུབ་འབྲས་ཕུལ་ཐུབ་མིན་ལ་རག་ལས་ཡོད་པས། བོད་རིགས་གཞོན་སྐྱེས་ཚོས་མ་འོངས་པའི་དམིགས་ཡུལ་འཛིན་སྟངས་ཡང་ན་མདུན་ལམ་བཟང་པོ་ཞིག་དགོས་པ་ངས་གལ་ཆེན་པོ་རེད་བསམ་གྱི་འདུག ང་ཡང་བོད་ཕྲུག་ཅིག་ཡིན་པས་ངའི་དམིགས་ཡུལ་ནི་བོད་ཕྲུག་ན་གཞོན་ཚོ་ལ་སོ་སོ་སློབ་སྦྱོང་ཐོན་རྗེས་མི་ཚེའི་ནང་མ་འོངས་མདུན་ལམ་གང་འདྲ་ཞིག་འཛིན་དགོས་མིན་དང་། དེ་དང་འབྲེལ་བའི་མི་ཚེའི་ནང་ལས་རིགས་གང་གི་ནང་ཞུགས་ན་ལེགས་མིན་སྐོར་ལམ་སྟོན་བྱེད་མཁན་གྱི་མཁས་ལས་པ་ཞིག་ཆགས་འདོད་ཡོད། ང་ཚོ་བོད་ཕྲུག་མང་པོ་ཞིག་གི་རང་གི་མ་འོངས་པའི་མདུན་ལམ་གང་འདྲ་ཞིག་འཛིན་དགོས་མིན་སྐོར་ལ་ངས་ལམ་སྟོན་ཡག་པོ་ཞིག་བྱེད་ཐུབ་པའི་ཡིད་ཆས་ཡོད། བོད་ཕྲུག་མང་པོའི་མི་ཚེ་མདུན་ལམ་ཡག་པོ་ཞིག་བཟོ་ཐུབ་ན་ངོ་མ་ངའི་མི་ཚེའི་དམིགས་ཡུལ་འགྲུབ་པར་ངོས་འཛིན་བྱེད་ཀྱི་ཡིན། བོད་པས་བོད་པར་རོགས་པ་བྱེད་ཐུབ་ན་ཡག་པོ་ཡོད། སྐབས་རེ་བོད་ཕྲུག་མང་པོ་ཞིག་རང་གི་མ་འོངས་དམིགས་ཡུལ་དང་མདུན་ལམ་གང་འདྲ་ཞིག་གི་འོག་ནས་འཚོ་བ་སྐྱེལ་དགོས་མིན་ཐེ་ཚོམ་ངང་སྡོད་ཀྱི་ཡོད། དེ་འདྲའི་སློབ་ཕྲུག་ལ་ལམ་སྟོན་བྱུང་ན་ངོ་མ་དགེ་བ་ཆེན་པོ་ཡོད། ང་ད་ལྟ་སློབ་སྦྱོང་བྱེད་བཞིན་པའི་སློབ་མ་ཡིན་དུས་ངའི་མ་འོངས་མདུན་ལམ་ནི་ངའི་ལག་ཏུ་ཡོད་པས་སོ་སོའི་དམིགས་ཡུལ་བཞིན་སློབ་སྦྱོང་གི་སྡེ་ཚན་འདེམས་དགོས། སློབ་ཚན་འདེམས་སྟངས་ཡག་པོ་དང་རན་པོ་མ་བྱུང་ན་མ་འོངས་དམིགས་ཡུལ་བཞིན་ལས་ཀ་བྱེད་རྒྱུ་ཁག་པོ་ཡོང་གི་རེད། དེང་སང་སྤྱི་ཚོགས་ནང་ཚན་རིག་དང་འཕྲུལ་ཆས་ཡར་རྒྱས་ཀྱི་ལས་ཀ་ལ་རིགས་མི་འདྲ་བ་མང་བས་སོ་སོས་གང་འདོད་པ་ལྟར་བྱེད་རྒྱུ་ཡོད་ཀྱང་སློབ་སྦྱོང་དང་ཤེས་ཚད། དེ་བཞིན་ལག་འཁྱེར་ཏག་ཏག་ཅིག་མེད་ན་ལས་ཀ་བྱེད་ནུས་ཀྱང་བྱེད་རྒྱུའི་གོ་སྐབས་ཐོབ་རྒྱུ་ཁག་པོ་ཡོད། ང་ཚོ་བཙན་བྱོལ་ནང་སླེབས་པའི་རྗེས་བོད་ཕྲུག་མང་པོ་ཞིག་སློབ་གྲྭ་ཆེ་ཆུང་མི་འདྲ་བ་མང་པོ་ནས་སློབ་ཐོན་ཐུབ་པ་བྱུང་ཡོད་ཀྱང་། དེ་ཚོའི་ནང་ནས་མདུན་ལམ་མཁས་ལས་པའི་ལས་ཀ་བྱེད་མཁན་གྱི་སློབ་མ་ལག་པའི་གྲངས་ཀ་ཙམ་ཞིག་ལས་མེད་སྟབས། ངས་མདུན་ལམ་མཁས་ལས་པའི་ལས་ཀ་ལ་བཞུགས་ཏེ་ང་འདྲ་བའི་སློབ་མ་མང་པོའི་མི་ཚེའི་ཁ་ཕྱོགས་འཛིན་སྟངས་ཐོག་སྤྱི་ཚོགས་དང་དུས་ཀྱི་དགོས་མཁོ་ལ་དམིགས་པའི་མ་འོངས་མདུན་ལམ་བཟང་པོ་འདེམས་ཐུབ་པའི་ལམ་སྟོན་བྱེད་རྒྱུ་ཡིན། དམིགས་ཡུལ་འདེམས་སྟངས་ནོར་བའི་རྐྱེན་གྱིས་སློབ་མ་འགའ་ཤས་རང་ཉིད་ཀྱི་བསམ་པ་བཞིན་ལས་ཀ་བྱེད་མ་ཐུབ་པར་མི་ཚེའི་ནང་སེམས་ཤུགས་ཆགས་ཏེ་ལམ་ལོག་པ་ལ་ཕྱིན་པ་ཡང་མང་པོ་མཐོང་མྱོང་ཡོད། རྒྱལ་ཁབ་དང་མི་རིགས་ལ་ཞབས་འདེགས་ཞུས་མ་ཐུབ་པ་ཡོང་སྲིད་ཀྱང་གལ་ཏེ་བོད་ཕྲུག་མང་པོས་རང་ཉིད་ཀྱི་མི་ཚེ་ཆུ་ཟོས་དང་འཕྲོ་བརླགས་ཕྱིན་སོང་ན་ངོ་མ་ཕངས་པོ་རེད། བོད་ཕྲུག་གཞོན་སྐྱེས་ང་ཚོ་ནི་རྒྱལ་ཁབ་ཀྱི་མ་འོངས་པའི་རེ་བ་དང་གཞི་རྩ་ཡིན་པ་ཚང་མས་ཤེས་གསལ་རེད། ང་ཚོ་རྒྱ་གར་ནང་བཙན་བྱོལ་ལ་གནས་ཡོད་པ་དེ་སེམས་སྐྱོ་དགོས་པ་ཞིག་མ་རེད། ཡིན་ནའང་། ཕྱི་ཡི་ལུང་པ་རུ་བཙན་བྱོལ་ལ་བསྡད་ནས་སློབ་སྦྱོང་ཡག་པོ་མི་བྱེད་པ་དང་དུས་ཚོད་ཆུད་ཟོས་སུ་བཏང་ནས་མི་ཚེ་མདུན་ལམ་མེད་པའི་ན་གཞོན་བེད་མེད་ནུས་མེད་ཞིག་ཆགས་སོང་ན་ངོ་མ་སེམས་པ་སྐྱོ་དགོས་པའི་གནས་ཚུལ་རེད། རྒྱལ་ཁབ་མིའི་ལག་ཏུ་ཤོར་བ་དེ་འདས་པའི་གནས་ཚུལ་ཞིག་རེད། ཡིན་ནའང་། ང་ཚོ་བོད་ཕྲུག་ཚོས་མ་འོངས་མདུན་ལམ་སོ་སོའི་ལག་ཏུ་ཡོད་བཞིན་དུ་དོ་སྣང་དང་འབད་བརྩོན་མ་བྱས་པར་མི་ཚེ་འཕྲོ་བརླག་སོང་ན་མ་འོངས་རྒྱལ་ཁབ་དང་མི་རིགས་ཀྱི་གནས་སྟངས་གང་འདྲ་ཞིག་ཡོང་མིན་བཤད་ཚོད་ཐུབ་རྒྱུ་ཁག་པོ་རེད། རྒྱུ་མཚན་དེ་ལ་བརྟེན་ནས་བོད་ཕྲུག་ང་ཚོས་སོ་སོའི་མ་འོངས་མདུན་ལམ་དང་དམིགས་ཡུལ་མ་ནོར་བ་ཞིག་འདེམས་དགོས་པ་ཤིན་ཏུ་གལ་ཆེའོ།།

ལྷ་མོ་སྒྲོལ་མ། འཛིན་གྲྭ་བཅུ་གཉིས། སྦེལ་ཀོབ་སཾ་བྷོ་ཊ། གུས་མོ་རང་ཉིད་ནི་ལང་ཚོ་དར་ལ་བབ་པའི་སློབ་ཕྲུག་ཅིག་ཡིན། མི་ཚང་མར་མ་འོངས་པའི་དམིགས་ཡུལ་ཡོད་ལ། བདག་ལ་ཡང་མི་ཚེའི་ནང་དམིགས་ཡུལ་ཞིག་ཡོད། དཔེར་ན། ༸གོང་ས་མཆོག་གིས་རྟག་པར་འགྲོ་བ་སེམས་ཅན་ཐམས་ཅད་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པས། སུ་གཅིག་ལ་ཡང་གནོད་འཚེ་མེད་པར་ཕན་ཚུན་བྱམས་པ་དང་སྙིང་རྗེ་ལྡན་པའི་ངང་ནས་མི་ཚེ་སྐྱེལ་ཐུབ་ན། དེ་ནི་དོན་དམ་པའི་བདེ་སྐྱིད་ལྡན་པའི་མི་ཚེ་སྐྱིད་པོ་ཞིག་ཡིན་པ་གསུངས་པ་བཞིན། ༸གོང་ས་མཆོག་གི་བཀའ་སློབ་སྙིང་ལ་བཅངས་ནས་རྟག་ཏུ་བྱམས་བརྩེ་དང་བསམ་པ་བཟང་པོའི་ངང་བདེ་སྐྱིད་ལྡན་པའི་མི་ཚེ་དོན་དང་ལྡན་པ་ཞིག་བསྐྱལ་ཨང་བསམ་པ་གཞིར་བཞག་ཐོག འཛིན་གྲྭ་ལྔ་པའི་སྐབས་སུ་གུས་མོ་རང་ཉིད་ལ་དགེ་རྒན་ཞིག་བྱེད་རྒྱུའི་དམིགས་ཡུལ་ཡོད་པ་དེ་བཞིན། ད་ལྟ་འཛིན་གྲྭ་བཅུ་གཉིས་ཀྱི་སྐབས་སུ་ཡང་དམིགས་ཡུལ་སྔར་བཞིན་བཅངས་ནས་འགྲོ་བཞིན་ཡོད། འཛམ་གླིང་ནང་གི་མི་ཚང་མར་དམིགས་ཡུལ་རེ་ཡོད། དཔེར་ན་དགེ་རྒན་དང་། སྨན་ཞབས། སྨན་པ་སོགས་ཡིན། གུས་མོ་ངས་ནི་དགེ་རྒན་ཚད་ལྡན་ཞིག་ཡོང་བའི་ཆེད་དུ། དུས་དང་རྣམ་པ་ཀུན་ཏུ་སློབ་སྦྱོང་ལ་འབད་བརྩོན་བྱེད་ཀྱི་ཡོད། ཕ་མའི་བཀའ་དྲིན་གསབ་པའི་ཆེད་དང་ཕ་མ་གཉིས་ལ་སྤོབས་པ་ཡོང་བའི་ཆེད་དུ་སློབ་སྦྱོང་ལ་དོ་སྣང་དང་འབད་བརྩོན་བྱེད་ཀྱི་ཡོད། སྤྱི་ཚོགས་ནང་དགེ་རྒན་ལ་གནས་བབས་དེ་ཙམ་མེད་པ་ངས་ཁས་ལེན་བྱེད་ཀྱི་ཡོད། འོན་ཀྱང་ལས་གནས་ཚང་མ་གཅིག་པ་རེད། ང་ལས་གནས་འདི་ལ་དགའ་པོ་ཞེ་དྲག་ཡོད། ལས་གནས་འདི་ངོ་མ་གནས་ཚད་མཐོན་པོ་ཞིག་རེད། གང་ཡིན་ཟེར་ན་དགེ་རྒན་གྱིས་མི་དམངས་ལ་ཤེས་རིག་གི་འོད་སྣང་ཁྱབ་སྤེལ་བྱེད་ཀྱིན་ཡོད་ལ། དེ་ལ་བརྟེན་ནས་མི་དམངས་ཚོ་རྨོངས་གཉིད་ལས་དཀྲོགས་པར་བྱེད་ཅིང་། མི་ཚོའི་རིན་ཐང་སྐྲུན་གྱི་ཡོད། འདི་ནི་ངའི་བསམ་ཚུལ་དང་ཡིད་ཆེས་ཡིན། ངས་བསམ་ན་ཤེས་ཡོན་ཅན་ཉམ་ཐག་པ་ཞིག་ཡིན་ནའང་། ཁོང་ནི་ཤེས་ཡོན་མེད་པའི་འབྱོར་ལྡན་ཅན་དེ་ཚོ་ལས་ལྷག་པ་ཡོད། དེ་ནི་ང་དགེ་རྒན་བྱེད་འདོད་པའི་རྒྱུ་མཚན་ཞིག་ཀྱང་ཡིན། ང་རང་དགེ་རྒན་ཞིག་ཆགས་སོང་ན། ངས་སློབ་ཕྲུག་རྣམས་ལ་བྱམས་དང་བརྩེ་བའི་སྒོ་ནས་རང་ཉིད་ཀྱིས་གང་ཤེས་པ་མཐའ་དག་ཕངས་སེམས་ཏིལ་འབྲུ་ཙམ་ཡང་མེད་པའི་སྒོ་ནས་སློབ་ཁྲིད་བྱེད་ངེས་ཡིན་ལ། རིག་སྟོབས་ཞན་པའི་སློབ་ཕྲུག་ཚོ་ལ་དམིགས་བསལ་དོ་སྣང་བྱས་ནས་སློབ་ཁྲིད་བྱེད་རྒྱུ་ཡིན། ངས་ད་ལྟ་ནས་དགེ་རྒན་ཞིག་ལ་ཚང་དགོས་པའི་ཆ་རྐྱེན་ཐད་བསམ་གཞིག་བྱེད་ཀྱི་ཡོད་ཅིང་། སློབ་ཁྲིད་ཐབས་ལམ་སོ་སོའི་ཕན་ནུས་ཀྱི་སྐོར་ལའང་བསམ་བློ་གཏོང་གི་ཡོད། ངའི་རེ་བ་ནི་ང་རང་མ་འོངས་པར་ང་རང་དགེ་རྒན་ཚད་ལྡན་ཞིག་ཏུ་གྱུར་ན་ཅི་མ་རུང་བསམ་པ་དེ་ཉིད་ཡིན།