ཟླ་བཟང་བླ་བྲང་ཆང་ག་ཚང་། འཛིན་གྲྭ་བཞི་པ།
ཀེ་ལཱཤ་པུ་ར་སཾ་བྷོ་ཊ་ཉིན་སློབ།
སྤྱི་བཏང་གོ་སྟོན་ཟེར་ན། མི་གཅིག་དགུང་ལོ་དགུ་བཅུ་ཆགས་པའི་དུས་ཆེན་ལ་ཟེར། ད་ལོ་༸གོང་ས་༸སྐྱབས་མགོན་ཆེན་པོ་མཆོག་དགུང་ལོ་དགུང་བཅུ་ལ་ཕེབས་པ་རེད། ཁོང་དགུང་ལོ་དགུང་བཅུ་ལ་ཕེབས་པ་སོང་ཙང་། ང་ཚོ་བོད་མི་ཚོས་ལོ་འདི་གོ་སྟོན་སྲུང་བརྩི་བྱེད་ཀྱི་ཡོད། ༸གོང་ས་མཆོག་གི་ལག་རྟགས་དགའ་ཤོས་ནི། སེམས་པ་བཟང་པོ་བྱེད་རྒྱུ་དེ་ཡིན་པའི་སྐོར་གསུང་གནང་གི་ཡོད། དེ་རིང་ཟླ་བ་ ༡༠ ཚེས་ ༥ རེད། ང་ཚོའི་སློབ་གྲྭའི་དགེ་ལགས་གཉིས་ཀྱིས་༸རྒྱལ་བའི་ཐུགས་བསྐྱེད་དམ་བཅའ་བཞིའི་ཐོག་འགྲེལ་བརྗོད་གནང་སོང་།
དེ་ཡང་། ཐུགས་བསྐྱེད་དམ་བཅའ་དང་པོ་ནི། འགྲོ་བ་མིའི་བཟང་སྤྱོད་གོང་འཕེལ་གཏོང་རྒྱུ། གཉིས་པ། ཆོས་ལུགས་ཕན་ཚུན་བར་མཐུན་འབྲེལ་གོང་མཐོར་གཏོང་རྒྱུ། གསུམ་པ། བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་རྒྱུ། མཐའ་མ་དེ། རྒྱ་གར་གནའ་བོའི་རིག་གཞུང་ཉམས་པ་སླར་གསོ། བཅས་ཡིན་པ་ངོ་སྤྲོད་གནང་བྱུང་། དགེ་ལགས་ཀྱིས་ཐོག་མར་གོང་ས་མཆོག་བཀའ་དྲིན་ཆེན་པོ་ཡིན་པའི་རྒྱུ་མཚན་མང་པོ་ཞིག་གསུངས་གནང་སོང་། དེ་རྗེས་ལ་༸གོང་ས་མཆོག་གི་ཐུགས་བསྐྱེད་དམ་བཅའ་དང་པོ་འགྲེལ་བཤད་གནང་རྒྱུ་འགོ་བཙུགས་སོང་། དེ་ནི། གོང་དུ་བྲིས་པ་ནང་བཞིན། འགྲོ་བ་མིའི་བཟང་སྤྱོད་གོང་འཕེལ་གཏོང་རྒྱུ་དེ་ཡིན། དགེ་ལགས་ཀྱིས་ང་ཚོ་ལ་བཟང་སྤྱོད་ཟེར་ན་གང་འདྲ་ཞིག་ལ་ཟེར། ཞེས་ནས་དྲི་བ་དྲིས་སོང་། ངའི་གྲོགས་པོ་སྟོབས་ལྡན་ལགས་ཀྱིས་ལན་བརྒྱབ་སོང་། དགེ་ལགས་ཀྱིས་ཁོ་ལ་བསྟོད་བསྔགས་གནང་སོང་། དེ་རྗེས་ཁོང་གིས་དོན་ཚན་གསུམ་གྱི་ཐོག་འགྲེལ་བཤད་བརྒྱབ་སོང་། བཟང་སྤྱོད་ཀྱི་ངོས་འཛིན་དང་བཟང་སྤྱོད་སྦྱོང་བརྡར། བཟང་སྤྱོད་བྱས་ན་ཕན་ཐོགས་གང་ཡོད་གསུམ་གྱི་སྐོར་ལ་གསུངས་གནང་སོང་། བཟང་སྤྱོད་ལ་དབྱེ་བ་གསུམ་གྱི་སྒོ་ནས་གསུངས་སོང་།
དང་པོ་ལུས་ཀྱི་བཟང་སྤྱོད། དཔེར་ན། མི་གཞན་ལ་རྣམ་འགྱུར་ཡག་པོ་བསྟན་ན། མི་གཞན་དེ་དགའ་པོ་བྱུང་གི་ཡོད་པ། ངག་གི་བཟང་སྤྱོད་ལ། མི་གཞན་ལ་ཚིག་རྩུབ་རིགས་སྤངས་ནས། གུས་ཞབས་དང་ལྡན་པའི་སྒོ་ནས་སྐད་ཆ་བཤད་ན། མི་གཞན་དེ་སེམས་ལ་དཀའ་ངལ་མ་བཟོས་པས། ཡིད་ཀྱི་བཟང་སྤྱོད་ཡིན་པ་གསུངས་བྱུང་། ཡིད་ཀྱི་བཟང་སྤྱོད། ང་ཚོས་གཞན་ལ་སེམས་པ་བཟང་པོ་བྱས་ན། སོ་སོ་དང་མི་གཞན་གཉིས་ཀར་ཕན་ཐོགས་ཆེན་པོ་ཡོད། ང་ཚོ་རང་གི་སེམས་ལ་བཟང་སྤྱོད་གང་འདྲ་སྦྱོང་བརྡར་བྱེད་དགོས་པ་གསུངས་བྱུང་། གལ་སྲིད། མི་གཞན་གྱི་རང་ལ་བཀའ་མོལ་རྩུབ་པོ་དང་གནོད་པ་སྐྱེལ་སྐབས། དེ་ལ་ཁོང་ཁྲོ་མ་ལངས་ནས་སྙིང་རྗེ་སྐྱེས་ཐུབ་ན། ང་ཚོ་ནམ་ཡང་སེམས་ལ་དཀའ་ངལ་མེད་པའི་སྒོ་ནས་ཡ་རབས་བཟང་སྤྱོད་བྱེད་ཐུབ་ཀྱི་རེད་གསུངས་བྱུང་། དགེ་ལགས་ཀྱིས་ང་ཚོ་བཟང་སྤྱོད་བྱས་ན་ཕན་ཐོགས་གང་ཡོད་སྐོར་གསུངས་གནང་བྱུང་། ང་ཚོས་ཡ་རབས་བཟང་སྤྱོད་བྱས་ན། སྤྱི་ཚོགས་ནང་ལ་ལྷིང་ཆགས་ཡོང་གི་རེད་གསུངས་བྱུང་། དགེ་ལགས་ཀྱིས་དེ་རིང་ང་ཚོ་ལ་ཐུགས་བསྐྱེད་དམ་བཅའ་དང་པོ་དེ་འགྲེལ་བཤད་ཧ་ཅང་ཡག་པོ་གནང་སོང་། དགེ་ལགས་གཉིས་ཀྱིས་གང་བསླབས་པ་ཚང་མ་འབྲི་དེབ་ནང་ཟིན་ཐོ་བརྒྱབ་པ་ཡིན། དེ་རིང་ངས་ཐུགས་བསྐྱེད་དམ་བཅའ་དང་པོའི་སྐོར་གསལ་པོ་ཤེས་བྱུང་། སེམས་པ་དགའ་པོ་བྱུང་།།
ད་བར་དཔྱད་མཆན་མེད།