བསྟན་འཛིན་དགྲ་འདུལ།
འཛིན་གྲྭ་བརྒྱད་པ། མེས་དབོན་གཙུག་ལག་དཔེ་སྟོན་སློབ་གྲྭ།
ད་ལྟ་བར་དུ་ངའི་བརྗེད་ཐབས་མེད་པའི་མྱོང་ཚོར་ཆེ་ཤོས་དེ་ནི། ང་རང་ཆུང་དུས་ལོ་ན་དྲུག་ལ་སླེབས་པའི་སྐབས། ངས་རྐང་རྩེད་སྤོ་ལོ་ཟེར་བ་དེ་ངོས་འཛིན་ཐུབ་བྱུང། ད་དུང་རྐང་རྩེད་སྤོ་ལོ་རྩེད་སྟངས་ཀྱང་ཤེས་བྱུང་། དུས་དེ་ནས་ཟུངས། པཱ་ལགས་ཀྱིས་ང་རང་ནོར་གླིང་སྐར་ཆུང་རུ་ཁག་ནང་དུ་འཛུལ་ཞུགས་བྱེད་དུ་བཅུག་པས། ང་རང་རེས་གཟའ་སྤེན་པའི་དགོང་མོ་དང་། རེས་གཟའ་ཉི་མའི་ཞོགས་པ་སྔ་པོ་ནས་རྐང་སྤོལ་རྩེད་ཐང་དུ་འཛོམས་ཏེ་སྦྱོང་བརྡར་བྱེད་ཀྱི་ཡོད། གུང་སེང་སྐབས་ཞོགས་པ་སྔ་པོ་ག་ཚོད་ལང་དགོས་ཀྱང་། དེ་དུས་ང་ལ་ལངས་སྙིང་མ་དོད་པའི་སྣང་བ་རྩ་བ་ནས་མ་བྱུང་། སྦྱོང་བརྡར་དུས་ཚོད་དེ་ནི་ངའི་ཉི་མོ་དགའ་ཤོས་དང་། ཉིན་མོ་སྐྱིད་ཤོས་དེ་ཡང་ཡིན།
སྦྱོང་བརྡར་བསླབ་མཁན་དེ་ནི། རྒན་བྱང་ཆུབ་ཡིན་པ་དང་། ཁོང་ནི་ང་ཚོ་བྱིས་པ་རྣམས་ལ་རྐང་སྤོལ་བསླབ་སྟངས་མཁས་པོ་ཡོད། རྒན་བྱང་ཆུབ་ལགས་ཀྱིས་ང་ཚོར་གུང་གསེང་སྐབས་སུ་རུ་ཁག་བགོས་ཏེ་འགྲན་བསྡུར་བྱེད་དུ་བཅུག་པ་དང་། སྤོ་ལོའི་སྒྲིག་ཁྲིམས་སྲུང་སྟངས་ཡང་སློབ་ཀྱི་ཡོད། ཐོབ་དང་ཤོར་ཟེར་བ་དེ་ནི་རྐང་སྤོལ་གྱི་སྒྲིག་གཞི་ཞིག་ཡིན། འོ་ན། རྐང་རྩེད་སྤོ་ལོ་དེ་རྩེ་དགོས་དོན་ཅི་ཡིན་ནམ་ཟེར་ན། རྐང་རྩེད་སྤོ་ལོ་ཟེར་བ་དེ་ནི། མི་དང་མི་ཕན་ཚུན་བར་འཆམ་མཐུན་དང་། གཟུགས་པོའི་འཕྲོད་བསྟེན། ད་དུང་སྐྱིད་པོ་ཡོང་བའི་ཆེད་དུ་བཅས་རེད། ཞེས་རྒན་བྱང་ཆུབ་ལགས་ཀྱིས་དུས་རྒྱུན་དུ་ང་ཚོར་རྐང་རྩེད་སྤོ་ལོ་རྩེ་དུས་གསུང་གི་ཡོད། ངས་ཀྱང་དེ་སེམས་ལ་དམ་པོར་བཅངས་ཏེ་སྐབས་རེ་རྐང་སྤོལ་རྩེ་བའི་དུས་ལ། ཕན་ཚུན་ཕོག་ཐུགས་བྱུང་སྐབས་ཁོང་ཁྲོ་ལངས་ཀྱང་བཟོད་པ་བསྒོམས་ཏེ་ཞི་ཞིང་དུལ་བའི་ངང་གནས་ཐབས་བྱེད་ཀྱི་ཡོད།
ཉིན་ཞིག་རྒན་བྱང་ཆུབ་ལགས་ཀྱིས་སང་ཉིན་ཉིན་མོ་དེ་ལ་ང་ཚོའི་རུ་ཁག་དང་སློབ་གྲྭ་གཞན་གྱི་རུ་ཁུག་ཁ་ཤས་ཤིག་མཉམ་དུ་འགྲན་བསྡུར་བྱེད་ཀྱི་རེད་ཅེས་གསུངས་དུས། ང་ལ་ཧ་ཅང་གི་དགའ་ཚོར་ཆེན་པོ་བྱུང་། ངས་དགོང་མོ་ནས་གྲ་སྒྲིག་བྱས་ཏེ་སང་ཉིན་གྱི་རྒྱལ་ཁ་ཐོབ་རྒྱུར་རེ་བ་བཅངས་བཞིན་གཉིད་དུ་ཡུར། སང་ཞོགས་ང་རང་ནམ་རྒྱུན་ལས་སྔ་བ་གཉིད་ལས་སད་བྱུང། ངས་མགྱོགས་མྱུར་ངང་ཁ་ངོ་བཀྲུས་ཤིང་ཞོགས་ཟས་བཟས་ནས། ནོར་གླིང་སྐར་ཆུང་རུ་ཁག་གི་སྒྲིག་ཆས་གྱོན་ཏེ་དགའ་དགའ་སྤྲོ་སྤྲོའི་ངང་། རྩེད་རོགས་གཞན་དང་མཉམ་དུ་རྩེད་ཐང་དུ་འཛོམས་ཏེ་རྐང་རྩེད་སྤོ་ལོའི་སྐོར་ལ་གླེང་མོལ་བྱས།
རྐང་རྩེད་སྤོ་ལོའི་འགྲན་བསྡུར་དང་པོ་དེ་འགོ་འཛུགས་སོང་། དེ་ནི་དྷ་སྟེང་བོད་ཁྱིམ་སློབ་གྲྭའི་རུ་ཁག་དང་། དཔེ་སྟོན་སློབ་གྲྭའི་རུ་ཁག་གཉིས་རེད། དྷ་སྟེང་བོད་ཁྱིམ་རུ་ཁག་གིས་སྐར་མ་ཁ་ཤས་ནང་དཔེ་སྟོན་སློབ་གྲྭའི་རུ་ཁག་གི་དྲ་བའི་ནང་སྤོ་ལོ་གསུམ་བླུགས་སོང། དཔེ་སྟོན་རུ་ཁག་གིས་འབད་བརྩོན་ཆེན་པོའི་ངང་ནས་དྷ་སྟེང་བོད་ཁྱིམ་རུ་ཁག་གི་དྲ་བའི་ནང་གཅིག་བླུགས་ཐུབ་སོང་། འོན་ཀྱང་། མཐའ་མའི་རྒྱལ་ཁ་དྷ་སྟེང་བོད་ཁྱིམ་རུ་ཁག་ལ་ཐོབ་ནས་ཡར་མཆོངས་མར་མཆོངས་བྱེད་བཞིན་”ཐོབ་སོང། ཐོབ་སོང་།”ཞེས་དགའ་ཚོར་ཆེན་པོའི་ངང་ཕན་ཚུན་ལ་འཐམ་རེས་བྱས།
དེ་རྗེས་རིང་པོ་མི་འགོར་བར་ང་ཚོའི་རུ་ཁག་དང་དྷ་ཤོད་སློབ་གྲྭའི་རུ་ཁག་གཉིས་རྩེ་འགོ་བཙུགས། དྷ་ཤོད་སློབ་གྲྭའི་རུ་ཁག་གིས་ང་ཚོའི་དྲ་བའི་ནང་སྤོ་ལོ་ལྔ་བླུགས་པ་དང་། ང་ཚོས་ཁོ་ཚོའི་དྲ་བའི་ནང་གཅིག་ཀྱང་བླུག་མ་ཐུབ་པས། ང་ཚོར་ཡོད་པའི་སེམས་ཤུགས་དེ་ཇེ་ཆུང་ཇེ་ཆུང་དུ་གྱུར། འོན་ཀྱང་། ངའི་སེམས་ནང་༧གོང་ས་མཆོག་གི་གསུངས་པའི་བཀའ་སློབ།ལས་ཀ་ག་རེ་བྱས་རུང་སེམས་ཤུགས་ནམ་ཡང་ཆགས་མི་ཉན། ཞེས་པ་དེ་ལྷང་ངེར་དྲན་དུས་ངས་ནུས་པ་ཡོད་ཚད་བསྟན་ཏེ་རྩེ་བའི་སྐབས། ངའི་རུ་གྲོགས་རྣམས་ཀྱང་སེམས་ཤུགས་འཕར་ནས་ཁོ་ཚོའི་དྲ་བའི་ནང་གཉིས་བླུགས་ཐུབ་པ་བྱུང། དེ་ནི་ང་ཚོར་མཚོན་ན་ཧ་ཅང་གི་དགའ་ཚོར་དང་། རྒྱལ་ཁ་ཆེན་པོ་ཞིག་ཡིན་བསམས་བྱུང།
དེ་བཞིན་ང་ཚོའི་རུ་ཁག་དང་སློབ་གྲྭ་གཞན་གྱི་རུ་ཁག་མང་པོ་མཉམ་དུ་འགྲན་བསྡུར་བྱེད་མྱོང་ཡོད། འོན་ཀྱང་། སྐབས་དེ་དུས་ང་ལ་གསོལ་རས་རག་མ་བྱུང། མ་ཟད། ང་ཚོའི་རུ་ཁག་ལ་ཨང་དང་པོའི་བྱ་དགའ་ཡང་ཐོབ་མྱོང་མེད། རེད་དེ་ང་ཚོའི་རུ་ཁག་ནམ་ཡང་སེམས་ཤུགས་ཆགས་མྱོང་མེད།
ཕྱི་ལོ་ ༢༠༢༡ ལོར་ང་རང་ལོ་ན་བཅུ་ཡིན་སྐབས། རྒན་བྱང་ཆུབ་ལགས་ཀྱིས་ང་ཚོ་ཚང་མ་རྐང་རྩེད་སྤོ་ལོ་རྩེད་ཐང་ཞིག་ནང་ཁྲིད་དེ། ང་ཚོ་ནང་ཁུལ་རུ་ཁག་བགོས་ནས་འགྲན་བསྡུར་བྱེད་དུ་བཅུག། དེ་དུས་ང་ནི་གཅེན་པོ་དཀོན་མཆོག་གི་རུ་ཁག་ཡིན་པ་དང་། ང་ཚོའི་སྒོ་སྲུང་བ་ནི་རྒན་དགྲ་འདུལ་ཡིན། རྒན་དགྲ་འདུལ་ལགས་ཀྱིས་རུ་ཁག་གཞན་གྱིས་བཞུས་པའི་སྤོ་ལོ་ཚང་མ་བཀག་སོང། དེ་དུས་ངས་ཀྱང་རྒན་བྱང་ཆུབ་ཀྱི་རུ་ཁག་གི་དྲ་བའི་ནང་སྤོ་ལོ་གསུམ་བླུགས་པ་ཡིན། མཐའ་མའི་རྒྱལ་ཁ་དེ་ང་ཚོའི་རུ་ཁག་ལ་ཐོབ་པས་ང་ཚོ་དགའ་ཐག་ཆོད་ནས་ཡར་མཆོང་མར་མཆོང་བྱས། སྐབས་དེ་དུས་ང་ནི་རྒྱལ་ཁ་དང་པོ་ཐོབ་པའི་མྱོང་ཚོར་དེ་སེམས་ནང་བསམས་ཀྱང་ཁ་ནས་བཤད་ཐུབ་ཐབས་མེད་པའི་དགའ་ཚོར་བྱུང། ང་ཚོར་རྒན་བྱང་ཆུབ་ལགས་ཀྱིས་གསོལ་རས་གནང་འགོ་བཙུགས། ད་དུང་རྒན་བྱང་ཆུབ་ལགས་ཀྱིས་ང་རང་ཐེངས་དེའི་རྩེད་འགྲན་སྐབས་རྐང་སྤོལ་རྩེད་མཁན་ནང་ནས་(Best Player) རྩེད་མཁན་ཡག་ཤོས་ཀྱི་བྱ་དགའ་དེ་ང་ལ་གནང་བྱུང།
དེ་དུས་པཱ་ལགས་དང་གཟིགས་མོ་བ་ཚང་མས་དགའ་བསུའི་ཐལ་མོ་རྡེབ་བཞིན་འདུག། དེ་ནི་ང་རང་ཉིན་མོ་སྐྱིད་ཤོས་དེ་ཡིན་ལ་བརྗེད་ཐབས་མེད་པའི་ཉིན་མོ་ཞིག་ཀྱང་ཡིན། ངས་རང་ཉིད་ལ་ཐོབ་པའི་(Best Player) རྩེད་མཁན་ཡག་ཤོས་ཀྱི་བྱ་དགའི་ལགས་རྟགས་དེ་ང་རང་སློབ་སྦྱོང་བྱེད་སའི་དཔེ་སྒྲོམ་སྒང་ལ་བཞག་ནས་བརྗེད་ཐབས་མེད་པའི་ཉིན་མོ་དེ་ཡང་ཡང་དྲན་གསོ་དང་། ངའི་རྩེད་མོ་དགའ་ཤོས་རྐང་རྩེད་སྤོ་ལོ་ལ་བཅངས་པའི་དགའ་ཞེན་དེ་ནམ་ཡང་བརྗེད་ཐབས་མི་འདུག་གོ །
ད་བར་དཔྱད་མཆན་མེད།