བསྟན་འཛིན་ཆོས་འཛོམས།
འཛིན་གྲྭ་བརྒྱད་པ། མ་སུ་རི་སཾ་བྷོ་ཊ་གཏན་སློབ།
དེ་རིང་ནི་ཨང་རྩིས་ཉིན་མོ་རེད་འདུག། མ་འདྲ་བ་ཞིག་ལ་ངའི་ཉིན་ཐོ་འདི་ནི་དམིགས་བསལ་གྱི་ཉིན་ཐོ་ཞིག་ཆགས་རྒྱུ་རེད། རྒྱུ་མཚན་ནི། ཉིན་དེ་དང་སྐབས་དེ་དག་ཏུ་ངའི་འཛིན་གྲོགས་གཅིག་པ་མང་ཆེ་བ་ལ་ན་ཚ་འདྲ་མིན་རེ་ན་སོང་བའི་སྐོར་ཉིན་ཐོ་ནང་གི་བརྗོད་བྱ་ལ་བྲི་རྒྱུའི་བསམ་པ་ཡིན། སློབ་གྲོགས་ན་མཁན་ནང་ནས་ཚབས་ཆེ་ཤོས་ནི་དབྱངས་ཅན་དང་། ཐོགས་མེད་གཉིས་ཡིན་ས་རེད། ཁོང་གཉིས་ནི་སྐྱུག་པ་ཡང་ཡང་བསྐྱུགས་པ་དང་། ད་དུང་ཁྲག་འདྲེས་པ་དེ་འདྲ་ཡང་སྐྱུག་གིན་འདུག ངས་ཁོང་གཉིས་ལ་སྙིང་རྗེ་བ་མ་ཟད་རོགས་པ་ཡང་བྱེད་ཉན་བྲོ་སོང་། དེ་མིན་འཛིན་གྲོགས་གཞན་དག་མང་ཆེ་བ་ཞིག་ལ་ཡང་། གློ་བརྒྱབ་པ་དང་མགོ་ན་བ་། གྲོད་པ་ན་བ་བཅས་མང་པོ་ཞིག་ན་གིན་འདུག སྐབས་དེར་ངས་ཁོང་ཚོར་རོགས་པ་གང་ཐུབ་ཐུབ་བྱས་པ་ཡིན།
དེདེ་རྗེས་ང་ཡང་ན་སོང་། དེ་དུས་ངས་སློབ་སྦྱོང་ཡང་བྱེད་མི་ཐུབ་པར་མ་ཟད། དཀའ་ངལ་ཧ་ཅང་མང་པོ་མྱངས་སོང་། ཡིན་ཡང་དགའ་སྤྲོ་སྐྱེ་དགོས་པ་ཞིག་ནི་དེ་སྐབས་ང་ལ་ལྟ་རྟོག་བྱེད་མཁན་མང་པོ་ཡོང་གི་འདུག ངའི་གཟུགས་པོ་དེ་ལྟར་ན་གིན་ཡོད་ན་ཡང་། སེམས་པ་སྐྱིད་པོ་བྱུང་བས་སེམས་ལྷོད་ལྷོད་བྱས་ཏེ་བསྡད་པར་ཕན་ཐོགས་ཆེན་པོ་བྱུང་སོང་། ངའི་སེམས་ལ་ཁོང་ཚོ་ན་དུས་སུ། ང་རང་གིས་རོགས་པ་གང་ཐུབ་བྱས་པའི་རྐྱེན་གྱིས་ལས་རྒྱུ་འབྲས་བཟང་པོ་ང་རང་ལ་འཁོར་བ་རེད་ཨང་བསམས་སོང་། རོགས་པ་ཚང་མར་སེམས་ནས་བཀའ་དྲིན་ཆེ་ཞུ་འདོད་བྱུང་། དེ་དུས་ནས་ང་རང་ལས་འབྲས་ཀྱི་འགྲོ་ཕྱོགས་ལ་དད་པ་དང་ཡིད་ཆེས་ཤུགས་ཆེན་པོ་སླེབས་སོང་ལ། བསླབ་བྱ་ཡང་ཡག་པོ་ཞིག་ཐོབ་བྱུང༌།དེ་ནི་རང་ལས་གཞན་གལ་ཆེ་ཟེར་བ་དེ་རེད།
དེང་རང་ན་བའི་དུས་ཀྱི་ཞོགས་པ་ཚང་མར་སློབ་གྲྭ་ལ་ཉལ་བསྡད་པ་ཡིན། ཉལ་ས་ནས་ལངས་འདོད་ཡང་མི་འདུག་ལ་མཉམ་དུ་ང་རང་གི་འཛིན་གྲོགས་ཆ་ཚང་གི་ན་ཚ་དེ་དག་ཀྱང་སེམས་ནས་ཚོར་ཐུབ་ཀྱི་འདུག། ང་རང་ལ་ཉལ་ཁང་ནང་དུ་འདི་འདྲ་ཞིག་སྔོན་ཆད་ན་མྱོང་མེད། དེ་ནི་ངའི་མི་ཚེ་ནང་གི་ན་ཚ་དཀའ་ལས་ཁག་ཤོས་དེ་རེད་ཅེས་ཡང་ཡང་སེམས་ནང་དྲན་རྒྱུ་འདུག སྐབས་དེར་ངའི་ཐབས་ཤེས་ཤིག་དྲན་སོང་། དེ་ནི་སྐྱབས་འགྲོ་མང་པོ་བསོག་རྒྱུ་དེ་རེད། ངས་དེ་ལྟར་བསམ་ཞོར་སྐྱབས་འགྲོ་གང་ཐུབ་བཏོན་པ་ཡིན། ག་རེ་བྱས་ནས་ཟེར་ན། སྐྱབས་འགྲོ་ནི་ན་ཚ་སོགས་དྲག་པར་ཕན་ཐོགས་ཆེན་པོ་ཡོད་པ་ངས་ཤེས་ཡོད་པ་བཞིན་དུ་ཡིད་ཆེས་ཀྱང་ཆེ་བ་ཡོད།
དེང་ཚོའི་དགེ་བཤེས་བྱམས་པ་འཕྲིན་ལས་ལགས་ཀྱིས་རིགས་ལམ་སློབ་ཁྲིད་གནང་ཞོར་དུ། ང་ཚོར་སྐྱབས་འགྲོའི་ཕན་ཡོན་དང་བསླབ་བྱ་སོགས་མང་པོ་གནང་གི་ཡོད། མཉམ་དུ་ངས་ཀྱང་ཡག་པོ་ཉན་ཏེ་སྦྱང་བརྩོན་བྱས་པ་ཡིན། དེའི་རྐྱེན་གྱི་བུ་མོ་ང་རང་ལ་ཡང་སྐྱབས་འགྲོ་དང་རིགས་ལམ་སྐོར་ལ་དེ་འདྲའི་གོ་རྟོགས་མང་པོ་ཐོབ་སོང་། སྐྱབས་འགྲོའི་སྐོར་ལ་ཅུང་ཟད་ཤེས་པ་དང་ཡིད་ཆེས་སླེབ་རྒྱུ་ནི་ལས་སླ་པོ་ཞིག་མིན་ཡང་། རྒན་གྱི་སློབ་ཁྲིད་ཡག་པོ་གནང་བ་དང་སློབ་ཕྲུག་རང་གིས་འབད་པ་དང་ཧུར་བརྩོན་བྱས་ན་ཕལ་ཆེར་མི་ཤེས་པ་ཡོད་པ་མ་རེད། གལ་སྲིད་གནས་སྐབས་རིང་ལ་ཤེས་མ་ཐུབ་ནའང་རྗེས་སུ་ག་ལེར་གོ་ཐུབ་ཀྱི་རེད། གུས་མོ་ང་རང་ལ་མཚོན་ན་དང་པོར་དགེ་བཤེས་ལགས་མཇལ་དུས་ཁོང་གི་སློབ་ཚན་བསླབས་པ་རྣམས། དེ་ཙམ་ཤེས་ཐུབ་ཀྱི་མི་འདུག་ནའང་། ད་ལྟའི་དུས་སུ་ང་རང་གིས་ཤེས་ཐུབ་ཀྱི་འདུག དེ་ནི་ཚེ་འདི་ཙམ་མ་ཟད་ཚེ་ཕྱི་མར་ཡང་ཕན་ཐོགས་ཧ་ཅང་ཆེ་བའི་འབྲས་བུ་ཡག་པོ་ཞིག་རེད།
ད་བར་དཔྱད་མཆན་མེད།