ངའི་དཔྲལ་བའི་མིག་དང་འདྲ་བའི་བརྩེ་བའི་ཕ་མ་གཉིས།

ཡོན་ཏན་ཚང་ཡང་བསྐྱར་སྒྲོལ་མ།
འཛིན་གྲྭ་བརྒྱད་པ། མེས་དབོན་གཙུག་ལག་དཔེ་སྟོན་སློབ་གྲྭ།

      དེ་རིང་གི་གནམ་གཤིས་ནི་མེ་རི་ལྟར་ཚ་བའི་ཁར། གུས་མོ་ང་རང་གི་ལུས་གཟུགས་ཡོངས་རྫོགས་ལ་རྔུལ་ཆུ་ཞིག་གིས་བཟུང་ནས་བསླེབས་སོང་བས། ང་རང་སུན་སྣང་དང་བཅས་འཛིན་ཁང་གི་ཕྱི་ལོགས་སུ་དོན་སྐབས་སློབ་ཕྲུག་ཚོས་ཚ་ཚ་འུར་འུར་ངང་ནང་སྦྱར་པང་གི་ཕྱོགས་སུ་འཁོར་ཏེ་ལབ་གླེང་འདྲ་མིན་ཞིག་བྱེད་ཀྱིན་ཡོད་པས། ངས་ཀྱང་ཅི་ཞིག་ཡིན་ནམ་སྙམ་ནས་ཁོ་ཚོའི་འཁྲིས་སུ་བཅར་དུས། གྱང་སྦྱར་ངོས་སུ་གསལ་བསྒྲགས་དང་སློབ་མ་ཚོས་བྲིས་པའི་རྩོམ་སོགས་སྦྱར་འདུག་པའི་དཀྱིལ་དབུས་སུ་ཤེས་རིག་ལས་ཁུངས་ཀྱི་གོ་སྒྲིག་བྱས་པའི་དགེ་སློབ་འབྲི་རྩོམ་གྱི་གསལ་བསྒྲགས་དེ་མཐོང་སོང་། ངས་དབུགས་ཐེངས་གཅིག་གིས་གསལ་བསྒྲགས་དེ་འགོ་ནས་མཇུག་བར་དུ་ཀློག་སྐབས། ད་ཐེངས་འཛིན་བརྒྱད་པར་རང་མོས་རྩོམ་ཡིག་བྲི་ཆོག་ཟེར་ནས་བྲིས་འདུག་པས། ང་དེ་བས་ཀྱང་དགའ་བོ་བྱུང་། གང་ཡིན་ཟེར་ན། རང་མོས་བརྗོད་གཞི་ཡིན་ན་གང་འདོད་དུ་འབྲི་ཆོག་པ་རེད། དེ་ནས་ངས་བརྗོད་བྱ་གང་གི་སྐོར་ལ་འབྲི་དགོས་མིན་གྱིས་བསམ་བློ་ཞིག་གཏོང་དུས། གློ་བུར་དུ་ངས་རང་ཉིད་ཀྱི་གྱོན་པའི་གོས་དང་ཉིན་ལྟར་ཟས་ཞིམ་གནང་མཁན་གྱི་ཕ་མ་གཉིས་པོ་སེམས་པར་འཆར་སོང་། དེ་ནས་ངས་སྐར་ཆ་གཅིག་ཀྱང་མ་འགོར་བར་རང་ཉིད་ཀྱི་སྨྱུ་གུ་འགུལ་འགོ་བརྩམས་པ་ཡིན།

ཆུང་སྦར་མོ་གང་ནས་སྐྱོང་མཁན་དེ།།
དྲིན་བུ་ལ་ཆེ་བ་ཕ་མ་རྣམས།།
དུས་སྐད་གཅིག་མེད་ན་འཚོ་ཐབས་མེད།།
དྲིན་ཀུན་ལ་ཆེ་བ་ཕ་མ་ཡིན།།

      སྤྱིར་ཕ་མ་ཟེར་བ་ནི་སྐྱེས་བོ་ཐམས་ཅད་ལ་དགོས་པ་ཞིག་ཡིན་ལ། ཕ་མ་མེད་ན་ང་ཚོ་ཡང་མེད། དེས་མ་ཟད་ཕ་མ་ཟེར་བ་ནི་ཁྲག་རྒྱུན་གཅིག་པུར་མ་ཡིན་པར། རང་ཉིད་ལ་བྱམས་སྐྱོང་དང་བརྩེ་བ་གཞན་ལས་ལྷག་པ་སྤྲོད་མཁན་དེ་ཕ་མ་ཡིན། དཔེར་ན། ད་ཕྲུག་རྣམས་གསོ་མཁན་གྱི་མི་དང་། གསོ་སྐྱོང་གནང་མཁན་སུ་ཡང་མེད་པ་ན། རང་ཉིད་ཀྱི་དགེ་བའི་བཤེས་གཉེན་རྣམས་ཕ་མར་ངོས་འཛིན་བྱས་ན་ནོར་བ་མེད། གང་ཡིན་ཟེར་ན། དགེ་བའི་བཤེས་གཉེན་རྣམས་ཀྱིས་ང་ཚོའི་མི་ཚེ་འགྲོ་སྟངས་ཤིག་སློབ་ཀྱི་ཡོད་ཙང་ཕ་མ་དང་འདྲ་བོ་ཡོད། ཡིན་ནའང། ང་ལ་ཕ་མ་ཡོད་ཙང་། ང་ལ་ཆ་མཚོན་པ་ཡིན་ན་ང་རང་ཟླ་དགུ་ཁོག་ནང་ཉར་མཁན་དང་། རང་ཉིད་ཀྱི་ཞེད་སྣང་ལ་གདོང་ལེན་བྱེད་འཇུག་མཁན་གྱི་ཕ་མ་བཟང་པོ་ཞིག་ཡོད། ཁོང་རྣམ་གཉིས་ནི་ཨ་མ་ཚེ་དབྱངས་ལགས་དང་། པ་ལགས་བསྟན་འཛིན་ལྷུན་གྲུབ་ཡིན། ཁོང་རྣམ་གཉིས་ཀྱིས་ང་ལ་སྦྱིན་པའི་བརྩེ་བ་དེ་ངས་ནམ་ཡང་དྲིན་ལན་འཇལ་ཐབས་མེད་ལ། ཁོང་གཉིས་ཀྱི་གནང་བའི་ལག་རྟགས་དང་བརྩེ་བ་སོགས་དངུལ་གྱི་ཉོ་འདོད་ཀྱང་ཉོ་མ་ཐུབ་པ་ཞིག་ཡིན། ད་ལྟ་ང་རང་སློབ་སྦྱོང་སྦྱང་པར་སློབ་གྲྭར་གཏོང་མཁན་དེ་ཡང་ཕ་མ་ཡིན་ལ། ཆུང་དུས་ཐོག་མ་སྐད་ཆ་བཤད་སྟངས་དང་འགྲོ་སྟངས་སོགས་སློབ་མཁན་དེ་ཡང་ཕ་མ་གཉིས་པོ་ཡིན། ངའི་ཕ་མ་གཉིས་པོ་ནི་བོད་ནས་རྒྱ་གར་ལ་ལོ་རབས་དགུ་བཅུའི་ནང་བཙན་བྱོལ་དུ་འབྱོར་བ་ཞིག་ཡིན་ལ། ངའི་ཕ་མ་ཁོང་གཉིས་ཐོག་མར་ཕྲུ་གུ་འབྱུང་དུས་ན་གཞོན་ཡིན་པ་དང་། བོད་ནས་གསར་དུ་ཕེབས་པ་ཞིག་ཡིན་དུས་དཔལ་འབྱོར་གྱི་དཀའ་ངལ་མང་ཡང་རང་ཉིད་ཀྱི་ཕྲུ་གུའི་གྲོད་པ་སྟོང་པ་བཞག་མྱོང་མེད། གཅེན་མོ་སྐྱེས་པའི་ལོ་བཞི་ཙམ་རྗེས་སུ་ཕ་མ་རྣམ་གཉིས་ལ་ང་བྱུང་བ་རེད། དེ་དུས་ཁོང་གཉིས་ཀྱིས་གཅེན་མོ་ང་གཉིས་རྡོ་རྗེ་ཕ་ལམ་ལས་ཀྱང་རྩ་ཆེ་བར་བརྩིས་པར་མ་ཟད། ཁོང་གཉིས་ཀྱིས་ང་དང་ངའི་གཅེན་མོའི་བདེ་བའི་ཆེད་ཕྱི་ལ་འཁྱམ་འཁྱམ་དུ་ཡུལ་ལྗོངས་མཛེས་པོ་གང་སར་མང་པོ་ཁྲིད་མྱོང་ཡོད།

ཟས་ཞིམ་པོ་རང་ལ་ཐོབ་པའི་སྐབས།།
ཟ་མ་ཕོད་བུ་ཕྲུག་ཆེད་དུ་ཉར།།
དངུལ་སྒོར་མོ་རེ་གཉིས་ཐོབ་པའི་དུས།།
བོུ་ང་ཚོའི་ཆེད་དུ་ཕང་མེད་བཏང་།།

      ཕ་མ་ཁྱེད་གཉིས་ཀྱི་བརྩེ་བ་དང་ང་ལ་གསུངས་པའི་བསླབ་བྱ་སོགས་ངས་རང་ཉིད་ཀྱི་སེམས་ལ་རི་མོ་བརྐོས་པ་བཞིན་དྲན་པ་བརྗེད་མི་ཐུབ། དེ་རིང་ངས་རྩོམ་འདི་བརྒྱུད་ནས་རང་ཉིད་ཀྱི་སེམས་ཐག་ཉེ་བའི་ཕ་མ་རྣམ་གཉིས་ལ་སེམས་པའི་གཏིང་ནས་ཐུགས་རྗེ་ཆེ་ཞུ་བ་དང་། ཕ་མ་ཁྱེད་གཉིས་ཀྱི་དོན་དུ་ད་ལྟ་ང་གསོན་པོ་དང་བདེ་བོའི་ངང་མི་ཚེ་སྐྱེལ་ཐུབ་ཡོད་ལ། ཁྱེད་རྣམ་གཉིས་ཀྱི་བཀའ་དྲིན་ལ་བརྟེན་ནས་ད་ལྟ་སློབ་སྦྱོང་བྱ་རྒྱུའི་གོ་སྐབས་བཟང་པོ་ཞིག་བྱུང་སོང་། ཕ་མ་ཁྱེད་གཉིས་ཀྱིས་ང་ཡི་ཆེད་དུ་བྱས་པའི་བྱ་བ་ཐམས་ཅད་ལ་ཐུགས་རྗེ་ཆེ་ཞུ་བ་དང་། བྱམས་བརྩེ་ལྡན་པའི་ཕ་མ་རྣམ་གཉིས་སྐུ་ཚེ་ཡུན་རིང་གནས་པར་ཤོག །

ཆུང་དུས་ནས་བརྩེ་བས་བྱམས་ཀྱི་བསྐྱངས།།
བདག་ང་ཡིས་ཆེད་དུ་ལས་ལ་བརྩོན།།
སྔོན་བསོད་ནམས་བསགས་པའི་འབྲས་བུ་ལ།།
མི་ང་ལ་ཕ་མ་དྲིན་ཆེན་ཞིག །

གུས་ང་ཡིས་དགེ་རྒན་དང་པོ་ཁྱེད།།
ལས་གང་བྱས་ཁྱེད་ཀྱི་བསླབས་ནས་བྱུང་།།
དུས་རྟག་ཏུ་རྒྱབ་སྐྱོར་ང་ལ་གནང་།།
ཁྱེད་བདག་ལ་བཀའ་དྲིན་ཆེ་སོང་ངོ་།།

ཁྱེད་ཕ་མ་རྣམ་གཉིས་ང་ལ་ནི།།
དུས་ད་ལྟ་བར་དུ་བསྐྱངས་པ་དེར་།།
སེམས་གཏིང་ནས་ཐུགས་རྗེ་ཆེ་ཞེས་ཞུ།།
ཁྱེད་རྣམས་གཉིས་ཚེ་རིང་ནད་མེད་ཤོག།

དྲིན་ང་ཡིས་བསམས་ནས་བཀའ་དྲིན་ཚོར།།
བདག་ང་ཡིས་ཕ་མ་གཉིས་པོ་ལ།།
ལུས་ང་ཡིས་གང་ཅོག་ཞབས་སྤྱི་ཞུ།།
དེ་ཚེ་རབས་འདི་ཡི་དམ་བཅའ་ཡིན།