ཀུན་དགའ་གཞན་ཕན།འཛིན་གྲྭ་བཞི་པ། སཾ་བྷོ་ཊ་སྤུ་རུ་ཝ་ལ་ཉིན་སློབ། ང་ཞོགས་པ་སྔ་པོ་ལངས་ཏེ་གདོང་པ་དང་སོ་བཀྲུས་ནས་གྱོན་ཆས་གྱོན་པ་དང་དེ་རྗེས་ང་ཚོ་ལ་གཉེར་པ་ལགས་ཀྱི་མོ་ཊ་འཁྱེར་ནས་ཁ་ཟས་ལེན་དུ་འགྲོ་བ་མོ་ཊ་ནས་ཕྱི་ལ་ཐོན་པ་དང་། ཁ་ཟས་ཡར་བཀྱགས་ཏེ་མོ་ཊ་ཡི་ཕྱི་ལ་བཞག་པ་དང་གཉེར་པ་ལགས་དང་ང་ཚོ་མོ་ཊ་ལ་འཛུལ་ནས་འགྲོ་བ་ཡིན། དེ་རྗེས་དགོན་པ་སླེབས་མ་ཐག་ང་ཚོ་ཚང་མ་མཉམ་དུ་བསྡད་ནས་ཚོགས་བཟོས་པ་དང་ང་ཚོ་སློབ་ཕྲུག་ཚང་མ་ལོ་གསར་པ་ལ་ན་བཟའ་གྱོན་ནས་དགོན་པ་ནང་ལ་འཛུལ་བ་ཡིན། ང་ཚོ་སམ་བྷོ་ཊ་སྤུ་རུ་ཝ་ལའི་སྐུ་ངོ་ལགས་དང་སློབ་གྲྭ་ཡི་དགེ་རྒན་ལས་བྱེད་ཕེབས་པ་དང་ངས་བརྩེ་བའི་གྲོགས་པོ་བསྟན་འཇིན་སྨོན་སྒྲོལ་དང་ལྷན་དུ་ཁུ་སིམ་སིམ་ངང་སྐད་ཆ་ཤད་ནས་བསྡད་པ་ཡིན། དཀོན་གཉེར་ལགས་ཀྱིས་ཇ་བླུག་དུ་རྒྱུག་ལབ་པ་དང་ངས་ལགས་སོ་ལབ་ནས་ཇ་ཁྱེར་ནས་ཡོང་དུས་ཨ་ཅག་ཅིག་གིས་རོགས་པ་བྱས་པ་དང་། དེ་རྗེས་ང་ཚོ་ཡི་དགེ་རྒན་མཐོང་བ་དང་ངས་ལོ་གསར་ལ་བཀྲ་ཤིས་བདེ་ལེགས་ཞུས་པ་ཡིན། གཉེར་པ་ལགས་ལ་སྡེར་མ་ཡོད་ལབ་པ་དང་གཉེར་པ་ལགས་ཀྱིས་སྒམ་ནས་བཏོན་ནས་སྦྲད་པ་དང་། ངས་དགོན་པ་ནང་དུ་ཁྱེར་ནས་འགྲོ་སྐབས་དཀོན་གཉེར་ལགས་ཀྱིས་ཕེབས་ཤོག་ལབ་པ་དང་མི་རྒན་པ་ལ་སྡེར་མ་རེ་རེ་སྦྲད་ནས་ཕྱི་ལ་དོན་པ་ཡིན། མ་བྱན་ལགས་ཀྱིས་ང་ཚོའི་ཆེད་དུ་ཁ་ལག་བཟོས་ནས་སྦྲད་པ་དང་ང་དང་གྲོགས་པོ་མཉམ་དུ་བསྡད་ནས་ཁ་ལག་བཟས་ནས་ཕྱི་ལ་དོན་མ་ཐག་སྤྲིན་པ་དུང་ལས་དཀར་བ་ཞིག་མཐོང་བ་དང་། ངས་རྩེ་བའི་བལ་ཡུལ་གི་གྲོགས་པོ་སླེབས་པ་དང་ཏོག་ཙམ་སྐད་ཆ་བཤད་ནས་བསྡད་དུས་གུང་སེང་རྫོགས་པ་དང་དགོན་པ་ཡི་ནང་ལ་གྲོགས་པོ་དང་མཉམ་དུ་བསྡད་ནས་དཔེ་ཆ་བཀླགས་པ་ཡིན། དེ་རྗེས་ང་ཚོ་ཚང་མ་དཔེ་ཆ་བཀླགས་ནས་ཉལ་ཁང་དུ་འབྱོར་བ་དང་ཁྲུས་ཁང་ནང་དུ་འཛུལ་ནས་གཟུགས་པོ་བཀྲུས་རྗེས་རྒན་བདག་གི་མགྱོགས་པོ་ཤོག་ལབ་པ་དང་། ངས་ལགས་སོ་ལབ་ནས་རྒན་བདག་གི་ཉལ་ཁང་དུ་འཛུལ་མ་ཐག་ངས་བརྩེ་གདུང་ཆེ་བའི་གཅེན་པོ་ལགས་ཀྱི་རྐང་པ་ཕྱི་ནས་མགྱོགས་པོ་ནང་ལ་འཛུལ་ནས་སྒོ་བརྒྱབ་པ་དང་སོ་སོའི་ཉལ་ཁྲི་སྟེང་དུ་ཁུ་སིམ་སིམ་ངང་ཉལ་བ་ཡིན།

ཀརྨ་བསོད་ནམས།འཛིན་གྲྭ་གསུམ་པ། ཀེ་ལཱཤ་པུ་ར་སཾ་བྷོ་ཊ་ཉིན་སློབ། ངའི་ཕ་ཡུལ་ནི་བོད་ཡིན། བོད་ཀྱི་རྒྱལ་ས་ནི་ལྷ་ས་རེད། བོད་ལ་ཆོལ་ཁ་གསུམ་ཡོད། དེ་དག་ནི་མདོ་སྟོད། མདོ་སྨད། དབུས་གཙང་བཅས་ཡིན། བོད་ནི་ས་ཆ་མཐོ་པོ་ལ་ཆགས་ཡོད་པས། དེ་ལ་མཐོ་སྒང་ཡང་ཟེར། ང་ཚོ་བོད་ནི་རྒྱལ་ཁབ་གཞན་ལྟར་ལོ་རྒྱུས་ཅན་གྱི་རྒྱལ་ཁབ་ཅིག་ཀྱང་ཡིན། བོད་ལ་རྒྱལ་པོ་ཁྱོན་བསྡོམས་བཞི་བཅུ་ཞེ་གཉིས་བྱུང་ཡོད། དེ་ཡི་ནང་ནས་རྒྱལ་པོ་ཐོག་མ་ནི་གཉའ་ཁྲི་གཙན་པོ་ཡིན། རྒྱལ་པོ་གཉའ་ཁྲི་གཙན་པོ་ནས་རྒྱལ་པོ་ཁྲི་རལ་པ་ཅན་བར་རྒྱལ་པོ་ཚང་མས་བོད་ཀྱི་དོན་དུ་སྐུ་ལས་གང་མང་བསྐྱོན་ཡོད། ཡིན་ཡང་རྒྱལ་པོ་མཐའ་མ་འུ་དུམ་གཙན་པོའི་སྐབས་བོད་ལ་གྱོང་ཆེན་པོ་བྱུང་ཡོད། བོད་ཀྱི་རྒྱལ་པོ་དེ་དག་ནས་རྒྱལ་པོ་སྲོང་བཙན་སྒམ་པོ་དང་རྒྱལ་པོ་ཁྲི་སྲོང་ལྡེའུ་བཙན། རྒྱལ་པོ་ཁྲི་རལ་པ་ཅན་ལ་ཆོས་རྒྱལ་མེས་དབོན་རྣམ་གསུམ་ཡང་ཟེར། ཁོང་གསུམ་གྱིས་བོད་ཀྱི་ནང་ཆོས་ཆེད་དུ་སྐུ་ལས་ཧ་ཅང་མང་པོ་བསྐྱོན་ཡོད། དུས་རབས་བདུན་པའི་ནང་ཆོས་རྒྱལ་སྲོང་བཙན་སྒམ་པོས་བློན་པོ་ཐོན་མི་སཾ་བྷོ་ཊ་རྒྱ་གར་ལ་ལོ་དྲུག་རིང་སློབ་སྦྱོང་སྦྱང་དུ་བཏང་བ་རེད། དེ་ནས་ཐོན་མི་ཁོང་བོད་དུ་འབྱོར་ནས་བོད་ཀྱི་ཡི་གེ་བཟོས་པ་རེད། སྟབས་མ་ལེགས་པ་ཞིག་ལ་ངའི་ཕ་ཡུལ་བོད་ནི་ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་བོད་རང་བཙན་རྒྱ་ནག་གི་ལག་ཏུ་ཤོར། བོད་ནི་རྩ་ཆུ་བཟང་བའི་ཡུལ་ལྗོངས་ཡིན། བོད་ལ་རྒྱུག་ཆུ་སྣ་ཁ་མང་པོ་ཡོད། དེ་དག་ནི་རྟ་མཆོག་ཁ་བབ་དང། སེང་གེ་ཁ་བབ། རྨ་བྱ་ཁ་བབ། གླང་ཆེན་ཁ་བབ་བཅས་ཡིན། ངའི་ཕ་ཡུལ་བོད་ལ་དགོན་པ་ཡང་སྣ་ཚོགས་ཡོད། དེ་དག་ནི་བསམ་ཡས་གཙུག་ལག་ཁང། སེ་ར། འབྲས་སྤུངས། བཀྲ་ཤིས་ལྷུན་པོ། དགའ་ལྡན་བཅས་ཧ་ཅང་མང་པོ་ཡོད། བོད་ཀྱི་ཆོས་དང་ལམ་ལུགས་སྲོལ་སོགས་ཁྱིམ་མཚེས་རྒྱལ་ཁབ་ཁག་ནས་བླངས་ཡོད་པ་དང་དེ་དག་དང་ལྷན་དུ་འབྲེལ་བ་ཡག་པོ་བཞག་ཡོད། བོད་ཀྱི་ཁྱིམ་མཚེས་རྒྱལ་ཁག་ནི་རྒྱ་གར་དང་འབྲུག བལ་ཡུལ། རྒྱ་ནག ཤར་ཏུར་ཀིས་ཏན། སོག་པོ་བཅས་ཡིན། བོད་ལ་ཕོ་བྲང་ཡང་མང་པོ་ཡོད། དེའི་ནང་ནས་ཐོག་མ་ནི་ཡུམ་བུ་བླ་ཁང་དང་། ཕོ་བྲང་པོ་ཏ་ལ། ཕོ་བྲང་པོ་ཏ་ལ་ནི་༸གོང་ས་མཆོག་གི་དགུན་ཁའི་བཞུགས་ས་ཡིན། དེ་བཞིན་དབྱར་ཁར་ཁོང་ནོར་བུ་གླིང་ག་རུ་བཞུགས་ཀྱི་ཡོད། ངའི་ཕ་ཡུལ་བོད་ནི་འཛམ་གླིང་ནང་ནས་ལུང་པ་སྐྱིད་ཤོས་ཤིག་ཡིན། ངའི་ཕ་ཡུལ་ལ་ཟས་ཞིམ་ཤོས་དང་། ཆུ་གཙང་ཤོས་རག་གི་ཡོད། ད་དུང་ང་ཚོའི་ཕ་ཡུལ་བོད་ནས་རྒྱལ་ཁབ་མང་པོ་ལ་ཆུ་རྒྱུག་གི་ཡོད། སོང་ཙང་ཁོར་ཡུག་ལས་འགུལ་བ་མང་པོ་ཞིག་གིས་བོད་ཀྱི་ཁོར་ཡུག་སྲུང་སྐྱོབ་བྱ་དགོས་པའི་ལས་འགུལ་དང་གསལ་བསྒྲགས་མང་པོ་བྱས་དང་བྱེད་མུས་རེད། […]

གསལ་ལྡན་དོན་གྲུབ།བདེ་སླར་སི་ཝི་པི་སཾ་བྷོ་ཊ་ཉིན་སློབ། འཛིན་གྲྭ་ལྔ་པ། མིའི་མི་ཚེའི་ནང་གལ་ཆེ་བ་ནི་ཕ་མ་ཡིན། ཕ་མས་ང་ཚོར་མི་ལུས་རིན་ཆེན་འདི་གནང་བ་དང་། ཨ་མས་རང་གི་བྲང་གི་འོ་མ་སྤྲད་ནས་གསོས་པ་ཡིན། ཕ་མས་ཉིན་མཚན་མེད་པར་ང་ཚོར་བྱམས་སྐྱོང་གནང་། ཕ་མའི་བྱམས་བརྩེ་མེད་ན་ང་ཚོ་སྐྱེས་ན་ཡང་གསོན་མི་ཐུབ། གསོན་ན་ཡང་དཀའ་སྡུག་གྲངས་མང་པོ་མྱོང་དགོས་པ་ཡིན། དྲིན་ཆེན་ཕ་མས་ང་ཚོར་ཕྱག་ཟུང་འཇམ་པས་གཉོར་སྐྱོང་བྱེད་བཞིན། ཞིམ་པོའི་ཟས་དང་འཇམ་པོའི་གོས་གཡོག་ནས་ཆེན་པོ་ཆགས་སུ་བཅུག ཕྱག་ཟུང་འཇམ་པོས་འཇུས་ཏེ་གོམ་པ་རེ་རེ་བཞིན་སྤོ་བར་སློབ་ཁྲིད་གནང་། བཀའ་དྲིན། ང་ཚོས་ཕ་མའི་བཀའ་དྲིན་ཤེས་དགོས། འཛམ་གླིང་ནང་བུ་གུ་མང་པོར་ཆུང་དུས་ནས་ཕ་མ་མེད། དེ་བས་ཁོ་ཚོས་ཕ་མའི་བཀའ་དྲིན་དངོས་སུ་མི་ཤེས། ང་ཚོས་ཕ་མ་ཡོད་དུས། རང་སོ་སོའི་ཕ་མའི་བཀའ་དྲིན་དྲན་དགོས། ང་ཚོ་ཕ་མ་མཉམ་དུ་ཡོད་དུས་ནི་སོ་སོ་བསོད་ནམས་ཆེ་བའི་དུས་དེ་ཡིན། ཕ་མ་མེད་པའི་ད་ཕྲུག་ཚོར་ལྟོས་དང་། ཁ་ཤས་ལ་ཕ་མ་མེད། ཁ་ཤས་ལ་ཕ་མ་དང་ནང་ཡང་མེད། ང་ཚོས་ཕ་མ་ཡོད་པ་ནི་སོ་སོས་བསོད་ནམས་ཆེན་པོ་ཡིན་པ་ཤེས་དགོས། ཕ་མ་ཡོད་དུས། ཕ་མའི་བཀའ་དྲིན་ཤེས་པ་དང་དྲིན་ལན་འཇལ་དགོས།  ང་ཚོས་ཕ་མ་ལ་རོགས་པ་ཅུང་ཙམ་བྱས་ན་ཡང་ཕ་མ་དགའ་གི་རེད། ཆུང་དུས་སྐབས་སུ་ཕ་མས་རང་ལ་འོ་མ་སྤྲད། ཟ་རྒྱུ་དང་འཐུང་རྒྱུ། རྩེད་ཆས་དང་གོན་པ་སོགས་ཅ་ལག་གང་ཡག་ཡག་དང་ཅི་དགོས་དགོས་ཉོས། ཁོ་ཚོ་དཀའ་སྡུག་ཆེན་པོའི་ནང་ཡོད་ན་ཡང་། དཀའ་སྡུག་དེ་མི་ཚོར། དེ་ནི་བུ་གུ་ལ་བརྩེ་བ་ཆེན་པོ་ཡོད་པས་ཡིན། བུ་གུའི་ཆེད་དུ་ལས་ཀ་འདྲ་མིན་བྱས། ལས་ཀ་མང་ཆེ་བ་ནི་བུ་གུའི་དགའ་ཡ་རྐྱང་བྱས་པ་རེད། གང་ཡིན་ཟེར་ན་ཕ་མ་རང་གི་བུ་གུ་ལ་གཞན་ལས་མང་བ་བརྩེ་བ་ཆེ་ཞིང་དགའ་ཡི་ཡོད། ཕ་མའི་དཀའ་སྡུག ཕ་མ་ནི་བུ་གུའི་མི་ཚེ་གཡོག་པོ་ལྟར་ཉིན་མོ་ལས་ཀ་མང་པོ་བྱེད་ཀྱི་ཡོད། ང་ཚོ་མཚན་མོ་གཉིད་ཁུག་སྐབས་སུ་ངུ་དུས་ཕ་མ་ཡར་ལངས་ནས་གཉིད་མ་ཁུག་པར་ང་ཚོར་ལ་གཅེས་སྐྱོང་གནང་། ཉིན་མོ་ལས་ཀ་མང་པོ་བྱས། མཚན་མོ་གཉིད་ཀྱང་མ་ཁུག་པར་བུ་གུར་བྱམས་སྐྱོང་གནང་གི་རེད། དེ་བས། ཕ་མའི་བཀའ་དྲིན་དེ་དག་དྲན་བཞིན་ཕ་མར་དྲིན་འཇལ་དགོས་པ་རེད། ཕ་མའི་དམིགས་ཡུལ། ཕ་མ་ཚང་མའི་དམིགས་ཡུལ་ནི་སོ་སོའི་ཕྲུ་གུ་གཟུགས་པོ་བདེ་ཐང་ངང་སྤྱང་པོ་དང་རིག་པ་ཡག་པོ། སེམས་བཟང་པོ་དང་གཤིས་ཀ་འཇམ་པོ། སློབ་སྦྱོང་ཡག་པོ་བྱས་ཏེ་མི་ཚེ་བདེ་སྐྱིད་ལྡན་པ་ཞིག་ཆགས་པར་ཉིན་ལྟར་རེ་བ་དང་སྨོན་ལམ་འདེབས་ཀྱིས་ཡོད། ང་ཡི་ཕ་མ། ང་ཡི་ཕ་མ་གཉིས་ཀ་འབུམ་རམས་པ་སློབ་སྦྱོང་བྱས་པ་དང་། མཐོ་རིམ་སློབ་གྲྭའི་དགེ་རྒན་དང་ལས་བྱེད་ཡིན། ང་ཚོའི་ནང་དུ་བོད་ཡིག་དང་དབྱིན་ཡིག རྒྱ་ཡིག་བཅས་ཀྱི་དཔེ་དེབ་བརྒྱ་ཕྲག་མང་པོ་ཡོད། ཕ་མ་གཉིས་ཀྱིས་དུས་རྒྱུན་ལས་ཁུངས་ཀྱི་ལས་ཀ་གྲོལ་ནས་ནང་དུ་སླེབས་ཚེ། དུས་ཚོད་གང་ཡོད་བཏོན་ནས་དཔེ་ཀློག་བྱེད། ང་ལ་ནུ་བོ་དང་གཅུང་མོ་ཆུང་ཆུང་མཚེས་པ་ཞིག་ཡོད། ཕ་མ་གཉིས་ཀྱིས་ལས་བྲེལ་ཧ་ཅང་ཆེ་བའི་མི་ཚེའི་ཁྲོད་བུ་གུ་གསུམ་ལ་ལྟ་སྐྱོང་དང་། ལས་ཁུངས་ཀྱི་ལས་ཀ་བྱེད་པ། […]

འཕྲིན་ལས་ལྷ་མོ།བདེ་སླར་སི་ཝི་པི་སཾ་བྷོ་ཊ་ཉིན་སློབ། གཞི་བར་བོད་དགེ། སྔོན་གླེང་།      སྤྱིར་འཛིན་གྲྭའམ་འཛིན་ཁང་ནི། མ་རིག་པའི་མུན་པ་སེལ་བའི་གནས་རྩ་ཆེ་ཤོས་ཤིག་ཡིན་ཞིང་། འཛམ་གླིང་འདི་ཡི་སྟེང་གི་སྐྱེས་བུ་རླབས་ཆེན་སུ་འདྲ་ཞིག་ཡིན་རུང་འཛིན་ཁང་ཞིག་བརྒྱུད་ནས་དགེ་རྒན་མ་བསྟེན་པ་ཞིག་ཧ་ལམ་མེད་ལ། མི་ཞིག་གི་རིག་རྩལ་ཡོངས་སུ་རྫོགས་ས་དང་རྣམ་དཔྱོད་ཀྱི་བློ་མིག་འབྱེད་ས་ཡང་ཡིན། བྱས་ཙང་དགེ་རྒན་ཞིག་ལ་མཚོན་ན་འཛིན་གྲྭ་སྟངས་འཛིན་ཡང་དག་པ་བྱ་ཐུབ་རྒྱུ་ནི་ཧ་ཅང་གི་གལ་ཆེན་པོ་ཞིག་ཡིན། འོན་ཀྱང་དགེ་རྒན་ཞིག་ལ་རང་ཉིད་ཀྱི་འཁྲིད་བྱའི་སློབ་ཚན་ཐོག་ཤེས་ཚད་ལྡང་ངེས་ཤིག་ཡོད་ནའང་འཛིན་གྲྭ་སྟངས་འཛིན་ལེགས་པར་བྱ་ཐུབ་པའི་ངེས་པ་མེད། གང་ཡིན་ཟེར་ན། དགེ་རྒན་མི་གཅིག་གིས་སྟངས་འཛིན་བྱ་ཡུལ་གྱི་ཕྲུ་གུ་ཚོའི་སྡོད་སའི་སྤྱི་ཚོགས་དང་། འཚར་ལོངས་བྱུང་སའི་ཁོར་ཡུག སྤྱི་ཚོགས་ཀྱི་སློབ་གསོ་དང་། ཁྱིམ་ཚང་གི་སློབ་གསོ་བཅས་ཆ་ཚང་ལ་ཁྱད་པར་ཡོད་པས། སློབ་མའི་སྒོ་གསུམ་ཡོད་ཚད་ལ་སྟངས་འཛིན་བྱས་ནས་སློབ་མ་ཡོད་ཚད་ཡང་དག་པའི་ཤེས་སྤྱོད་གཉིས་ལྡན་ཞིག་བསྐྲུན་པར་བྱ་བ་ནི་ཧ་ཅང་གི་གནད་འགག་ཆེ་ལ་ཧ་ཅང་གི་བྱ་དཀའ་བའི་ལས་ཀ་ཞིག་ཀྱང་ཡིན།      དེར་བརྟེན་ངའི་བློ་ངོར་མཚོན་ན་དགེ་རྒན་ཞིག་ལ་མཚོན་ན་འཛིན་གྲྭ་སྟངས་འཛིན་བྱེད་སྟངས་ཡག་པོ་ཡོང་བ་ལ་ལོ་མང་གི་སློབ་ཁྲིད་ཀྱི་ཉམས་མྱོང་དགོས་འདུག་སྙམ། རང་ཉིད་ལ་མཚོན་ན་དགེ་རྒན་གསར་བུ་བ་ཞིག་ཡིན་པའི་ཆ་ནས་འཛིན་གྲྭ་སྟངས་འཛིན་ཡག་པོ་ཡོང་ཆེད་སློབ་གཉེར་བྱ་རྒྱུ་ནི་ཧ་ཅང་གི་གལ་ཆེན་པོ་ཞིག་མཐོང་གི་འདུག དེར་བརྟེན། ད་རེས་རྩོམ་ཡིག་འདི་འབྲི་བའི་གོ་སྐབས་དང་སྦྲགས། དགེ་བའི་བཤེས་གཉེན་རྒན་གྲས་རྣམས་ལ་ལམ་སྟོན་ཞུ་བ་དང་དྲ་རྒྱའི་ཐོག་ནས་སློབ་གཉེར་བྱས་ནས་བརྗོད་གཞི་འདི་ཡི་ཐོག་དོན་ཚན་འགའ་ཡི་ཐོག་རང་ནུས་ཅི་ལྕོགས་ཀྱིས་ཙུང་ཙམ་སྤྲོ་བ་ལགས། དང་པོ། འཛིན་གྲྭ་སྟངས་འཛིན་བྱེད་སྟངས་ཞེས་པ་དེར་ངོས་འཛིན་བྱེད་ཚུལ།      འཛིན་གྲྭ་སྟངས་འཛིན་ཞེས་པ་ནི། དགེ་རྒན་ཞིག་གིས་བཙན་ཐབས་དང་དྲག་པོའི་སྒོ་ནས་འཛིན་ཁང་ནང་སློབ་མ་ཡོད་ཀྱང་ཁུ་སིམ་པོར་སྡོད་བཅུག་པ་དེ་འདྲ་མ་ཡིན། གང་ཡིན་ཟེར་ན་སློབ་མ་ཁུ་སིམ་པོར་སྡོད་པ་དེས་སློབ་མའི་བཤད་རྩལ་དང་ཉན་རྩལ་ཡར་རྒྱས་ནམ་ཡང་མི་འགྲོ་ཞིང་། དགེ་སློབ་ཕན་ཚུན་སློབ་ཚན་དང་འབྲེལ་བའི་གནད་དོན་གང་ལ་ཡང་བགྲོ་གླེང་བྱེད་པའི་གོ་སྐབས་དབེན་པ་དང་། མ་ཤེས་པ་དག་ཁ་གསལ་བཟོ་སླད་དྲི་བ་འདྲི་མི་ནུས་པ་ལ་སོགས་པའི་སྐྱོན་ཆ་མང་དག་ཞིག་མཆིས།དེ་ལས་ལྡོག་སྟེ་དགེ་རྒན་ཞིག་གིས་སློབ་ཚན་འཆར་འགོད་ཡང་དག་པའི་སློབ་ཁྲིད་ཀྱི་ཐབས་ལམ་ལ་བརྟེན་ནས་སློབ་མ་ཚོས་སོ་སོའི་ཤེས་རབ་འགུལ་བ་དང་། གནད་དོན་ལ་བསམ་གཞིགས་གཏོང་བ། རིགས་འདེད་བྱེད་པ། བརྡར་ཤ་གཅོད་པ། དོགས་པ་དང་དཀའ་གནད་སློབ་མ་ཕན་ཚུན་གྲོས་སྡུར་རམ་དགེ་རྒན་ལ་དྲི་བ་སྐུལ་བ་བཅས་འཁྲིད་བྱའི་སློབ་ཚན་དང་འབྲེལ་བའི་བྱེད་སྒོ་ཁག་ལ་དགའ་ཞིང་སྤྲོ་བའི་སྒོ་ནས་ཞུགས་ནས་འཛིན་ཁང་ནང་དགེ་སློབ་གཉིས་ཀ་ཚ་ཚ་འུར་འུར་ངང་ཤེས་སྤྱོད་གཉིས་ཀ་ཡར་རྒྱས་འགྲོ་ཐབས་ལ་འབད་པ་དེ་འདྲ་ཞིག་ལ་གོ་ན་མི་འགྲིག་པ་མེད་སྙམ། གཉིས་པ། འཛིན་གྲྭ་སྟངས་འཛིན་ཡག་པོ་ཡོང་བའི་འགོག་རྐྱེན་ངོས་འཛིན།      གནས་སྔ་མོའི་དུས་སུ་ནང་ཆོས་ནས་གསུངས་པ་ལྟར་ན། སློབ་འཁྲིད་བྱེད་མཁན་དགེ་རྒན་འདི་དགེ་བའི་བཤེས་གཉེན་གྱི་མཚན་ཉིད་བཅུ་དང་ལྡན་པ་ཞིག་དང་། སློབ་མ་ནི་སྣོད་ཀྱི་སྐྱོན་གསུམ་དང་བྲལ་བ་ཞིག་དགོས་ཚུལ་གསུང་གི་ཡོད། འོན་ཀྱང་དེང་གི་ཆར་འཛིན་ཁང་ནང་སློབ་མ་སྣོད་ལྡན་ཡིན་རུང་མིན་རུང་སློབ་མ་ཡོད་དོ་ཅོག་འཛིན་ཁང་གཅིག་གི་ནང་སློབ་གཉེར་བྱེད་ཀྱི་ཡོད། སློབ་མ་ཕལ་མོ་ཆེས་དགེ་རྒན་གྱིས་སློབ་ཁྲིད་བྱེད་དུས་སློབ་ཕྲུག་ནང་ཕན་ཚུན་སྐད་ཆ་བཤད་ནས་སློབ་ཕྲུག་དོ་སྣང་ཅན་དག་ལ་གནོད་སྐྱེལ་བ་དང་། དགེ་རྒན་གྱིས་འཁྲིད་བྱའི་སློབ་ཚན་ལ་དབྱིངས་རྩ་བ་ནས་མེད་པ། ཡང་སློབ་ཕྲུག་ལ་ལ་ནི་དགེ་རྒན་གྱི་སློབ་ཁྲིད་བྱེད་དུས་གཉིད་ཡུར་ནས་བསྡད་དེ་ཅི་ཡང་དོ་སྣང་མེད་པ་དང་། སློབ་མ་འགའ་རེས་ག་དུས་ཡིན་ནའང་འཛིན་གྲྭའི་བྱེད་སྒོ་ཁག་དང་ནང་སྦྱོང་དང་ལས་འཆར་གང་འདྲ་ཞིག་ལ་མཉམ་ཞུགས་མ་བྱས་པར་གཡོལ་གང་ཐུབ་བྱེད་ཀྱི་ཡོད།      ཆེས་དཀའ་ངལ་ཆེ་ཤོས་ཞིག་ནི་སློབ་མ་ལ་ལས་དགེ་རྒན་ལ་ཁ་ལན་སློག་པ་དང་། དགེ་རྒན་ལ་དགེ་རྒན་གྱི་འདུ་ཤེས་མེད་པར་རང་སྣང་གང་དྲན་བྱེད་པར་མ་ཟད། སློབ་ཕྲུག་ནང་ཕན་ཚུན་ལ་འཆམ་མཐུན་རྩ་བ་ནས་བྱེད་ཀྱི་མེད། དེར་བརྟེན། དགེ་རྒན་ཞིག་གིས་འཛིན་གྲྭ་སྟངས་འཛིན་ཡང་དག་པ་ཞིག་མི་ཡོང་བའི་འགོག་རྐྱེན་དེ་དག་ངོས་བཟུང་བའི་ཐོག རང་རང་གི་རྣམ་དཔྱོད་ཀྱི་རྩལ་གྱིས་ཡང་དག་པའི་འཛིན་གྲྭ་སྟངས་འཛིན་བྱེད་ཐབས་ལ་བརྟེན་ནས་དཀའ་ངལ་དག་སེལ་ཐབས་བྱ་བ་ལགས། གསུམ་པ། འཛིན་གྲྭ་སྟངས་འཛིན་ལེགས་པར་བྱེད་དགོས་པའི་དགོས་དམིགས།      འཛིན་གྲྭ་ནི་སློབ་མ་ཞིག་ལ་མཚོན་ན། མི་ཚེའི་ནང་དུས་ཚོད་མང་ཤོས་གཏོང་སའི་ཁང་མིག་ཅིག་ཡིན། ཁང་མིག་འདི་ནི་ཆེས་རིན་ཐང་ཆེ་ཤོས་ཞིག་ཡིན་པ་ཤེས་དགོས་ལ། དགེ་སློབ་གཉིས་ཀྱིས་ཡང་དག་པའི་སྟངས་འཛིན་འོག་སློབ་གཉེར་ལ་བརྟེན་ནས་ཡིག་རྨོངས་སེལ་བ་དང་། ཤེས་བྱའི་གནས་མང་པོར་བློ་གྲོས་རྒྱས་ས་ཞིག་ཀྱང་ཡིན། དགེ་རྒན་གྱིས་སློབ་མའི་ཁམས་དང་མོས་པ་སོགས་འཚམ་པའི་བསམ་བློའི་སློབ་གསོ་ལ་བརྟེན་ནས། སློབ་མའི་མི་གཤིས་ཀུན་སྤྱོད་བཟང་ཕྱོགས་ལ་འགྱུར་བ་རླབས་ཆེན་གཏོང་ཐུབ་པ་དང་། གཞན་ཡང་དགེ་རྒན་གྱིས་སྟངས་འཛིན་འོག་སློབ་ཁྲིད་དང་འབྲེལ་བའི་བྱེད་སྒོ་རབ་དང་རིམ་པ་བརྒྱུད་ནས། སློབ་མས་མི་དང་མིའི་དབར་གྱི་འབྲེལ་ལམ་བྱེད་སྟངས་ཤེས་པ་མ་ཟད། མི་གཞན་གྱི་དཀའ་ངལ་ལ་བསམ་ཤེས་དང་དཀའ་ངལ་ལ་གདོང་ལེན་བྱེད་སྟངས་ལ་སོགས་པའི་གོམས་གཤིས་བཟང་པོ་འཇོག་ས་ཞིག་ཡིན།      རྒྱུ་མཚན་མང་དག་ཅིག་ལ་བརྟེན་ནས་ཡང་དག་པའི་འཛིན་གྲྭ་སྟངས་འཛིན་བྱ་རྒྱུ་ནི་ཧ་ཅང་གི་དགོས་དམིགས་ཆེན་པོ་ཡོད། གལ་ཏེ་འཛིན་གྲྭ་སྟངས་འཛིན་ཡག་པོ་ཞིག་མ་བྱུང་བ་དང་། སློབ་མ་ལེགས་པར་གཅུན་མ་ཐུབ་པའམ་ལེགས་ལམ་དུ་སྣེ་ཁྲིད་བྱེད་མ་ཐུབ་ཚེ། […]

ཐག་གཅོད་ཚེ་རིང།གཞི་རིམ་གོང་མའི་བོད་དགེ། ཤིམ་ལ་སཾ་བྷོ་ཊ་གཏན་སློབ།       ༄༅། །འཛིན་གྲྭར་དོ་དམ་ནུས་པ་ལྡན་པ་ཞིག་བྱེད་པར་སློབ་ཕྲུག་ཚོར་གཙོ་བོར་ཀུན་སློང་བྱམས་བརྩེའི་ངོ་བོ་ཐོག་ནས་སློབ་སྦྱོང་ལ་འཇུག་རྒྱུ་དང་། བརྩི་བཀུར་བྱེད་རྒྱུ། སློབ་སྦྱོང་བྱེད་རྒྱུར་སྐུལ་སློང་བྱེད་རྒྱུའི་ཚོར་སྣང་ཡོང་བའི་སློབ་སྦྱོང་གི་ཁོར་ཡུག་ལེགས་པོ་ཞིག་བསྐྲུན་དགོས། འདིར་འཛིན་གྲྭར་དོ་དམ་བྱེད་པ་དང་ནང་སྦྱོང་ལ་སྐུལ་སློང་བྱེད་པའི་འགྲེལ་བཤད་ཞིབ་ཕྲ་འགའ་ཤས་ཡོད། ༡།  རེ་བ་གསལ་པོ་བཟོ་བ།       ཀ)  སློབ་གྲྭའི་ལོ་འཁོར་རམ་སློབ་དུས་འགོ་འཛུགས་སྐབས་སྤྱོད་ལམ་དང་། མཉམ་ཞུགས། ནང་སྦྱོང་གི་ཐོག་ལ་རེ་བ་གང་ཡོད་རྣམས་རགས་རིམ་ཙམ་བཀོད་དགོས།       ཁ)  རེ་བ་འདི་དག་ངག་ཐོག་དང་ཡིག་ཐོག་གཉིས་ཀར་གསལ་པོར་བརྡ་སྤྲོད་དགོས། དེ་ཡང་འཆར་གཞིའི་ཡིག་ཆའམ་འཛིན་གྲྭའི་སྒྲིག་ལམ་གྱི་སྦྱར་ཡིག་གི་ཐོག་ནས་གསལ་པོར་བརྡ་སྤྲོད་དགོས།       ག)  རེ་བ་འདི་དག་མ་བསྒྲུབས་ན་འབྱུང་རྒྱུའི་འབྲས་བུ་དང་། དེ་དག་བསྒྲུབས་ན་ཐོབ་པའི་བྱ་དགའ་བཅས་སློབ་ཕྲུག་སོ་སོས་ཤེས་རྟོགས་ཐུབ་པ་བཟོ་དགོས། ༢།  འབྲེལ་ལམ་འཛུགས་སྐྲུན་བྱེད་པ།       ཀ)  སློབ་ཕྲུག་སོ་སོར་རྒྱུས་ལོན་བྱེད་པའི་དུས་ཚོད་གཏོང་དགོས། ཁོང་ཚོའི་མི་ཚེ་དང་དགའ་ཕྱོགས་དམིགས་ཡུལ་བཅས་ལ་དོ་སྣང་ངོ་མ་དགོས་པ་སྟོན་དགོས།      ཁ)  སློབ་ཕྲུག་ཚོར་དྲི་བ་འདྲི་རྒྱུ་དང་རང་འདོད་བརྗོད་རྒྱུར་བདེ་བའི་ཚོར་སྣང་ཡོང་བའི་འཛིན་གྲྭའི་ཁོར་ཡུག་ནང་རྒྱབ་སྐྱོར་ལྡན་ཞིང་ཀུན་འདུས་ཀྱི་རིག་གཞུང་ཞིག་བསྐྲུན་དགོས།      ག)  རྩོད་རྙོག་དང་གནད་དོན་གང་འདྲ་ཞིག་འཕྲལ་དུ་དྲང་བདེན་གྱི་ཐོག་ནས་ཐག་གཅོད་བྱ་རྒྱུ་དང་། གུས་བརྩི་དང་སྐྱིད་སྡུག་མཉམ་མྱོང་གི་བསམ་བློའི་ཐོག་ནས་ཐབས་ལམ་རྒྱུན་སྲིང་བྱ་དགོས། ༣།  སློབ་ཕྲུག་གི་དོ་སྣང་འགུག་པའི་སློབ་ཚན་བཟོ་རྒྱུ།       ཀ)  སློབ་ཁྲིད་ཀྱི་ཐབས་ལམ་སྣ་ཚོགས་དཔེར་ན། གཏམ་བཤད་དང་། བགྲོ་གླེང་། ཚོགས་སྤྱོད་དང་། སྣ་མང་བརྡ་འཕྲིན་གྱི་ངོ་སྤྲོད་སོགས་བེད་སྤྱད་དེ་སློབ་ཕྲུག་གི་སློབ་སྦྱོང་གི་གོམས་གཤིས་དང་དགའ་ཕྱོགས་སྣ་ཚོགས་ལ་འཚམ་པའི་སློབ་ཚན་འཆར་འགོད་བྱ་རྒྱུ།       ཁ)  འབྲེལ་ཡོད་དང་དངོས་ཡོད་ཀྱི་དཔེ་མཚོན་བཀོལ་ནས་རྣམ་གཞག་ཁ་ཡོད་ལག་ཡོད་དུ་ལག་བསྟར་བྱེད་ཚུལ་གསལ་སྟོན་བྱས་ཏེ། སློབ་ཕྲུག་གི་སློབ་སྦྱོང་དེ་དོན་སྙིང་ལྡན་པ་དང་དོ་སྣང་འདྲེན་པ་ཞིག་བཟོ་དགོས།       ག)  ལས་ཀ་དང་འཆར་གཞིའི་ནང་དུ་སློབ་ཕྲུག་ལ་འདེམས་ཀ་དང་རང་དབང་ལྡན་པའི་གོ་སྐབས་སྤྲོད་པ་དང་། སློབ་སྦྱོང་གི་བདག་དབང་གོང་འཕེལ་གཏོང་དགོས། ༤།  འཛིན་ཁང་ནང་གི་སྤྱོད་ལམ་ལ་དོ་དམ་བྱེད་པ།       ཀ)  ཁྱེད་ཀྱི་རེ་བ་དང་མཐུན་པའི་སྒྲིག་ལམ་གྱི་ཐབས་ལམ་གཅིག་གྱུར་དང་དྲང་བདེན་ལག་བསྟར་བྱེད་པ། དེ་དག་གི་ཁོངས་སུ་ཚིག་གི་ཉེན་བརྡ་དང་། དུས་ཚོད་འགོར་འགྱང་། དམིགས་བསལ་ཐོབ་ཐང་བརླག་པ། ཕ་མ་དང་ལྟ་རྟོག་བྱེད་མཁན་མཉམ་ཞུགས་བྱེད་པ་སོགས་ཚུད་ཡོད      ཁ)  འདོད་པའི་སྤྱོད་ལམ་རྣམས་ངོས་འཛིན་དང་ཤུགས་ཆེ་རུ་གཏོང་བར་བསྔགས་བརྗོད་དང་། སེམས་ཤུགས་སྤར་བ། བྱ་དགའ་སྤྲོད་པ་སོགས་བཟང་ཕྱོགས་ཀྱི་ནུས་ཤུགས་སྤེལ་ཐབས་བེད་སྤྱོད་གཏོང་བ།      ག)  སློབ་ཕྲུག་ཚོ་དང་འབྲེལ་ལམ་བྱེད་སྐབས་གུས་ཞབས་དང་བཟོད་བསྲན་མིག་དཔེར་འོས་པ་བྱ་རྒྱུ། ཐ་ན་དཀའ་ངལ་འཕྲད་པའི་གནས་སྟངས་ནང་དུའང་ཞི་འཇམ་དང་བག་ཕེབས་ཀྱི་སྤྱོད་ལམ་རྒྱུན་སྲིང་བྱ་རྒྱུ།      ང)  བཟང་ཕྱོགས་ཀྱི་སློབ་སྦྱོང་གི་ཁོར་ཡུག་བསྐྲུན་རྒྱུ། དྲི་བ་འདྲི་རྒྱུ་དང་རོགས་རམ་འཚོལ་རྒྱུར་སློབ་ཕྲུག་ཚོར་བདེ་སྣང་ཡོང་བའི་འཛིན་ཁང་ནང་བཟང་ཕྱོགས་དང་མཐུན་ཕྱོགས་ཀྱི་ཁོར་ཡུག་བསྐྲུན་རྒྱུ། མཉམ་ལས་དང་ཟླ་གྲོགས་ཀྱི་རྒྱབ་སྐྱོར་ལ་སེམས་ཤུགས་སྤོར་རྒྱུ། ༥།  ཪོགས་སྐྱོར་བསྐྲུན་པ་ནི།       ཀ)  སློབ་སྦྱོང་དང་སེམས་ཁམས་ཀྱི་ཐོག་ནས་དཀའ་ངལ་འཕྲད་མཁན་གྱི་སློབ་ཕྲུག་ཚོར་རོགས་རམ་དང་མཐུན་རྐྱེན་འཕར་མ་མཁོ་སྤྲོད་བྱེད་པ།       ཁ)  སློབ་ཕྲུག་ཚོར་སློབ་ཚན་ནང་དོན་གོ་རིམ་ལྡན་པའི་ཐོག་ནས་འགྲེལ་བརྗོད་དང་སློབ་ཁྲིད་བྱེད་རྒྱུའི་ལམ་སྟོན་གསལ་པོ་བྱེད་རྒྱུ།       ག)  སློབ་ཕྲུག་ཚོར་རོགས་རམ་མཁོ་དུས་རོགས་རམ་འཚོལ་རྒྱུར་སྐུལ་འདེད་གཏོང་རྒྱུ། ལས་ཁུངས་ཀྱི་དུས་ཚོད་དང་འཛིན་གྲྭ་གྲོལ་རྗེས་རོགས་རམ་སྣོན་མ་བྱེད་རྒྱུ། སློབ་ཕྲུག་ལ་ནང་སྦྱོང་སྐུལ་སྟངས།       སློབ་ཕྲུག་ལ་ནང་སྦྱོང་བྱེད་དགོས་པའི་སྐུལ་སློང་བྱེད་པར་སྐུལ་འདེད་དང་། རྒྱབ་སྐྱོར། ཕན་ནུས་ལྡན་པའི་འབྲེལ་ལམ་བཅས་ཀྱི་སྡེབ་སྦྱོར་ཞིག་དགོས། གཤམ་དུ་ཐབས་ལམ་ཁ་ཤས་ཡོད།      ༡།  གལ་ཆེའི་རང་བཞིན་གསལ་འདེབས་བྱེད་པ། ནང་སྦྱོང་མེད་དུ་མི་རུང་བ་ཡིན་པའི་རྒྱུ་མཚན་ཤེས་རྟོགས་ཡོང་བར་སློབ་ཕྲུག་ལ་རོགས་བྱེད་དགོས། དེས་འཛིན་གྲྭའི་ནང་སྦྱངས་པའི་ཤེས་བྱ་རྣམས་སྲ་བརྟན་དུ་གཏོང་ཚུལ་དང་། གནད་འགག་ཆེ་བའི་ནུས་རྩལ་རྣམས་སྐྱེད་སྤེལ་བྱེད་པ། རྒྱུགས་སྤྲོད་ཆེད་གྲ་སྒྲིག་བྱེད་ཚུལ་བཅས་འགྲེལ་བརྗོད་དགོས།      ༢།  རེ་བ་གསལ་པོ་བཟོ་བ། ནང་སྦྱོང་གི་ལས་ཀ་དང་། […]

བསྟན་འཛིན་དབང་ཕྱུགགཞི་རིམ་འོག་མའི་དགེ་རྒན། མན་སྤར་སཾ་བྷོ་ཊ།       འཛིན་གྲྭ་སྟངས་འཛིན་གནང་སྟངས་དང་འབྲེལ་རང་ཉིད་གཞི་རིམ་འོག་མའི་དགེ་རྒན་ཞིག་ཡིན་པའི་ཆ་ནས་གཞི་རིམ་འོག་མའི་འཛིན་གྲྭ་སྟངས་འཛིན་གནང་སྟངས་སྐོར་གླེང་བར་འདོད། གཞི་རིམ་འོག་མའི་འཛིན་གྲྭ་སྟངས་འཛིན་གནང་སྟངས་ནི། བཟང་ཕྱོགས་དང་གྲུབ་འབྲས་ལྡན་པའི་སློབ་གཉེར་གྱི་ཁོར་ཡུག་ཅིག་གི་རྨང་གཞི་སྐྲུན་གྱི་ཡོད། དེ་ནི་སློབ་ཕྲུག་གི་ལས་ཞུགས་གོང་མཐོར་གཏོང་བ་དང་། སྤྱི་ཚོགས་ཀྱི་ཚོར་བ་གོང་འཕེལ་གཏོང་བ། རྣམ་གཡེང་ཉུང་དུ་གཏོང་བ་བཅས་ལ་དམིགས་པའི་ཐབས་ཇུས་དང་ཐབས་ལམ་སྣ་ཚོགས་ཤིག་གི་ནང་དུ་འདུས་ཡོད། རྩོམ་ཡིག་འདིས་གཞི་རིམ་འོག་མའི་འཛིན་གྲྭ་སྟངས་འཛིན་གྱི་ཐབས་ཇུས་ནུས་པ་ཅན་སྣ་ཚོགས་ཤིག་མྱོང་ཚོར་གྱིས་སློབ་གཉེར་གྱི་ཁོར་ཡུག་ལེགས་ཤོས་སྐྲུན་པར་སྔོན་ཚུད་ནས་ལས་ལ་ཞུགས་པའི་ཐབས་ལམ་གྱི་གལ་གནད་གསལ་སྟོན་བྱེད་ཀྱི་ཡོད།      སློབ་ཕྲུག་ཚོའི་ཤེས་ཡོན་དང་། སྤྱི་ཚོགས། མྱོང་ཚོར་སོགས་ཡར་རྒྱས་གཏོང་བར་བཟང་ཕྱོགས་ཀྱི་སློབ་སྦྱོང་གི་ཁོར་ཡུག་ནི་གལ་གནད་ཆེན་པོ་ཡིན། དགེ་རྒན་རྣམས་ཀྱིས་རེ་ལྟོས་གང་ཡིན་གསལ་པོ་བཟོ་བ་དང་། འཆར་གཞི་སྒྲིག་པ། སེམས་པ་བཟང་པོ་དང་རྒྱབ་སྐྱོར་ལྡན་པའི་ཁོར་ཡུག་ཅིག་བསྐྲུན་ཏེ་ཁོར་ཡུག་དེ་ལྟ་བུ་སྐྲུན་ཐུབ། སློབ་ཕྲུག་ཚོར་ཞོགས་པར་འཚམས་འདྲི་ཞུ་བ། སློབ་ཕྲུག་གི་ལས་དོན་འགྲེམས་སྟོན་བྱེད་པ། འཛིན་གྲྭ་ནང་དགོད་བྲོ་པོ་དང་སྤྲོ་སྣང་ལྡན་པའི་ཆ་ཤས་སུ་བསྐྲུན་ཚེ་བཟང་ཕྱོགས་ནས་འགྱུར་བ་འགྲོ་བར་མཐུན་འགྱུར་བྱེད་ཐུབ། རེ་བ་གསལ་པོ་བཟོ་རྒྱུ།       སློབ་མ་རང་ཉིད་ཀྱི་ལས་འགན་དང་དགེ་རྒན་གྱི་རེ་བ་གསལ་པོ་བཟོ་ཐུབ་ཚེ། སློབ་ཕྲུག་རང་གིས་གང་བྱེད་དགོས་པ་ཤེས་རྟོགས་ཐུབ་པར་ཕན་ཐོགས་ཡོང་བ་དང་འགན་འཁུར་གོང་མཐོར་གཏོང་བར་ཕན་ཐོགས་ཡོང་གི་རེད། དགེ་རྒན་གྱིས་རང་ཉིད་སྤྱོད་ལམ་ཁྱེར་སོ་དང་ལུས་ཀྱི་རྣམ་འགྱུར་དང་བཀའ་མོས་གནང་སྟངས་སོགས་སློབ་མར་དཔེ་མཚོན་སྤྲོད་དགོས། འཛིན་གྲྭའི་སྒྲིག་ལམ་མང་མ་དྲག་པ་དང་གང་ཡོད་པ་རྣམས་ལེགས་ཕྱོགས་ཀྱི་སྒྲོམ་གཞི་ལྡན་པ་མངོན་གསལ་དོད་པོ་བཅས་བཟོ་དགོས།      འཛིན་གྲྭ་སྟངས་འཛིན་གནང་སྟངས་ལ་དོ་སྣང་གནང་ཐབས་ནི། སློབ་མའི་ཀུན་སྤྱོད་ལ་དཀའ་ངལ་མ་བྱུང་བའི་སྔོན་དུ་སྔོན་འགོག་བྱེད་པར་དམིགས་པ་དགོས། ཐབས་ལམ་དེ་དག་གི་སློབ་མ་རང་ངོས་ནས་འཛིན་གྲྭའི་མོས་མཐུན་གྱི་སྒྲིག་གཞི། སློབ་ཚན་འཆར་འགོད་དུས་ཚོད་བཏང་ནས་སྒྲིག་དགོས་པ་ལས་སླ་སྤྱོད་རིགས་ངེས་པར་དུ་དོར་དགོས་པ་མ་ཟད་དགེ་རྒན་རྣམས་ཀྱིས་སློབ་ཕྲུག་གི་དོ་སྣང་བསྐྲུན་ཐབས་ལ་འབད་དགོས། སློབ་མ་དང་བཟང་ཕྱོགས་ཀྱི་འབྲེལ་ལམ་འཛུགས་སྐྲུན།       དགེ་སློབ་དབར་གྱི་འབྲེལ་ལམ་བརྟན་པོ་དེ་འཛིན་གྲྭའི་འཛིན་གྲྭའི་སྟངས་འཛིན་གྱི་གནང་སྟངས་་དབང་གི་འབྱུང་གི་ཡོད། དགེ་རྒན་རྣམས་ཀྱིས་ཕན་ཚུན་ལ་གུས་ཞབས་དང་གོ་རྟོགས་གཞི་རྩར་བཞག་པའི་ཐོག་ནས་སློབ་ཕྲུག་ཚོ་དང་ལྷན་དུ་ཡིད་ཆེས་དང་བཟང་ཕྱོགས་ཀྱི་འབྲེལ་ལམ་འཛུགས་སྐྲུན་བྱེད་པར་འབད་བརྩོན་བྱེད་དགོས། སློབ་ཕྲུག་རེ་རེ་བཞིན་ངོ་ཤེས་ཡོང་བ་དང་སློབ་མར་དཀའ་ངལ་བྱུང་སྐབས་སློབ་མར་སེམས་ཤུགས་སྤར་བ་དང་བསྔགས་བརྗོད་བྱེད་རྒྱུ་བཅས་ཀྱི་དུས་ཚོད་བཏང་ན་སློབ་ཕྲུག་ཚོར་རིན་ཐང་ལྡན་པ་དང་དགེ་རྒན་གྱི་ཡ་ལན་ཡོད་པའི་སྐུལ་སློང་ཐེབས་པའི་སློབ་སྦྱོང་གི་ཁོར་ཡུག་ལ་རོགས་འདེགས་བྱེད་མཁན་ཞིག་ཡོང་བར་ཕན་ཐོགས་ཆེ། རྣམ་འགྱུར་སྐྱེན་པོས་འཛིན་གྲྭར་སྟངས་འཛིན།       སྔོན་འགོག་གི་ཐབས་ལམ་ཡོད་མེད་ལ་མ་ལྟོས་པར་འཛིན་གྲྭའི་ནང་རྣམ་འགྱུར་སྐྱེན་པོས་སྟངས་འཛིན་གྱི་ཐབས་ལམ་དགོས་པའི་དཀའ་ངལ་འཕྲད་སྲིད། སྤྱོད་ལམ་ངན་པ་ལ་གདོང་ལེན་བྱེད་སྐབས་ཞི་འཇམ་དང་། རྒྱུན་གནས། དྲང་བདེན་བཅས་རྒྱུན་གནས་བྱེད་རྒྱུ་གལ་ཆེན་པོ་ཡིན། དགེ་རྒན་རྣམས་ཀྱིས་དཀའ་ངལ་ཆུང་ངུ་འཕྲལ་དུ་སེལ་ཐབས་དང་། དཔེར་ན་ཉེ་འགྲམ་དུ་སྡོད་པ། ལེགས་ཕྱོགས་ནས་དགོངས་ཚུལ་སྤེལ་བ་ལྟ་བུའི་ཐབས་ལམ་བེད་སྤྱོད་གཏོང་དགོས། སཱི་ཤེས་ཡོན་ནང་གི་ཕྲལ་མར་ཐབས་བྱུས་མི་འདྲ་བ་སོགས་ཡོད་པ་གང་སྟབས་བདེ་སྤྱོད་པའི་ཐོན་ནས་བསྐྱར་གསོའི་སྦྱོང་བརྡར་ལག་བསྟར་བྱེད་རྒྱུ་བཅས་ཀྱིས་སློབ་ཕྲུག་ཚོར་སོ་སོའི་ནོར་འཁྲུལ་ལས་བསླབ་བྱ་ལེན་པ་དང་སོ་སོའི་བྱ་སྤྱོད་ཀྱི་འགན་འཁུར་རྒྱུར་རོགས་རམ་བྱེད་ཐུབ། འཛིན་གྲྭའི་ནང་སློབ་ཕྲུག་ཚོས་མཉམ་ཞུགས་གོང་སྤེལ།       སློབ་ཕྲུག་གི་རང་ཉིད་ཀྱི་དམིགས་ཡུལ་རྒྱུན་འཁྱོངས་དང་རྣམ་གཡེང་ཉུང་དུ་གཏོང་བར་བྱེད་སྒོའི་ནང་ལེགས་ཉེས་ལ་མ་བལྟོས་པར་འཇུག་དགོས་པ་ནི་གཙོ་བོ་ཡིན། དགེ་རྒན་གྱིས་ལག་བསྟར་བྱེད་སྒོ་དང་། སློབ་ཕྲུག་ཚོ་ཆ་བགོས་ཀྱིས་སློབ་ཚན་དང་འབྲེལ་བའི་མཉམ་ལས་དང་། འཕྲུལ་ཆས་བརྒྱུད་དེ་སྤྱན་བསྟར་ལྟ་བུའི་སློབ་ཁྲིད་ཐབས་ལམ་སྣ་ཚོགས་པའི་བརྒྱུད་དེ་སློབ་མའི་དོ་དབྱིངས་གོང་མཐོར་གཏོང་ཐུབ། སློབ་ཕྲུག་གི་འདེམས་ཀ་དང་རང་དབང་གི་གོ་སྐབས་བསྐྲུན་པ་དང་། དེ་བཞིན་སློབ་མས་འབད་བརྩོན་ལ་ངོས་འཛིན་ཡོད་པ་དང་བཟང་ཕྱོགས་ཀྱི་ཡ་ལན་དུས་ཐོག་ཏུ་གནང་ཚེ་སློབ་མའི་ཀུན་སློང་སྔར་ལས་གོང་མཐོར་གཏོང་ཐུབ། མཇུག་བསྡོམས་སུ།       སློབ་ཕྲུག་ཚོ་སློབ་སྦྱོང་གི་ཐོག་ནས་ཡར་རྒྱས་འགྲོ་ཐུབ་རྒྱུ་དང་། སྤྱི་ཚོགས་ཐོག་ནས་ཡར་རྒྱས་འགྲོ་རྒྱུ། མྱོང་ཚོར་གྱི་ཐོག་ནས་ཡར་རྒྱས་འགྲོ་ཐུབ་རྒྱུ་བཅས་ལ་མཐུན་རྐྱེན་དུ་གྱུར་པའི་སློབ་སྦྱོང་གི་ཁོར་ཡུག་བཟང་པོ་ཞིག་བསྐྲུན་རྒྱུར་ནུས་པ་ལྡན་པའི་གཞི་རིམ་འོག་མའི་འཛིན་གྲྭ་དོ་དམ་ནི་མེད་དུ་མི་རུང་བ་ཞིག་ཡིན། དགེ་རྒན་རྣམས་ཀྱིས་སྔོན་ཚུད་ཐབས་ཇུས་ལག་བསྟར་བྱེད་པ་དང་། རེ་ལྟོས་གསལ་པོ་བཟོ་བ། བཟང་ཕྱོགས་ཀྱི་འབྲེལ་ལམ་འཛུགས་པ། སློབ་ཕྲུག་གི་ལས་ཞུགས་གོང་སྤེལ་གཏོང་བ་བཅས་ལ་བརྟེན་ནས་སློབ་ཕྲུག་ཚང་མའི་སློབ་སྦྱོང་དང་། འཚར་ལོངས། དེ་བཞིན་ལམ་ལྷོང་གིས་གྲུབ་འབྲས་ཐོབ་པ་བཅས་ལ་མཐུན་རྐྱེན་དུ་གྱུར་པའི་འཛིན་ཁང་གི་ཁོར་ཡུག་ཅིག་བསྐྲུན་པའི་ཡིད་ཆེས་ཡོད་དོ།།