བསྟན་འཛིན་དབྱངས་སྒྲོན། འཛིན་གྲྭ་བཅུ་པ།གུ་རུ་པུ་ར་སཾ་བྷོ་ཊ་ཉིན་སློབ། མདོ་སྨད་ཨ་མདོ་སྟག་འཚེར་ཡུལ་ཞིག་ན། ། གངས་ཅན་མགོན་གྱི་བདག་པོ་ཁྱེད་རང་འཁྲུངས། ། སངས་རྒྱས་བསྟན་འཛིན་སྐྱེས་བུ་༸གོང་ས་མཆོག ། ཁ་བའི་ལྗོངས་སུ་ཕེབས་པར་བཀའ་དྲིན་ཆེ། ། གངས་ཅན་བོད་མིའི་གདུང་སེལ་ཉི་མ་ཁྱེད། ། སྐུ་ན་ཆུང་དུས་ཆོས་སྲིད་ཐུགས་འགན་བཞེས། ། བོད་མིའི་ལས་དབང་ཆེད་དུ་སྐུ་ལས་བསྐྱོན། ། དཀའ་ཚེགས་ཆེ་ཡང་འཛུམ་མདངས་ཡལ་མ་མྱོང། ། རྒྱ་གར་འཕགས་པའི་ཡུལ་དུ་བཙན་བྱོལ་ཕེབས། ། བོད་ཕྲུག་ཆེད་དུ་ཤེས་ཡོན་ལྡུམ་རྭ་བསྐྲུན། ། འཐབ་རྩོད་མི་དགོས་དམངས་གཙོ་གསོལ་རས་གནང་། ། འགྲོ་བའི་དོན་གྱི་མཛད་རྗེས་རི་རྒྱལ་བཞིན། ། འཛམ་གླིང་ཡོངས་ཀྱི་ཞི་བའི་སྣེ་ཁྲིད་ཁྱེད། ། གསུང་ཚིག་གཅིག་གིས་ཡིད་ལ་ཞི་བདེ་བསྐྲུན། ། ངུར་སྨྲིག་ན་བཟའ་བཞེས་ཏེ་གཞན་དོན་བསྒྲུབ། ། ཁྱེད་ཀྱི་བྱམས་བརྩེའི་འོད་ཟེར་ས་གཞིར་ཁྱབ། ། ཆོས་ལུགས་ནང་ཁུལ་མཐུན་སྒྲིལ་ལམ་བཟང་སྟོན། ། མི་རིགས་དབྱེ་མེད་ཀུན་ལ་བརྩེ་བ་སྦྱིན། ། ཆོས་དང་ཚན་རིག་བར་གྱི་འབྲེལ་ཟམ་བཙུགས། ། ཉིན་མཚན་ལྟོས་མེད་སྐྱེ་འགྲོའི་འགྲོ་དོན་མཛད། ། འཛམ་གླིང་ཡུལ་གྲུ་གང་སར་ཞབས་ཀྱིས་བཅགས། ། དུས་ལ་མཁོ་བའི་བཀའ་ཆོས་བདུད་རྩི་གནང། ། འཛམ་གླིང་ཞི་བདེར་སྐྱོང་བའི་༸གོང་ས་མཆོག ། བོད་མི་ས་ཡ་དྲུག་གི་རེ་བ་ཡིན། ། ཁྱེད་ཀྱི་ཐུགས་རྗེ་བཀའ་དྲིན་རྒྱ་མཚོ་བཞིན། ། བདག་གི་སེམས་ལ་བྱམས་དང་སྙིང་རྗེ་སྦྱིན། ། ཡིད་ལ་་ཡང་ཡང་དྲན་ནས་མཆི་མ་ཟགས།། […]

བསྟན་འཛིན་ཆོས་སྐྱིད། འཛིན་གྲྭ་དགུ་པ།ཀ་སྦུག་སཾ་བྷོ་ཊ་གཏན་སློབ། ང་ཚོ་བོད་མི་ཡོངས་ཀྱི། ། བླ་ན་མེད་པའི་དབུ་ཁྲིད། །  ༸གོང་ས་༸སྐྱབས་མགོན་ཆེན་པོ། ། ཀུན་གྱིས་དགའ་དད་བྱེད་ས། ། ཁོང་གིས་ཆོས་ལུགས་ཡོངས་ལ། ། མཐུན་སྒྲིལ་བཟང་བའི་ཆེད་དུ། ། འཛམ་གླིང་འགྲོ་བ་ཀུན་ལ། ། བྱམས་དང་བརྩེ་བ་གནང་ཡོད། ། ༸རྒྱལ་དབང་མཆོག་གི་ཐུགས་ལ། ། སྐུ་ངལ་ཇི་ཙམ་མང་ཡང། ། ཁོང་གི་ཞལ་རས་ནམ་ཡང། ། འཛུམ་མདངས་འོད་དཀར་འཕྲོ་བ། ། ལྔ་བཅུ་ང་དགུའི་ལོ་ལ། ། ཁོང་དང་བོད་མི་མང་པོ། ། རྒྱ་གར་འཕགས་པའི་ཡུལ་དུ། ། སྐྱབས་བཅོལ་ཞུ་བར་ཕེབས་ཡོད། ། ༸གོང་ས་༸སྐྱབས་མགོན་ཆེན་པོས། ། སྲིད་བློན་ནེཧ་རུ་ལྷན་དུ། ། བོད་མིའི་འཚོ་སྡོད་ཆེད་དུ། ། གཞིས་ཆགས་གསར་འཛུགས་གནང་ཡོད། །  བསྟན་འཛིན་སྒང་གི་ས་ཁུལ། ། དེ་སྐབས་ནགས་ཚལ་འདྲ་བ། །  ཚང་མས་ཧུར་ཐག་བྱས་ནས། ། གཞིས་ཆགས་སྲ་བརྟན་བཟོས་ཡོད། །  བསྟན་འཛིན་སྒང་ཞེས་མིང་དེ། ། ༸གོང་ས་མཆོག་གིས་མཚན་དང། །  མཐོ་སྒང་ས་གཞིར་ཆགས་པས། […]

བློ་བཟང་ཡེ་ཤེས། འཛིན་གྲྭ་དགུ་པ།ཀ་སྦུག་སཾ་བྷོ་ཊ་གཏན་སློབ། ང་ཡི་རྩ་བའི་བླ་མ། ། ༸གོང་ས་ཡིད་བཞིན་ནོར་བུ། ། སྤྱན་རས་གཟིགས་ཀྱི་རྣམ་སྤྲུལ། ། རྒྱལ་བ་བསྟན་འཛིན་རྒྱ་མཆོ། ། ང་ཡི་རྩ་བའི་བླ་མ། ། ༸གོང་ས་༸སྐྱབས་མགོན་ཆེན་པོ། ། ཆོས་སྲིད་གཉིས་ཀྱི་དབུ་ཁྲིད། ། འཛམ་གླིང་ཞི་བདེའི་དེད་དཔོན། ། མཐའ་ཡས་སེམས་ཅན་དོན་དུ། ། ཐུགས་རྗེས་སྤྱན་ཆབ་བསིལ་བཞིན། ། རྣམ་དག་བཀའ་སློབ་གནང་སྟེ། ། མི་མང་ཞི་བདེར་བཀོད་ཡོད། ། བྱམས་དང་སྙིང་རྗེའི་བདག་ཉིད། ། ༸གོང་ས་༸སྐྱབས་མགོན་ཆེན་པོ། ། འཇིག་རྟེན་སྐྱེ་འགྲོ་ཀུན་ལ། ། ཞི་བདེའི་དཔལ་ཡོན་བསྐྲུན་བྱུང། ། ༸རྒྱལ་དབང་མཆོག་གིས་གནང་བའི། ། བཀའ་སློབ་བདུད་རྩི་བཟང་པོ། ། འཇིག་རྟེན་ཀུན་ལ་ཁྱབ་ན། ། མི་ཚེའི་རིན་ཐང་རྙེད་ཐུབ། ། འཛམ་གླིང་ཞི་བདེའི་དེད་དཔོན། ། ༸གོང་ས་༸སྐྱབས་མགོན་ཆེན་པོ། ། བླ་ན་མེད་པའི་དབུ་ཁྲིད། ། མྱུར་དུ་མཇལ་བར་སྨོན་ཡོད། ། ༸རྒྱལ་དབང་ཐམས་ཅད་མཁྱེན་པ། ། དགུང་ལོ་དགུ་བཅུར་ཕེབས་ཀྱང། ། ཁྱེད་ཀྱི་མཛད་པ་ཕྲིན་ལས། […]

བསྟན་འཛིན་ཆོས་དབྱངས། འཛིན་གྲྭ་བཅུ་པ།ཀ་སྦུག་སཾ་བྷོ་ཊ་གཏན་སློབ། ༸གོང་ས་༸སྐྱབས་མགོན་ཆེན་པོ། ། དགུང་གྲངས་དགུ་བཅུར་ཕེབས་པའི། ། གོ་སྟོན་རྟེན་འབྲེལ་དེ་ལ། ། བཀྲ་ཤིས་བདེ་ལེགས་ཞུས་ཡོད། ། བོད་ལྗོངས་ཁ་བའི་ཡུལ་ལ། ། དཀའ་སྡུག་ཚད་མེད་མྱོང་སྐབས། ། ལམ་སྟོན་ལེགས་པར་གནང་མཁན། ། ༸སྐྱབས་མགོན་ཁྱེད་རང་ཡིན་ནོ། ། རང་དབང་མེད་པའི་ཡུལ་འདིར། ། སྡུག་བསྔལ་མང་བའི་དུས་ལ། ། སྐྱིད་པའི་ཉི་མ་ཤར་མཁན། ། ཡིད་བཞིན་ནོར་བུ་ཡིན་ནོ། ། བཙན་བྱོལ་བོད་མི་རྣམས་ཀྱི། ། སྐད་དང་རིག་གཞུང་སོགས་ལ། ། སྲུང་སྐྱོབ་སློབ་སྟོན་གནང་མཁན། ། ༸ཏཱ་ལའི་བླ་མ་ཡིན་ནོ། ། གཞིས་བྱེས་བོད་མིའི་དབུ་ཁྲིད། ། འཛམ་གླིང་ཞི་བདེ་སྤེལ་མཁན། ། དྲིན་ཅན་ཕ་ལས་ལྷག་པ། ། བླ་མ་ཁྱེད་རང་ཡིན་ནོ། ། ༸སྐྱབས་མགོན་ཁྱེད་ཀྱིས་གསུངས་པའི། ། བསླབ་བྱ་གསུང་གི་བདུད་རྩི། ། བྱམས་དང་བརྩེ་བ་དེ་རྣམས། ། ནམ་ཡང་བརྗེད་ཐབས་མེད་དོ། ། འགྲོ་བ་མི་རིགས་ཡོངས་ལ། ། ཕན་པའི་བཀའ་སློབ་བཟང་པོ། ། རྒྱུན་མི་ཆད་པར་གནང་བ། […]

ཆོས་བཟང་རྟ་མང་། འཛིན་གྲྭ་བཅུ་པ།ཀ་སྦུག་སཾ་བྷོ་ཊ་གཏན་སློབ། གྲུ་འཛིན་ཕོ་བྲང་རྩེ་མོ་ནས། ། དྲོ་འཇམ་གསེར་གྱི་ཉི་མ་ཤར། ། དེ་ཉིད་ཉི་མ་མ་ཡིན་ལ། ། ཁོང་གི་མཁྱེན་པའི་འོད་ཟེར་ཡིན། ། འཛམ་གླིང་ཞི་བདེའི་དེད་དཔོན་མཆོག། ། མི་རིགས་དབྱེ་བ་མེད་པ་ལ། ། བྱམས་བརྩེའི་བཀའ་སློབ་གནང་བའི་དུས། ། འཛམ་གླིང་འགྱུར་བ་ཆེན་པོ་ཕྱིན། ། གནམ་ལ་འཇའ་ཚོན་ཤར་བའི་ཚེ། ། བླ་མའི་འཛུམ་ལྡན་ཞལ་རས་མཇལ། ། ཞལ་རས་འཛུམ་ལྡན་མཇལ་བའི་དུས། ། བདག་བློའི་མུན་པ་རབ་ཏུ་བསལ། ། བོད་ལྗོངས་གངས་རིའི་ཡུལ་དེ་ལ། ། ནོར་བུ་མི་འདུག་མ་གསུངས་དང། ། ༸སྐྱབས་མགོན་ཡིད་བཞིན་ནོར་བུ་སྟེ། ། ནོར་བུ་མེད་ན་གང་རེད་ཨང། ། ཨེ་མ་བྱང་ཆུབ་སེམས་པ་ཁྱེད། ། དགུང་གྲངས་དགུ་བཅུར་ཕེབས་པ་ལ། ། སློབ་ཆུང་ང་ཚོས་སྒོ་གསུམ་ནས། ། དགའ་བའི་བཀྲ་ཤིས་སྨོན་ཚིག་བརྗོད། ། སྐུ་ནི་རྡོར་སེམས་དབྱེར་མེད་པ། ། གསུང་ནི་བདུད་རྩི་དྲུག་ཅུའི་དབྱངས། ། ཐུགས་ནི་འོད་དཀར་སྙིང་རྗེ་ལྡན། ། ༸གོང་ས་མཆོག་ལ་ཡང་ཡང་འདུད། ། བྱམས་དང་སྙིང་རྗེའི་བདག་ཉིད་ཅན། ། ཆོས་སྲིད་བོད་མིའི་དབུ་འཁྲིད་པ། ། ཐོས་བསམ་ཏིང་འཛིན་རྒྱན་གསུམ་རྣམས། […]

ཡང་བསྐྱར་སྒྲོལ་མ། འཛིན་གྲྭ་དགུ་པ།མེས་དབོན་གཙུག་ལག་དཔེ་སྟོན་སློབ་གྲྭ། ཁྱེད་ཀྱི་བཀའ་དྲིན་འོད་ཟེར་ཆེན་མོ་ཡི་འོག་ནས།། ཤེས་ཡོན་སྦྱོང་རྒྱུའི་གོ་སྐབས་བཟང་པོ་ཞིག་ཐོབ་སོང་།། ཐུགས་རྗེ་བཀའ་དྲིན་ཡིད་སེམས་གཏིང་རིམ་དུ་བཅངས་ཏེ།། གུས་མོས་ཁྱེད་ལ་བསྟོད་པའི་ཚིགས་བཅད་འདི་འབུལ་ལོ།། ཕྱི་ལོ་གཅིག་སྟོང་དགུ་བརྒྱ་སོ་ལྔ་ཡི་ནང་དུ།། སྐྱིད་པའི་ཨ་མདོ་སྟག་མཚེར་ཡུལ་ལྗོངས་སུ་འཁྲུངས་པའི།། ས་ཡ་དྲུག་གི་བོད་མིའི་དཀའ་སྡུག་དེ་སེལ་མཁན།། ཏཱ་ལའི་བླ་མ་སྐུ་ཕྲེང་བཅུ་བཞི་ཡི་བཀའ་དྲིན།། ཆུང་དུས་ལྷ་མོ་དོན་གྲུབ་ལོ་བཞི་ཡི་སྐབས་སུ།། ཕ་ཡུལ་སྟག་མཚེར་བཞག་ནས་ལྷ་ས་རུ་ཕེབས་སོང་།། པོ་ཏཱ་ལ་རུ་གསེར་ཁྲི་མངའ་གསོལ་དེ་ཞུ་སྐབས།། ཁོང་གི་མཚན་ལ་བསྟན་འཛིན་རྒྱ་མཚོ་ཞེས་འབོད་སོང་།། ལོ་ངོ་བཅུ་དྲུག་ཟིན་པའི་ན་ཚོད་ཀྱི་དུས་ན།། ཆོས་སྲིད་གཉིས་ཀྱི་ཐུགས་འགན་ཆེན་པོ་དེ་བཞེས་སོང་།། བོད་འབངས་ཡོངས་ཀྱི་བདེ་སྡུག་སེལ་མཁན་གྱི་མི་སྣ།། ༸སྐྱབས་མགོན་རྒྱལ་དབང་ཡིད་བཞིན་ནོར་བུ་ཁོང་ཡིན་ནོ།། ཁོང་ཉིད་དགུང་ལོ་ཉི་ཤུ་རྩ་བཞི་ལ་སོན་སྐབས།། ལྷ་རམས་པ་ཡི་དམ་བཅའ་ཆེན་པོ་དེ་བཞག་སོང་།། མཁས་པའི་མཚན་རྟགས་བཞེས་པའི་མཛད་རྗེས་ཀྱི་དུས་ཡིན།། ཁྱད་དུ་འཕགས་པ་ཆེན་པོ་ཆགས་པ་ཡི་དུས་བཟང་།། ལྷ་རམས་དམ་བཅའ་ཕུལ་བའི་ལོ་ངོ་ཡི་ནང་དུ།། ༸གོང་ས་༸སྐྱབས་མགོན་ཆེན་པོ་དགུང་ལོ་དེ་ཆུང་ཡང་།། གཅིག་སྟོང་དགུ་བརྒྱ་ལྔ་དགུའི་སྡུག་བསྔལ་དེ་བསལ་ཆེད།། ༸སྐྱབས་མགོན་མཆོག་གིས་དཀའ་བའི་སྡུག་བསྔལ་དེ་བཞེས་སོང་།། བཙལ་བྱོལ་ཕེབས་པའི་ཉིན་མ་དང་པོ་ནས་བཟུང་སྟེ།། བོད་མི་ཡོངས་རྫོགས་གནས་ས་གཞི་ཆགས་དག་བཙུགས་ཡོད།། སྐད་དང་རིག་གཞུང་ཆེད་དུ་སློབ་གྲྭ་དེ་བཙུགས་ནས།། བོད་འབངས་ཡོངས་རྫོགས་ཤེས་ཡོན་ལྡན་པ་ཞིག་བཟོས་སོང་།། རྒྱ་གར་ཡུལ་ལ་བྱོན་ནས་བཀའ་སློབ་དང་གསུང་ཆོས།། སེམས་པ་བཟང་པོ་དགེ་བའི་བྱ་བ་དག་བརྩམས་དགོས།། བཀའ་སློབ་བཟང་པོ་གསུངས་པའི་བག་ཆགས་ཀྱི་འོག་ནས།། མི་རིགས་གཞན་ཚོའི་ཡིད་སེམས་དེ་མུར་བཀུག་སོང་།། ཡུལ་ལུང་མང་པོ་བསྐོར་བའི་གོ་སྐབས་དེ་བཟུང་ནས།། གླིང་འདི་ཞི་བདེ་བདེ་སྐྱིད་ལྡན་པ་ཞིག་བཟོས་སོང་།། ཡིད་ལ་འཐད་པའི་བཀའ་སློབ་གསུངས་པ་ཡི་དྲིན་ལས།། གླིང་ཆེན་འདི་ཡི་ཞི་བདེ་དེད་དཔོན་ལ་བཀོད་སོང་།། ཆིག་སྟོང་དགུ་བརྒྱ་བརྒྱད་ཅུ་གྱ་དགུ་ཡི་ལོ་ལ།། ཕྱི་ཟླ་བཅུ་གཉིས་ཚེས་པ་བཅུ་པ་ཡི་ཉིན་ལ།། ༸གོང་ས་ཐམས་ཅད་མཁྱེན་པའི་མཛད་རྗེས་ཀྱི་དྲིན་ལས།། འཛམ་གླིང་ནོ་སྦེལ་ཞི་བདེ་གཟེངས་རྟགས་དེ་ཐོབ་བྱུང་།། ༸སྐྱབས་མགོན་ཁྱེད་ཀྱི་རླབས་ཆེན་མཛད་པ་ལ་བརྟེན་ནས།། བོད་ཡུལ་ཁ་བ་གངས་ལྗོངས་སྙན་གྲགས་དེ་རྒྱས་སོང་།། མགོ་སེར་མི་སྣ་འདྲ་མིན་འབྲེལ་བ་དག་བཞག་ནས།། ཁྱེད་ཀྱིས་བརྩམས་པའི་བཀའ་དྲིན་སེམས་པ་རུ་བཅངས་ཡོད།། ཁོང་གིས་བོད་མིའི་བདེ་དོན་གཅིག་པོ་རུ་མ་ཟད།། འཕགས་པའི་ཡུལ་དུ་ནང་ཆོས་སླར་གསོ་དེ་གནང་ནས།། ཁྱེད་ཀྱི་བཀའ་དྲིན་གངས་ལྗོངས་བོད་མི་ཙམ་མིན་པར།། གླིང་འདིའི་ནང་པ་ཡོངས་ཀྱིས་བཀའ་དྲིན་དེ་ཚོར་ཡོད།། ན་བཟའ་དམར་པོ་མཆོད་ནས་གོ་ལ་འདི་བསྐོར་སོང་།། ཕྱག་གཉིས་ཐལ་མོ་སྦྱར་ནས་ཞི་བདེ་འདི་བསྐྲུན་སོང་།། ཞལ་རས་འཛུམ་མདངས་འཁྱེར་ནས་ཞི་བདེ་དེ་བསྐྲུན་སོང་།། ༸གོང་ས་༸སྐྱབས་མགོན་མཆོག་ལ་བཀའ་དྲིན་ཆེ་ཞུ་འདོད།། ད་ལྟ་སྦྱོང་རྒྱུ་བྱུང་བའི་ཤེས་བྱ་དང་ཡོན་ཏན།། […]