གངས་ལྷ་སྒྲོལ་མ། ཅོན་ཏ་ར་བོད་ཁྱིམ། ང་ནི་ཁ་དོག་སྣ་ཁ་འདྲ་མིན་དང་སྤུས་ཀ་ལེགས་པོ་གཅིག་ནས་གྲུབ་པའི་དཔེ་ཁུག་ཆུང་ཆུང་ཞིག་ཡིན། ང་ལ་ཚེར་ཆེ་འབྲིང་ཆུང་གསུམ་ཡོད། ངའི་མདུན་ལ་ཚོན་མདོག་འདྲ་མིན་ཡོད་པ་མ་ཟད། དེའི་སྟེང་ལ་རླུང་གི་རྒྱལ་མཚན་ཞིག་ཡོད་པ་དང་འོག་ལ་རྒྱུག་ཆུ་ཞིག་རྒྱུག་བཞིན་པ་སྟོན་ཡོད། ང་དང་པོ་བཟོ་གྲྭ་ནས་ཚོང་ཁང་ནང་རླངས་འཁོར་བསྡད་ནས་འགྲོ་སྐབས། ངས་སྦྱིན་བདག་གི་སྐོར་ལ་བསམ་བློ་གཏོང་གིན་བསྡད་པ་ཡིན། ང་ལ་སྦྱིན་བདག་གང་འདྲ་ཞིག་དགོས་མིན་ཁྱེད་ཚོར་ངོ་སྤྲོད་ཅིག་བྱས་ན། ང་ལ་དགོས་པའི་སྦྱིན་བདག་ནི་མཐོང་མ་ཐག་ཏུ་ཕྱི་གཟུགས་ལེགས་པའི་ཐོག་རྒྱུ་ནོར་ཧ་ཅང་མང་པོ་ཡོད་པ་གཅིག་དགོས། ང་ཚོང་ཁང་ནང་སླེབས་མ་ཐག་ཚོང་བདག་གིས་ང་ཚོང་ཁང་གི་ཟུར་ཞིག་ལ་བཀལ་བྱུང་། ངའི་ཚོན་མདོག་བཀྲག་པ་ལ་བརྟེན་ནས་ངས་མི་ཚང་མ་ལས་སླ་བོའི་ངང་འགུག་ཐུབ་གྱི་འདུག འོན་ཀྱང་ཚང་མས་ང་ལ་ཐུག་ཙམ་བྱས་ཏེ་ཁ་ནས། “ཨ་ཙི་དཔེ་ཁུག་འདི་ལ་ཡིད་འཕྲོག་སོང། ཡིནའང་གོང་དེ་འདྲའི་ཆེ་བ་ལ།” ཞེས་ལབ་ནས་འགྲོ་ཡི་འདུག ཉིན་ཞིག་གི་གནམ་གཤིས་དམར་ཞིང་བཀྲག་མདངས་ཆེ་བའི་སྐབས་ས་མ་རུབ་གོང་། མ་བུ་གཉིས་སླེབས་ནས་ང་ལ་ཐུག་ཙམ་ཐུག་ཙམ་བྱས་བྱུང་བས། ངའི་བསམ་པར་མི་གཞན་པ་ལྟར་གོང་ཆེ་བ་ལ་ཞེས་བརྗོད་ཁོ་ཐག་རེད་སྙམ་བྱུང་། འོན་ཀྱང་ཡ་མཚན་པ་ཞིག་ལ་ཁོང་གཉིས་ཀྱིས་ང་ཉོས་ནས་ནང་ལ་འཁུར་རྩིས་བྱས་བྱུང་བས། ང་དགའ་ནས་གཞས་ཀྱང་བཏང་བ་ཡིན། ངའི་སྦྱིན་བདག་ནི་བལྟས་མ་ཐག་ཏུ་མཛེས་ཤིང་མཚར་སྡུག་ལྡན་པས་སུ་དང་བསྡུར་ཡང་ཐོབ་ས་རེད། ཁོང་གི་མིག་ནི་ཤྭ་བའི་མིག་ལྟར་རྫིག་པོ་དང་། སྐྲ་ནི་བལ་ལྟར་འཇམ་པ་མ་ཟད། རྒྱུ་ནོར་གྱིས་བང་མཛོད་བཀང་ཡོད་པ་འདྲ་པོ་འདུག ངའི་སེམས་ནང་ད་ཡིན་ན་ཁོ་གཉིས་ཀྱིས་ངའི་འདྲ་པར་འདི་ཐོན་སོང་ཉམས་ནས་སྡོད་དུས། ཁོང་གཉིས་ཀྱིས་ང་རླངས་འཁོར་ནང་བཞག་ནས་ཁོ་ཚོའི་ནང་ལ་འཁྲིད། ངས་ཁོ་ཚོའི་ནང་འཛུལ་མ་ཐག་མིག་ནང་ཁོ་ཚོའི་ཁང་པའི་ནང་ལོགས་གང་འདྲ་ཡོད་མེད་ཚང་མ་མཐོང་བྱུང་བས། ནང་ནི་ཧ་ཅང་རྫིག་པོ་ཡོད་པས་རྒྱལ་ཁང་དང་མཚུངས། ངའི་སྦྱིན་བདག་ནི་ལོ་བཅུ་གཅིག་སོན་པའི་བུ་མོ་གཅིག་རེད་འདུག ཁོ་མོའི་གཤིས་ལུགས་ནི་ཧ་ཅང་རྩུབ་པ་དང། ནང་ལ་ཡོད་པའི་གཡོག་འཁོར་ཚང་མ་མཉམ་དུ་འཁོན་འགྲས་བྱེད་ཀྱི་འདུག མོས་ང་ཁུར་ནས་སློབ་གྲྭ་ལ་འགྲོ་ཡི་འདུག་སྟེ། འཛིན་གྲྭའི་ནང་སླེབས་མ་ཐག་ང་རྐུབ་བཀྱག་གི་སྟེང་ལ་གཡུག་གི་འདུག སྐབས་རེ་ང་ས་ལའང་འཛག་གི་འདུག་པ་མ་ཟད། ནང་ལ་སླེབས་མ་ཐག་དེ་མུར་ས་ལ་གཡུག་ནས་ངའི་ལུས་ལ་རྨ་མང་པོ་བཟོས་སོང། ཟླ་ནས་ཟླ་ཕྱིན་རྗེས་ངའི་དེ་སྔོན་ངོ་གདོང་ལ་འཛུམ་མདངས་དང་དང་བཀྲག་མདངས་ལྡན་པའི་རི་མོ་རྣམས་རིམ་གྱི་རྨིག་མེད་ཆགས་ཀྱི་འདུག ཉིན་ཞིག་ཁོ་ཚོའི་གཡོག་པོ་རྣམས་ཀྱིས་ནང་གཙང་མ་བཟོ་པའི་དུས་སུ་ང་ཟུར་ཞིག་ལ་ལོགས་སུ་བཏོན་སོང་། འཕྲལ་མ་ཉིད་དུ་བུ་མོ་དེས་དཔེ་ཁུག་ང་ལས་སྙིང་རྗེ་བ་ཅིག་འཁུར་ནས་ངའི་ཁོག་པའི་ནང་ཡོད་པའི་དེབ་རྣམས་ཕྱི་ལ་བཏོན་ནས་དཔེ་ཁུག་དེའི་ཁོག་པའི་ནང་བླུགས་སོང་། དེ་རྗེས་ང་སྒམ་ཆུང་མུན་ནག་གཅིག་ནང་བཅུག་སོང། དེ་རྗེས་ཉིན་རེ་ནས་ཉིན་རེར་ངའི་མིག་ནང་མིག་ཆུའི་དབང་མེད་དུ་ཤོར། ཉིན་འགའི་རྗེས་སུ་ང་རླངས་འཁོར་ཆེན་པོ་གཅིག་གི་ནང་འཁུར་ནས་གད་སྣོད་ནང་གཡུག ང་དང་ང་འདྲ་བའི་ཅ་དངོས་གཞན་དང་མཉམ་དུ་ཁ་བརྡ་བྱས་ནས་བསྡད་པས་ཉིན་ཁ་ཤས་རྗེས་སུ་བུ་ཞིག་གིས་ང་འཁུར་ནས་འགྲོ་སོང། ངའི་སེམས་ནང་སྔོན་མ་ནང་བཞིན་གྱི་ནང་སྐྱིད་པོ་གཅིག་ཡིན་པ་ངའི་མིག་ལམ་ལ་འཆར། འོན་ཀྱང་། རྩྭ་ཁང་གི་ནང་ཞིག་ངའི་མིག་ལམ་དུ་མཐོང་དུས་ང་ཧ་ལས་བྱུང་། ཁོའི་གཤིས་ཀ་ནི་ཧ་ཅང་འཇམ་ལ་སྲི་ཞུ་ཧ་ཅང་ཆེ་བ། ཐ་ན་ཁོས་སེམས་ཅན་ལའང་ཞབས་ཏོག་བྱེད་ཀྱི་འདུག ཁོ་ནི་ཉིན་ལྟར་སྔོན་གྱི་བུ་མོ་དེ་དང་མི་འདྲ་བར་དེབ་ཀྱི་ཚབ་ལ་རྩམ་པ་འཁུར་ཏེ་ལག་གཡས་ལ་རྒྱུག་པ་གཅིག་དང་ང་འཁུར་ནས་ལྗང་ལ་སྔོ་བའི་ན་ཁ་ཆེན་པོ་གཅིག་གི་ནང་དགོང་མོ་ས་མ་རུབ་བར་བསྡད་ནས། ས་རུབ་མ་ཐག་ནང་ལ་ལོགས་ནས་བསྡད་པ་ཡིན། ད་ལྟ་ངོ་མ་ངས་བསྐྱར་དུ་བསམ་བློ་གཏོང་དུས། སྔོན་མ་ང་དངོས་ནས་བློ་གཅིག་རེད་འདུག དངོས་གནས་བྱས་ན་ངས་སྔོན་མ་སྦྱིན་བདག་གི་རྒྱུ་ནོར་ལ་བལྟས་པ་མ་གཏོགས། སེམས་ལ་བལྟས་ཡོད་ན་ང་དེ་སྔོན་ནང་བཞིན་དཀའ་ངལ་འཕྲད་མེད་སྙམ། །