བདེ་ལེགས་དཔལ་མོ། མོན་གྷོ་སཾ་བྷོ་ཊ། བོད་དགེ ༡༽ སློབ་མ་རྣམས་ལ་ནང་སྦྱོང་སྐུལ་སྟངས། འཛིན་གྲྭའི་ནང་སློབ་མ་གྲངས་མང་པོ་ཡོད་པའི་འཛིན་གྲྭ་ཞིག་ཡིན་ན་རྒན་ལགས་ཀྱིས་སློབ་མ་རྣམས་ལ་ནང་སྦྱོང་སྐུལ་སྐབས་སྡེ་ཚན་གསུམ་ལ་དབྱེ་བ་འབྱེད་ནས་ནང་སྦྱོང་སྐུལ་དགོས་པ་གལ་ཆེན་པོ་མཐོང་། རྒྱུ་མཚན་ནི་འཛིན་གྲྭའི་ནང་སློབ་མ་དབང་པོ་རབ་འབྲིང་ཐ་གསུམ་ཡོད་པས་རང་སྦྱོང་ཧ་ཅང་ཁག་དྲག་ན་སློབ་མ་བློ་ཁ་ཞན་པ་རྣམས་ཀྱིས་འབྲི་མི་ཐུབ་པ་དང་ཁོང་ཚོས་རང་སྦྱོང་འབྲི་སྐབས་སྤྲོ་བ་མེད་པ་དང་འབྲི་བའི་འདུན་པ་བརླག་ངེས། དེར་མ་ཟད་སློབ་གྲྭར་འགྲོ་རྒྱུའི་སེམས་ཤུགས་ཀྱང་མེད་པར་འགྱུར་ཉེན་ཆེ། ༢༽ རང་སྦྱོང་ལས་སླ་དྲག་ན་སློབ་མ་རིག་པ་ཡག་པོ་དང་སྤྱང་པོ་ཚོས་ལས་སླ་བཅོས་ཀྱིས་ཁྲལ་འཆོལ་ཙམ་གྱིས་འབྲི་བ་དང་ཁོང་ཚོས་དུས་ཚོད་ཁྲོ་བརླག་འགྲོ་བའི་ཉེན་ཁ་ཆེན་པོ་ཡོད། དེར་བརྟེན་དགེ་རྒན་གྱིས་སློབ་མའི་ཁམས་དང་མོསཔར་བརྟག་སྟེ་ནང་སྦྱོང་སྐུལ་དགོས་པ་ཧ་ཅང་གལ་ཆེར་མཐོང་། ༣༽ སློབ་མ་རྣམས་ལ་སློབ་ཚན་མང་པོ་ཡོད་པས་དགེ་རྒན་གཞན་གྱིས་ནང་སྦྱོང་སྐུལ་ཡོད་མེད་བཀའ་འདྲི་གནང་རྒྱུ་དང་སློབ་ཚན་གཞན་ནང་སྦྱོང་སྐུལ་ཡོད་ཚེ། དེ་ཉིན་དགེ་རྒན་དེ་ཡིས་ནང་སྦྱོང་མ་སྐུལ་ན་བཟང་། རྒྱུ་མཚན་དགེ་རྒན་ཚོས་ནང་སྦྱོང་སྐུལ་རྐྱང་བྱས་ན་སློབ་མ་རྣམས་ཀྱིས་ནང་སྦྱོང་མ་ཚར་བའི་དཀའ་ངལ་འཕྲད་ངེས་ཡིན། ༡༽ ནང་སྦྱོང་དག་བཅོས་བྱེད་སྟངས། སློབ་མ་རྣམས་ལ་རང་སྦྱོང་སྐུལ་རྗེས་སང་ཉིན་དེ་ལ་ནང་སྦྱོང་དག་བཅོས་བྱེད་པ་ནི་གལ་ཆེ་བ་མཐོང་། གལ་སྲིད་དགེ་རྒན་གྱིས་ནང་སྦྱོང་དག་བཅོས་མ་གནང་བར་ཡང་བསྐྱར་ནང་སྦྱོང་སྐུལ་བ་ཡིན་ན་སློབ་མ་ཉུང་ཤས་ཞིག་ལས་གཞན་མང་པོས་ནང་སྦྱོང་རྩ་བ་ནས་འབྲི་ཡི་མ་ེད། གང་ཡིན་ཟེར་ན་ཁོ་ཚོས་སེམས་སུ་རྒན་ལགས་ཀྱིས་རང་སྦྱོང་དག་བཅོས་ནི་བྱེད་ཀྱི་མི་འདུག བྲིས་དང་མ་བྲིས་གཅིག་པ་རེད་བསམ་ངེས་རེད། སོང་ཙང་དགེ་རྒན་གྱིས་ཉིན་ལྟར་སློབ་མའི་ནང་སྦྱོང་ལ་དག་བཅོས་དང་སྣོན་འཕྲི་ཁ་སྐོང་བྱས་ཏེ་སློབ་མའི་ནང་སྦྱོང་འབྲི་ཐབས་ཡར་རྒྱས་གཏོང་ཐབས་ལ་འབད་དགོས། འོན་ཀྱང་སློབ་མ་རྣམས་ཀྱིས་རང་སྦྱོང་འབྲི་སྐབས་དག་ཆ་ཧ་ཅང་མང་པོ་ནོར་ངེས་ཡིན་པས་དགེ་རྒན་གྱིས་དམར་རྟགས་མང་པོ་བརྒྱབ་པ་ཡིན་ན་སློབ་མ་ཚོ་སེམས་ཤུགས་ཆགས་པ་དང་འབྲི་འདོད་ཀྱི་འདུན་པ་བརླག་པ་སོགས་ཡོང་ངེས་ཡིན་པས་དགེ་རྒན་གྱིས་ཐབས་མཁས་པའི་སྒོ་ནས་དག་བཅོས་གནང་ཐུབ་ན་དགེ་མཚན་ཆེན་པོ་མཐོང་ཞིང་། སློབ་མ་མི་རེ་ངོ་རེ་ནས་གདོང་ཐུག་ནས་དག་བཅོས་གནང་བ་ཡིན་ན་སློབ་མ་ཚོས་དག་ཆ་སོགས་ནོར་ཡོད་ན་ཡང་ཁྱེད་ཀྱིས་འདི་ཚོ་ནོར་འདུག ཡིན་ན་ཡང་སྐྱོན་ཡོད་པ་མ་རེད། ད་ཆ་ཁྱེད་རང་སློབ་ཕྲུག་ཡིན་པ་དང་དོ་ནན་ཆེན་པོས་ཞིབ་ཚགས་བྱ་ཐུབ་ན་མ་འོངས་པར་དག་ཆ་ཡར་རྒྱས་འགྲོ་ཡི་རེད་སོགས་ཐབས་མཁས་པོའི་སྒོ་ནས་སློབ་མའི་ཁམས་དང་མཐུན་པའི་བསླབ་བྱ་རྒྱག་གལ་ཆེ། དེ་ལྟར་ན་སློབ་མ་རྣམས་ཀྱིས་དག་ཆ་ལ་དོ་སྣང་ཡག་པོ་གནང་བ་དང་རྗེས་སུ་དག་ཆ་མ་ནོར་བའི་ཐབས་ཤེས་གཏོང་ངེས་རེད། ༢༽ རང་སྦྱོང་སྐུལ་སྟངས་སློབ་མ་རྣམས་ལ་སློབ་ཚན་གཅིག་པུ་མ་ཡིན་པར་སློབ་མ་རང་ཉིད་ཀྱི་མོས་པ་དང་མཐུན་པའི་རང་སྦྱོང་སྐུལ་དགོས། དེ་ཡང་སྐབས་རེར་རི་མོ་འབྲི་བ་དང་ཡང་སྐབས་རེར་སྒྲུང་འབྲི་བ་དང་སྒྲུང་བཤད་པ་ལ་སོགས་པའི་བྱེད་སྒོའི་ལམ་ནས་རང་སྦྱོང་སྐུལ་བ་ཡིན་ན། སློབ་མ་རྣམས་ཀྱི་ཀླད་པ་འཚར་ལོངས་ཡོང་བར་ཕན་ཐོག་ཆེན་པོ་ཡོང་ངེས་རེད། ཡང་སྐབས་རེར་སློབ་མ་རྣམས་ཚོགས་ཆུང་ལ་བགོས་ཏེ་རང་སྦྱོང་མཉམ་དུ་གནང་བཅུག་པ་ཡིན་ན་སློབ་མ་བློ་ཁ་ཞན་པ་རྣམས་ལ་བློ་བསྐྱེད་ཆེན་པོ་རག་པ་མ་ཟད། ཁོང་ཚོ་ཕན་ཚུན་གོ་བསྡུར་ཡང་གང་ལེགས་ཡོང་ངེས་རེད། དེར་བརྟེན་དགེ་རྒན་གྱིས་ཐབས་ཤེས་སྣ་ཚོགས་བསྟེན་ནས་རང་སྦྱོང་སྐུལ་དགོས་པ་ནི་ཤིན་ཏུ་གལ་ཆེར་མཐོང་། དེ་འདྲ་གནང་ན་དགེ་སློབ་གཉིས་ཀྱི་དགོས་དོན་འགྲུབ་ངེས་རེད་སྙམ་མོ། །

  བསྟན་འཛིན་སྐལ་ལྡན། སྦེལ་ཀོབ་སཾ་བྷོ་ཊ། གཞི་རིམ་གོང་མའི་བོད་དགེ ༄༅། ། སློབ་གྲྭ་ཁག་གི་དགེ་རྒན་རྣམ་པས་འབྲི་རྩོམ་གྱི་ལམ་ནས་བརྗོད་གཞི་གང་རུང་ཞིག་གི་ཐོག་རང་གི་ཉམས་མྱོང་དང་འབྲེལ་ཏེ་ཕན་ཚུན་སྦྱང་བཤད་དང་བསམ་ཚུལ་བརྗེ་ལེན་གྱི་སྟེགས་བུ་གསར་པ་ཞིག་རང་གཞུང་ཤེས་རིག་ལས་ཁུངས་ནས་བསྐྲུན་གནང་བར་ཐུགས་རྗེ་ཆེ་ཞེས་ཞུ་རྒྱུ་དང། སྤྱིར་ཁོ་བོ་ནི་ཤེས་ཡོན་གྱི་སྡེ་ཚན་ནང་ལས་ཀ་བྱས་ཏེ་ད་བར་ལོ་ངོ་དྲུག་ལས་འཁོར་མེད་ཀྱང། འདས་པའི་ཉམས་མྱོང་ཁག་ལ་གཙོ་བོར་གཞི་བྱས་ཏེ་སློབ་ཕྲུག་རྣམས་ལ་ནང་སྦྱོང་སྤྲོད་སྟངས་དང། ཞུ་དག་བྱེད་ཕྱོགས་ཐད་གླེང་སློང་གི་ཚུལ་དུ་མདོར་ཙམ་བྲི་རྒྱུ་ཡིན། ཁོ་བོ་རང་ཉིད་ལ་ཆ་མཚོན་ན་གཞི་རིམ་བར་མར་སློབ་ཁྲིད་ལོ་གསུམ་བྱས་ཤིང་། དེ་རྗེས་གཞི་རིམ་གོང་མར་སློབ་ཁྲིད་བྱས་ནས་ད་ཆ་ལོ་གསུམ་པ་དེ་འགྲོ་བཞིན་མཆིས། སློབ་ཕྲུག་ཚོས་ནང་སྦྱོང་དུས་ཐོག་ཏུ་བྱེད་པ་དང། རང་འགུལ་གྱིས་སློབ་སྦྱོང་བྱེད་པའི་གོམས་གཤིས་འཇགས་ཐུབ་ཐབས་དེ་གཞི་རིམ་བར་མའི་སྐབས་སུ་འཐུས་ཚང་ཞིག་འབྱུང་ཐུབ་ཚེ་སློབ་ཕྲུག་ཚོར་གོམས་གཤིས་འཇགས་སླ་བ་དང། ཁེ་ཕན་ཆེ་བ་ཡོད་པའི་ཚོར་སྣང་ཤུགས་ཆེ་ཞིག་སྔར་ནས་བྱུང་སྟབས། གཤམ་གྱི་རྩོམ་ལུས་ནང་གི་གནད་དོན་རྣམས་ཀྱང་གཞི་རིམ་བར་མའི་སློབ་ཕྲུག་གཞིར་བཞག་གིས་བྲིས་པ་ཞིག་ཡིན་པས་དེ་དོན་དགོངས་འཇགས་ཡོད་པ་ཞུ། སྐབས་བབས་ནང་སྦྱོང་སྤྲོད་ཕྱོགས་དང། ནང་སྦྱོང་ཞུ་དག་གནང་ཕྱོགས་སྐོར་ས་བཅད་བཞིར་བགོས་ནས་ཞུ་ན། ༡) ནང་སྦྱོང་སྤྲོད་པའི་དམིགས་ཡུལ་ངོས་གཟུང་བ། ༢) ནང་སྦྱོང་ཇི་འདྲ་ཞིག་སྤྲོད་དགོས་པ། ༣) ནང་སྦྱོང་སྤྲོད་མཁན་གྱི་དགེ་རྒན་ལ་ཆ་རྐྱེན་ཇི་འདྲ་ཞིག་ཚང་དགོས་པ། ༤) སློབ་ཕྲུག་གི་ཕ་མས་གནང་དགོས་ཁག་བཅས་ཡིན། ༡) ཐོག་མར་ནང་སྦྱོང་སྤྲོད་པའི་དམིགས་ཡུལ་གང་ཡིན་ངོས་བཟུང་དགོས་པ་ནི་ཤིན་ཏུ་གལ་གནད་ཆེ་བ་ཡིན། འོན་ཏང་ནང་སྦྱོང་སྤྲོད་པའི་དགོས་དམིགས་དེ་རྟག་ཏུ་གཅིག་རང་ཡིན་དགོས་པའི་ངེས་པ་མེད། དགེ་རྒན་གཅིག་གིས་འཛིན་གྲྭ་གཅིག་གི་ནང་ལ་ཡང་། ནང་སྦྱོང་སྤྲོད་ཐེངས་རེར་དམིགས་ཡུལ་མི་འདྲ་བ་རེ་ཡོད་ཆོག སྤྱིར་ནང་སྦྱོང་སྤྲོད་པའི་དགོས་དམིགས་གཙོ་བོ་ནི། སློབ་ཁྲིད་ཟིན་པའི་ནང་དོན་རྣམས་སློབ་ཕྲུག་ཚོས་བསྐྱར་སྦྱོང་དང་སྦྱོང་ཚན་གྱི་ལམ་ནས་ཁོང་དུ་ཆུད་ཐབས་དེ་ཡིན་པ་ནི་སྨྲོས་མི་དགོས་པ་ཞིག་ཡིན། འོན་ཀྱང་དེ་ནི་སྤྱི་ཡོངས་ཀྱི་དགོས་དམིགས་ཤིག་ཡིན་པས། ཞིབ་ཚགས་བྱས་ཏེ་ནང་གསེས་ཀྱི་དབྱེ་བ་བྱེ་བྲག་སོ་སོར་དབྱེ་དགོས་ཏེ། དཔེར་ན། བློ་འཛིན་གྱི་རྩལ། ཀློག་རྩལ། འབྲི་རྩལ། དཔྱད་ཞིབ་ཀྱི་རྩལ། མཚུངས་བསྡུར་གྱི་རྩལ། གནས་ཚུལ་མཁོ་སྒྲུབ་ཀྱི་རྩལ། གསར་གཏོད་ཀྱི་རྩལ་ལ་སོགས་པ་བྱེ་བྲག་གཅིག་དམིགས་ཡུལ་དུ་གཟུང་ཚེ། དགེ་རྒན་གྱི་ངོས་ནས་ནང་སྦྱོང་སྤྲོད་བདེ་བ་ཡོང་གི་འདུག་ལ། ནང་སྦྱོང་སྤྲོད་སྟངས་དེ་ཡང་འཆར་གཞི་དང་ལྡན་པ་ཞིག་ཡོང་གི་འདུག ཡང་གོང་སྨོས་དམིགས་ཡུལ་དེ་དག་ཀྱང་གཅིག་ཕན་གཅིག་གྲོགས་སམ་གཅིག་ལ་གཅིག་བརྟེན་ཇི་ལྟར་ཡིན་པ་ངོས་འཛིན་མ་ནོར་བའི་སྒོ་ནས་བང་རིམ་ངེས་ཅན་གྱིས་ནང་སྦྱོང་སྤྲད་ཚེ་ཕན་ཡོན་དེ་བས་ཆེ་བ་འདུག་པས་དམིགས་ཡུལ་དེ་དག་གི་སྔ་ཕྱི་མ་འཛོལ་བར་གནང་དགོས་གལ་ཆེ། ༢) ནང་སྦྱོང་ཇི་འདྲ་ཞིག་སྤྲོད་དགོས་མིན་ནི། གཙོ་བོ་གོང་སྨོས་ཀྱི་དགོས་དམིགས་ལ་གཞིགས་ནས་སྤྲོད་དགོས་ཀྱང། རྒྱུན་དུ་ནས་ཐུགས་ལ་བཞག་དགོས་པ་ནི། འཛིན་གྲྭ་གང་ཡིན་གྱི་སློབ་ཕྲུག་ཚོའི་བློའི་ནུས་སྟོབས་དང་རན་པའི་ནང་སྦྱོང་སྤྲོད་དགོས་གལ་ཆེ། ལྷ་རབ་བྱུང་ན་སློབ་ཕྲུག་ཡོངས་ལ་ནང་སྦྱོང་གཅིག་རང་མིན་པར། འཛིན་གྲྭ་གཅིག་གི་སློབ་ཕྲུག་ཚོའི་བློའི་ནུས་པས་ལྕོག་ཐུབ་མིན་ལ་ཡང་ཁྱད་པར་ཡོད་སྟབས། ནང་སྦྱོང་དཀའ་སླའམ། ཚད་གཞི་མཐོ་དམའ་ཡི་གདམ་ཀ་ཡོད་པ་ཞིག་སྤྲད་ཚེ་ཤིན་ཏུ་ཁེ་ཕན་ཆེ་བར་མངོན། […]

  སྔོན་གླེང། པདྨ་བསམ་འགྲུབ། ས་སྐྱ་སློབ་གཉེར་ཁང་། བོད་ཡིག་དགེ་རྒན། ཐོག་མར་ངས་ཁྱེད་རྣམ་པར་རང་ཉིད་ལ་དངོས་སུ་བྱུང་བའི་དོན་དག་འགའ། སྒྲུང་གི་རྣམ་པའི་ཐོག་ནས་དཀྱུས་གཅིག་ཏུ་བཤད་པར་འདོད། ང་སྡོད་སའི་གཞིས་གྲོང་འདིའི་རྒྱ་སྒོའི་ཕྱི་རོལ་དུ་རྒྱ་གར་བའི་ཇ་ཁང་ཞིག་ཡོད། དེར་སྔ་གུང་ཕྱི་གསུམ་ལ་བོད་རིགས་ལས་ཡོད་ལས་མེད་མང་དུ་འཛོམས་པ་ཡིན། ང་ནི་བོད་ཡིག་དགེ་རྒན་ཞིག་ཡིན། ཐེངས་འགར་ང་ཡང་དེར་ཁ་བརྡ་བྱས་ནས་བསྡད་མྱོང། བཙན་བྱོལ་དུ་སྐྱེས་ཤིང་འཚར་བའི་བོད་རིགས་མང་ཆེ་བས་རྒྱུན་དུ་བོད་སྐད་ཀྱི་ལམ་ནས་གླེང་མོལ་བྱེད་མོད། ཁོང་ཚོ་ཐུན་མོང་ལ་དཀའ་ཁག་ཅིག་ཡོད་པ་ནི་གཞན་སྐད་ཀྱི་ཐ་སྙད་མང་དུ་བསྲེ་བ་དང་། ལྷག་པར་སྐད་ཆ་ཉམས་དང་ལྡན་པ་ཞིག་བཤད་འདོད་ཚེ། སྐད་ཡིག་གཞན་ལ་བརྟེན་པ་ལས་བོད་སྐད་དུ་བཤད་མི་ཐུབ། དེ་ལྟར་ཇ་ཁང་ཕྱི་རོལ་གྱི་མི་ཚོགས་དེ་ཡང་རྒྱུན་ལྡན་གྱི་གནས་སྟངས་དེ་ལས་མ་འདས། འོན་ཏེ་ངན་ཁག་སུ་ལའང་འགེལ་ས་མེད། དེ་ནི་ཁོར་ཡུག་གིས་བསྐྲུན་པའི་དོན་དངོས་ཤིག་རེད། ཐེངས་ཤིག་ང་དངུལ་ཁང་དུ་སོང་། ཇ་ཁང་ཡང་དེ་ཡི་འགྲམ་དུ་ཡོད། ང་དངུལ་ཁང་གི་ཕྱི་ལ་ཐོན་མ་ཐག ཡར་འཛུལ་དུས་མཚམས་མ་བཞག་པའི་མི་ཚོགས་ཁྲོད་ནས་ཕོ་གསར་རེ་ཟུང་གིས་“རྒན་ལགས། བཀྲ་ཤིས་བདེ་ལེགས་” ཟེར། ཁོང་ཚོས་རོགས་པ་ཞིག་ལ་ལས་དོན་མ་འགྲུབ་པར་སེམས་གསོ་གཏོང་བཞིན་འདུག བར་སྐབས་དེར་ལྷུན་འགྲུབ་ཀྱིས་ཕམ་ཁ་གང་འདྲ་ཞིག་བྱུང་ན་ཡང། སེམས་ཤུགས་ཆག་མི་རུང་། “སྒོ་ངའི་ནང་གི་བྱིའུ་ཆུང་དེ། འཁྱར་འཁྱོར་ཕྱི་ལ་ཐོན། སིག་སིག་ས་ལ་འགྱེལ་ཡང་། ད་དུང་། གཤོག་རྩལ་རྒྱས་ནས། ལུས་ཕུང་འཚར་ནས། སྔར་ལས་ཀྱང་མཐོ་བའི་ནམ་མཁར་འཕུར་བ་མ་ཡིན་ནམ། ”ཞེས་སློབ་གྲྭར་སྦྱངས་བའི་སྙན་ཚིག་གི་དུམ་བུ་འདི་གདེང་སྤོབས་ཀྱིས་གྱེར་སོང་། དེ་ནི་ཅི་འདྲའི་ཡུལ་དུས་དང་འཚམས་པ་ཞིག་རེད་ཨང་། ཉེ་འཁོར་གྱི་ཕོ་གསར་ཚོའི་གདོང་དུ་ངོ་མཚར་དང་ཡིད་སྨོན་རེས་མོས་སུ་ཤར་འོངས། ཁོས་ང་ལ་ལྟ་བཞིན་ཧ་ཧ་ཧ་ཞེས་དགོད་ཙམ་བྱས་པ་ན། ངས་ཁོ་ལ་ལག་འཇུ་དམ་པོ་ཞིག་བྱས་རྗེས་ཅི་ཡང་མ་བཤད་པར་ལོག ལྷུན་འགྲུབ་ནི་ལོ་ངོ་བདུན་སྔོན་གྱི་ངའི་སློབ་ཕྲུག་ཅིག་ཡིན། པྲ་ཚགས་ཡིན་ལ་རྩེ་དགོད་ཆེ་བའི་ཁོ་ནི་སྤྱིར་སློབ་སྦྱོང་ཞན་པོ་ཡོད་པ་མ་ཟད། བོད་ཡིག་གཏན་ནས་མི་སྦྱོང་། འོན་ཀྱང་ངས་ཆེད་དུ་བྲིས་ཤིང་བསླབས་པའི་སྙན་ཚིག་དེ། ཁོའི་ཡིད་ལ་འཇགས་ཤིང་སེམས་ལ་ངེས་འདུག་པ་མ་ཟད། ཁ་ལ་ཡང་བྱང་ཡོད་པར་ང་རང་དགའ་སྤྲོ་དང་སྤོབས་པ་ལྷན་དུ་སྐྱེས་བྱུང། སྙན་ཚིག་སློབ་ཁྲིད་ཀྱི་གལ་གནད། སྤྱིར་སྐད་ཡིག་སློབ་ཁྲིད་ནུས་ལྡན་ཞིག་བྱ་བ་ལ་ཚིག་ལྷུག་དང་སྙན་ཚིག་ནི་ཆ་མཉམ་དུ་གལ་འགངས་ཆེ་བའི་རྩོམ་ལུས་རྣམ་པ་གཉིས་ཡིན་ཞིང་། ནུས་པ་དང་བེད་སྤྱོད་ཀྱི་ཆ་ནས་གཅིག་ཚབ་གཅིག་གིས་བྱ་ཐབས་མེད་པའི་རྩོམ་ལུས་ཁྱད་པར་བ་གཉིས་རེད། དེ་བས་ན་སྐད་ཡིག་བསླབ་གཞིའི་ནང་དུ་སྙན་ཚིག་ཚུད་རྒྱུ་ཧ་ཅང་གལ་ཆེ་མོད། འོན་ཀྱང་། ང་ཚོའི་སྐད་ཡིག་སློབ་ཁྲིད་ཁྲོད་དུ་སློབ་དེབ་ཡིན་ཀྱང་རུང་། སློབ་ཁྲིད་ལག་ལེན་ཡིན་ཀྱང་རུང་། སྙན་ཚིག་གིས་ཧ་ཅང་ཉམ་ཞན་པའི་ཆ་ཤས་ཆུང་ངུ་ཙམ་ཡང་འཛིན་ཐུབ་ཀྱི་མེད་པའི་གནས་སྟངས་ལ་བོད་ཡིག་དགེ་རྒན་རྣམ་པས་དོ་སྣང་དམིགས་སུ་བཀར་ནས་བྱ་དགོས་པར་མཐོང་། ལྷུན་འགྲུབ་ཀྱིས་ཡིག་རྒྱུགས་འཕྲོད་ཙམ་གྱི་ཕྱིར་དུ་སློབ་དེབ་ནང་གི་སྒྲུང་དང་དག་ཡིག བརྡ་སྤྲོད་ཀྱི་སློབ་ཚན་རྣམས་གནས་སྐབས་སུ་ཨུ་ཚུགས་ཀྱིས་སྦྱངས་ཁུལ་ཙམ་བྱས་ཡོད་ཚོད་ཀྱང་དུས་རྒྱུན་བོད་ཡིག་གཏན་ནས་མི་སྦྱོང་། […]

  སྐལ་བཟང་ཉི་མ། བཙུན་དགོན་སྒྲོལ་མ་གླིང་། འབྲིང་རིམ་དགེ་རྒན།   གླེང་གཞི། རང་རེའི་སྐྱབས་བཅོལ་བའི་སློབ་གྲྭ་ཁག་གི་ནང་ཡིག་གཟུགས་འབྲི་སྦྱོང་ཐད་ནས་གཙོ་རྒྱུགས་ལྟ་བུ་ནི་དབུ་མེད་ཡིན་ལ། འདིར་ཡང་དབུ་མེད་འབྲི་སྦྱོང་ཐད་ནས་རང་གི་ཉམས་མྱོང་དང་བསམ་འཆར་བཞི་རང་མཉམ་དགེ་རྒན་དང་ཕ་མ་ཚོར་མཉམ་སྤྱོད་བྱེད་འདོད། ཁོ་བོ་ཡིག་མཁན་དེ་འདྲ་མིན་པ་མ་ཟད། ལྷག་པར་དུ་དབུ་མེད་ཀྱི་ཡིག་གཟུགས་ནི་བཙན་བྱོལ་དུ་འབྱོར་རྗེས། ད་གཟོད་བཀའ་དྲིན་ཅན་གྱི་དགེ་རྒན་རེ་གཉིས་ཤིག་གི་སྒྲིག་གཞིའི་འོག་ནས་འབྲི་ཨེ་ཤེས་བལྟས་མོད། སློབ་གྲྭའི་གནས་སྐབས་སུ་སྣང་མེད་བྱས་ཏེ་རང་གི་འདོད་པ་ཁེངས་པ་ཞིག་ཀྱང་མ་བྱུང་ལ། ད་ཕན་ལོ་ངོ་བཅུ་ཕྲག་ལྷག་གི་དགེ་རྒན་གྱི་ལས་ཀའི་སྒྲིག་གཞིའི་འོག་ནས་ཡིག་གཟུགས་སློབ་ཐབས་དང་སྦྱོང་ཐབས་ཀྱི་འགན་འཁུར་མ་འཁྱེར་ཐབས་མེད་ཀྱིས་ཉམས་མྱོང་ཕྲན་ཚེགས་ཐོབ་པ་ཙམ་ཡིན། དབུ་མེད་ཡིག་གཟུགས་འབྲི་སྦྱོང་ལབ་དུས་མཁས་པའི་དབང་པོ་ཚེ་ཏན་ཞབས་དྲུང་མཆོག་གིས་“དབུ་མེད་ཀྱི་ཡི་གེ་ནི་སྣ་ཁ་གཅིག་མ་ཡིན་པར་རྣམ་གྲངས་དུ་མ་ཞིག་ཡོད། དེ་ཡང་ཐོག་མར་སུག་རིང་འབྲི་ཚུལ་སྦྱོང་དགོས། དེ་ཅུང་ཟད་ལོབས་པ་ན་ཚུགས་ཡིག་ཟེར་བ་དབྱིབས་གྲུ་བཞི་ཅན་ཇི་ལྟར་འབྲི་ཚུལ་སྦྱོང་དགོས། དེ་ལོབས་ནས་བར་བྲིས་ཟེར་བ་ཡིག་གཟུགས་ཅུང་ཟད་ཟླུམ་པོ་བྱང་ན་འབྲི་སླ་བ་ཅན་དེ་སྦྱོང་དགོས། དེ་ལེགས་པར་ལོབས་པ་ན་རྒྱུགས་ཡིག་གམ་འཁྱུག་ཡིག་ཇི་ལྟར་འབྲི་ཚུལ་སྦྱོང་དགོས་”ཞེས་གསུངས་པ་ལྟར་ལ། ཡང་ཁོང་གིས་“ཐོག་མར་ཡི་གེ་སྦྱང་ཚེ། ལུས་བཟུར་ནས་མི་འདུག་པར་དྲང་ཐད་དུ་འདུག ལུས་ཧ་ཅང་མི་དགྱེ་ཧ་ཅང་མི་སྒུར་བར་རན་པར་འདུག ཅོག་ཙེ་བརྟན་པོ་མཐོ་དམའ་ཚད་དང་ལྡན་པ་ལ་བརྟེན་ནས་བྲི་བའི་གཞི་སམ་ཊའམ་ཀ་ཤིང་ཟེར་བ་གཞི་ནག་པོ་ལ་སྣུམ་སྲབ་བུ་ཞིག་བྱུགས་ནས་རྩམ་པའམ་ཕྱེ་བླུགས་པས་དཀར་པོར་བསྒྱུར། ཐིག་ཤིང་བཟུང་ནས་ཐིག་འདེབས་པའམ། ཐིག་སྐུད་ཀྱིས་ཐིག་འདེབས་པའི་འཕྲུལ་བཀོལ་ན་བཟང་། ཤིང་སྤེན་མའི་སྨྱུ་གུ་ལག་ལེན་ལྟར་བཟོས་པ་སྨྱུག་མཆུ་རིང་བ་ཅན་དབུ་ཅན་འབྲི་ན་རྒྱབ་ཀྱི་གཡས་ཟུར་ཅུང་ཟད་ཐུང་བའི་མཚམས་ནས་གྲིས་བཅད། དབུ་མེད་འབྲི་ན་དེ་ལས་ལྡོག་སྟེ་བཅད་”ཅེས་དང་། ཡང་ཁོང་གིས་“སྨྱུག་ཁ་སོར་མོས་ཇི་ལྟར་འཛིན་ཚུལ་ནི། ཅུང་ཟད་བསྙལ་བའི་ཚུལ་གྱིས་འཛིན་དགོས། སྨྱུ་གུའི་མཚམས་གང་ནས་འཛིན་པ་དང་། སྨྱུག་ཁ་ཇི་ལྟར་འཁྲིད་ཚུལ། ཡིག་གཟུགས་ཀྱི་མགོ་དང་རྐེ་སོགས་སྔ་ཕྱིའི་འབྲི་རིམ། སྨྱུག་ཁ་བསྐོར་ནས་ཕྲ་སྦོམ་བཏོད་ཚུལ་རྣམས་ནི་གཙོ་བོ་དགེ་རྒན་གྱི་ཕྱག་ཁྲིད་ལ་བརྟེན་ནས་བསླབ་ན་མ་གཏོགས་ཡིག་ལམ་ནས་ཇི་ཙམ་བཤད་ཀྱང་བརྡར་ཤ་གཅོད་མི་ཐུབ་”ཅེས་གཙོ་ཆེར་དབུ་མེད་ཐོག་མར་འབྲི་སྦྱོང་གི་གོ་རིམ་ནས་བཟུང་སྟེ་སྔར་གྱི་ཡིག་གཟུགས་སྦྱོང་སྟངས་ཕལ་ཆེར་ཆ་ཚང་བ་ཞིག་ངོ་སྤྲོད་གནང་འདུག་ལ། ཁོ་བོས་འདིར་འདི་དག་བསྐྱར་ཟློས་བྱ་རྒྱུ་མིན་པར། དེང་སྐབས་རང་རེའི་སློབ་གྲྭ་ཁག་གི་སློབ་ཕྲུག་ཚོས་ཡིག་གཟུགས་སྦྱོང་སྟངས་ཀྱི་སྣང་ཚུལ་མི་ལེགས་པ་བཞི་ངོས་འཛིན་དང་དེ་དག་ཐག་གཅོད་ཇི་ལྟར་བྱས་ན་ལེགས་ཚུལ་རང་གི་བསམ་འཆར་ལྟར་འཆད་རྒྱུ་ཡིན། ། ། ། གཅིག གཞན་ལ་ལྟོས། ཡིག་གཟུགས་སྦྱོང་བའི་སྐབས་སུ་གཞན་ལ་ལྟོས་ཞེས་པ་འདི་ནི་ཁོ་བོ་སློབ་མའི་གནས་སྐབས་སུ་བོད་དབྱིན་སྐད་གཉིས་ཀྱི་ཡིག་གཟུགས་ལ་དོ་སྣང་བྱེད་ཕྱོགས་ཤིག་ཡིན་ལ། བྱེད་ཐབས་འདིས་ཁོ་བོར་སྐབས་དེར་ཡིག་གཟུགས་སྦྱོང་བར་དགའ་སྣང་དང་སེམས་ཤུགས་བླ་ལྷག་སྦྱིན་ཞིང་། ཁོ་བོའི་ཡིག་གཟུགས་ཇེ་ཡག་ཇེ་འཕེལ་དུ་འགྲོ་བར་རམ་འདེགས་གྱ་ནོམ་པ་བགྱིས་པས། རང་ཉིད་དགེ་རྒན་གྱི་ལས་གནས་སུ་ཞུགས་པ་ནས་སློབ་མ་རྣམས་ལའང་ཉམས་མྱོང་འདི་གདམས་ངག་ལྟ་བུ་ཞིག་གི་ཚུལ་དུ་ཡང་ཡང་དྲན་གསོ་བགྱིས་དང་བགྱི་བཞིན་ཡོད། སྤྱིར་རང་ཅག་ཀུན་པོས་ཡིག་གཟུགས་སྦྱོང་འགོ་རྩོམ་པ་ནས་བཟུང་དགེ་རྒན་གྱི་འབྲི་སྟངས་སམ་མ་དཔེ་ཞིག་གཞིར་བཞག་སྟེ་དེ་ལ་བལྟས་ནས་སྦྱོང་བ་ལགས་ན། དེའང་གཞན་ལ་ལྟ་བར་རྩི་དགོས་པར་མ་ཟད་དེ་ནི་ཡི་གེ་སྦྱོང་མཁན་ཞིག་གིས་ཆེས་ཐོག་མའི་གཡོལ་ཐབས་མེད་པའི་ལམ་ཁའོ་ལབ་ཀྱང་ཅིས་མི་ཆོག་མོད། འདིར་དེ་ལྟ་བུ་ལ་བརྗོད་པ་མིན་པར། དགེ་རྒན་གྱིས་སློབ་མར་རང་དང་ཆེས་ཐག་ཉེ་བའི་འཛིན་ཁང་གི་ཅོག་ཙེ་སྟེང་གི་འདུག་རོགས་དང་འཛིན་གྲོགས་གཞན། གཏན་སློབ་ལྟ་བུ་ཡིན་ན་ཉལ་ཁང་ནང་ན་འཛིན་གྲྭ་དང་ལོ་ཚད་མཐོ་དམན་ལ་སོགས་པ་ཁྱད་པར་ཅན་མང་པོ་འཛོམས་ཕྱིར་ཉལ་ཁང་ནང་གི་གྲོགས་ཕོ་མོ། འཛིན་གྲྭ་དང་ཉལ་ཁང་གི་ཁྱད་མི་དབྱེ་བར་རང་རང་གི་སློབ་གྲྭའི་ནང་གི་སློབ་གྲོགས་ཡོངས། དེ་མིན་སློབ་གྲྭ་གཞན་གྱི་གྲོགས་པོ་དང་གྲོགས་མོ། ཡི་གེ་འབྲི་ཀློག་དང་འབྲེལ་བའི་ལས་ཀ་བྱེད་མཁན་ནམ་དེ་ལ་སྤྲོ་སྣང་ལྡན་པའི་ཁྱིམ་གྱི་ཕ་མ་གཉིས་དང་གཅེན་གཅུང་། ཁྱིམ་མཚེས་སོགས་གཞན་དང་གཞན་བཅས་ཀྱི་ཡིག་གཟུགས་ལ་ཡང་ཡང་ལྟ་དགོས་པའི་བླང་བྱ་འདོན་པ་ལ་བརྗོད་པ་ཡིན། དེ་ལ་ལྟ་སྟངས་ཀྱི་ཐད་ནས་ཁོ་བོར་འདི་འགྲིག་དང་དེ་ནོར་ཞེས་གྲུབ་མཐའ་ལྟ་བུ་མེད་ལ། དགེ་རྒན་རང་རང་གི་སློབ་ཁྲིད་ཀྱི་ཉམས་མྱོང་དང་སློབ་གསོའི་ཁོར་ཡུག་སོགས་ལ་གཞིགས་ཏེ་ཐབས་ཤེས་སྣ་ཚོགས་བགྱི་ཆོག་པ་འ་ཅང་ཅང་། ཁོ་བོས་ནམ་རྒྱུན་ཁ་ནས་མ་ཎི་བཞིན་ཟློ་བ་ལ་གཉིས་ཡོད་དེ། […]

བསྟན་འཛིན་སྒྲོལ་མ། མེས་དབོན་གཙུག་ལག་དཔེ་སྟོན་སློབ་གྲྭ། གཞི་རིམ་འོག་མའི་བོད་དགེ འཛིན་གྲྭ་སྟངས་འཛིན་ཞེས་པ་ཚིག་འབྲུ་བཞི་ལས་གྲུབ་པའི་མིང་ཚིག་དེ་ལ་མི་སོ་སོས་གཟིགས་སྟངས་མི་འདྲ་བ་རེ་ཡོད་དེ། འགའ་ཞིག་གིས་འཛིན་གྲྭའི་ནང་སློབ་མ་ཡོད་ཀྱང་འཛིན་ཁང་ཁ་ཁུ་སིམ་པོའི་ངང་གནས་ཡོད་ཚེ། དགེ་རྒན་གྱིས་འཛིན་གྲྭ་སྟངས་འཛིན་ཡག་པོ་གནང་བ་ཞིག་ལ་ངོས་འཛིན་པ་དང་། ཅིག་ཤོས་ཀྱིས་འཛིན་གྲྭའི་ནང་སློབ་མ་རྣམས་འཁྲུག་ཆ་དོད་པོའི་ངང་སློབ་སྦྱོང་ལ་བརྩོན་བཞིན་པ་གཟིགས་དུས་དགེ་རྒན་གྱིས་འཛིན་གྲྭ་སྟངས་འཛིན་ཡག་པོ་གནང་འདུག་ཅེས་གསུངས་མཁན་ཡང་ཡོད། གང་ལྟར་ཐབས་ལམ་དེ་གཉིས་ལ་རྒྱུ་མཚན་ངེས་ཅན་ཞིག་ཞུ་དགོས་ཚེ་ང་ཚོས་འདི་ལྟར་སེམས་དགོས་ཏེ་དུས་ཀྱི་འགྱུར་བ་ལ་བརྟེན་ནས་མིའི་ལྟ་ཕྱོགས་ལ་འགྱུར་བ་འགྲོ་བས་ཡིན་པ་ལས་ཐབས་ལམ་འདི་བཟང་དང་དེ་ངན་ཟེར་ནས་ཚིག་ཐག་གཅོད་དཀའ་བར་སྣང་། གང་ལྟར་དུས་རབས་ཉི་ཤུ་རྩ་གཅིག་གི་མིས་བཤད་སྟངས་ལ་ཉན་ན། ཁ་ཁུ་སིམ་པའི་འཛིན་གྲྭའི་ནང་སློབ་སྦྱོང་ཤེས་དཀའ་བས་འཛིན་གྲྭ་ནི་དུས་ནམ་ཡང་འཁྲུག་ཆ་དོད་པོ་ཞིག་དགོས། འཁྲུག་ཆ་དེའི་ནང་སློབ་མས་རང་གི་བསམ་བློའི་ནུས་རྩལ་ཡོད་ཚད་སློབ་སྦྱོང་གི་ཕྱོགས་སུ་སྤུངས་ཐུབ་པའི་ཆ་རྐྱེན་ཞིག་དགེ་རྒན་གྱིས་བསྐྲུན་ཐུབ་པ་དགོས་པ་དེ་དགེ་རྒན་དེའི་རང་གིས་ལས་ཁུར་ལ་འགན་ཁུར་བའི་རྟགས་མཚན་ཡིན་པས། ངས་ཀྱང་དེ་འདྲ་ཞིག་ལ་འཛིན་གྲྭ་སྟངས་འཛིན་ཡག་པོ་ཐུབ་པ་ཞིག་ལ་ངོས་འཛིན་བྱེད་བཞིན་ཡོད། ཁ་ཁུ་སིམ་པའི་འཛིན་གྲྭའི་ནང་སློབ་མ་ཚོའི་བསམ་བློ་འཛིན་གྲྭའི་ཕྱི་དང་རྩེད་མོ་ལ་གཡེང་བ་དང་སློབ་སྦྱོང་ལ་ཉོབ་སྣང་གིས་འཛིན་གྲྭའི་ནང་གཉིད་དུ་ཡུར་བ་སོགས་ཀྱིས་དགེ་རྒན་གྱི་སློབ་ཁྲིད་ལ་དོ་སྣང་བརླག་སྟེ་གང་ཡང་ཤེས་ཀྱི་མ་རེད། དེ་ནི་འཛིན་གྲྭ་སྟངས་འཛིན་ཡག་པོ་མ་ཐུབ་པའི་སྐྱོན་ཡིན། རྒྱུ་མཚན་དེ་ལ་བརྟེན་ནས་ང་ཚོས་འཛིན་གྲྭ་སྟངས་འཛིན་ཡག་པོ་ཡོང་བར་དེ་ལ་འགོག་རྐྱེན་བྱེད་མཁན་གྱི་རྒྱུ་གཙོ་བོ་རྣམས་སྔོན་ལ་ངོས་འཛིན་ཐུབ་པ་བྱ་དགོས། གུས་མོས་བསམ་ན། དེ་དག་ནི། ༡། རྣམ་གཡེང་དང་། ༢། སློབ་ཚན་ལ་ཉོབ་སྣང་གི་ཚོར་བ་གཉིས་དེ་ལ་རག་ལུས་ཡོད། རྒྱུ་འདི་གཉིས་བྱུང་བར་རྒྱུ་རྐྱེན་གཞན་མང་པོ་ལ་རག་ལུས་པས་ང་ཚོས་དེ་དག་ཚང་མ་ངོས་འཛིན་ཐུབ་པ་བྱ་དགོས། དེ་ཡང་རྒྱུ་རྐྱེན་གཞན་ནི། ༡། ཚོགས་ཐུན་བརྗེས་པ། སློབ་མ་ཚོར་སློབ་ཚན་མང་བས་ཚོགས་ཐུན་གཅིག་རྗེས་གཉིས་མཐུད་ཀྱིས་དུས་ཚོད་རེའུ་མིག་བསྒྲིགས་ཏེ་ཡོད། སྐབས་དེ་དུས་དགེ་རྒན་གཅིག་གི་སློབ་ཚན་ཚར་རྗེས་དགེ་རྒན་རྗེས་མ་དེ་ལམ་སང་འཛིན་གྲྭའི་ནང་མ་ཕེབས་ན། སློབ་མ་ཚོར་སྣང་བ་གཡེང་རྒྱུའི་དུས་ཚོད་ཐོབ་སྟེ་ཁོ་ཚོས་ལམ་སང་འཛིན་གྲྭ་དང་ཁྱམས་རའི་ནང་ཡར་རྒྱུག་མར་རྒྱུག་དང་སྐད་ཅོར་བརྒྱབ་པ་སོགས་བསམ་བློ་ཆ་ཚང་སློབ་སྦྱོང་ནས་རྩེད་མོར་གཡེང་སྟེ་དགེ་རྒན་དངོས་འཛིན་གྲྭར་ཕེབས་ཏེ་སློབ་ཚན་འགོ་བཙུགས་ཀྱང་ཁོ་ཚོའི་སེམས་སློབ་སྦྱོང་ལ་ཚུར་བཀུག་ཁག་པས་འཛིན་གྲྭ་སྟངས་འཛིན་བྱེད་པར་དཀའ་ངལ་འཕྲད་ཀྱི་རེད། དེར་བརྟེན་ཚོགས་ཐུན་བརྗེ་པོ་རྒྱག་དུས་དགེ་རྒན་རྣམས་རྗེས་ལུས་མེད་པར་འཛིན་གྲྭར་དུས་ཐོག་ཏུ་ཕེབས་དགོས། དེ་ལྟར་གནང་ཚེ་འཛིན་གྲྭ་སྟངས་འཛིན་ཐུབ་པར་ཕན་ཐོགས་ཆེ། ༢། སློབ་ཚན་འགོ་ཚུགས་དུས། འཛིན་གྲྭ་ཚོགས་པ་དང་དགེ་རྒན་གྱིས་ཉིན་མ་དེ་རིང་གི་སློབ་ཚན་ལ་ཤར་བསྐྱོད་བྱས་ཚེ། སློབ་མ་ཁག་ཅིག་གིས་སྔོན་གྱི་ཉིན་མོའི་སློབ་ཚན་དང་དེ་རིང་གི་སློབ་ཚན་གཉིས་མཐུད་བརྒྱབ་མ་ཐུབ་པའི་དཀའ་ངལ་གྱིས་སློབ་བཞིན་པའི་སློབ་ཚན་གྱི་ནང་དོན་རྟོགས་པར་དཀའ་ངལ་འཕྲད་ཀྱི་ཡོད། དེ་ལ་བརྟེན་སློབ་སྦྱོང་ལ་སྤྲོ་སྣང་བརླག་སྟེ་རྩེད་མོར་གཡེང་བ་དང་ཡང་ན་ཉོབ་སྣང་གིས་གཉིད་དུ་ཡུར་ཏེ་འཛིན་གྲྭ་སྟངས་འཛིན་བྱེད་པར་དཀའ་ངལ་མི་ཉུང་བ་ཞིག་འཕྲད་སྲིད་པས་དགེ་རྒན་གྱིས་སློབ་ཚན་མ་ཁྲིད་གོང་སྔོན་གྱི་སློབ་ཚན་ཅུང་བསྐྱར་སྦྱོང་བྱས་རྗེས་སློབ་ཚན་གསར་པ་ཁྲིད་ཚེ་སློབ་མ་རྣམས་ཀྱིས་ཁ་སང་དང་དེ་རིང་གི་སློབ་ཚན་གཉིས་མཐུད་ཐུབ་པར་བརྟེན་སློབ་ཚན་ལ་སྤྲོ་སྣང་འཕེལ་ཏེ་དོ་སྣང་ཆེན་པོས་སློབ་ཚན་ལ་ཉན་གྱི་རེད། དེ་འདྲ་བྱུང་ཚེ་དགེ་རྒན་གྱིས་འཛིན་གྲྭ་སྟངས་འཛིན་བྱེད་པར་དཀའ་ངལ་འཕྲད་ཀྱི་མ་རེད། ༣། དུས་ཚོད་དམ་འཛིན་གནང་སྟངས། དགེ་རྒན་གྱིས་སློབ་ཁྲིད་གནང་དུས་བྱེད་སྒོ་འདྲ་མིན་སྣ་ཚོགས་གོ་སྒྲིག་གནང་གི་ཡོད། ཡིན་ཡང་བྱེད་སྒོ་དེ་དག་གནང་པར་དགེ་རྒན་གྱིས་དུས་ཚོད་ལ་དམ་འཛིན་ངེས་པར་དུ་གནང་དགོས། དཔེར་ན། འཛིན་གྲྭའི་ནང་དྲི་རྩལ་དང་འབྲེལ་བའི་བྱེད་སྒོའི་རིགས་སྤེལ་སྐབས་དགེ་རྒན་གྱིས་དུས་ཚོད་བཀག་དགོས། སྐབས་རེ་སློབ་མ་ཚོས་ལན་མ་བརྒྱབ་པར་དུས་ཚོད་རིང་པོ་ཞིག་ཕར་གཡོལ་ཚུར་གཡོལ་བྱས་ཏེ་དགེ་རྒན་དང་སློབ་མ་གཞན་གྱི་དུས་ཚོད་ཆུད་ཟོས་སུ་བཏང་པ་མ་ཟད་བྱེད་སྒོ་སྤེལ་བ་བཞིན་འགྲོ་མ་ཐུབ་པའི་རྐྱེན་འཛིན་གྲྭར་འུར་སྒྲོག་ཆེ་བས་འཛིན་གྲྭ་སྟངས་འཛིན་ཡོང་བ་ལ་དཀའ་ངལ་འཕྲད་ཀྱི་ཡོད། དེར་བརྟེན་འཛིན་གྲྭ་སྟངས་འཛིན་ཡག་པོ་ཞིག་ཡོང་བར་དུས་ནམ་ཡང་དགེ་རྒན་གྱིས་བྱེད་སྒོ་གྲ་སྒྲིག་གནང་དུས་དུས་ཚོད་ལ་ངེས་པར་དུ་དམ་འཛིན་གནང་དགོས། ༤། སློབ་ཚན་འཆར་འགོད། ཤེས་ཡོན་སྲིད་བྱུས་ནང་དགེ་རྒན་གྱིས་འཛིན་གྲྭའི་ནང་སློབ་ཕྲུག་རྣམས་ལ་དངོས་སུ་སློབ་ཁྲིད་བྱེད་སྐབས་སློབ་མ་དབུས་སུ་བཞག་པའི་ཐབས་ཚུལ་འཛིན་དགོས་ཞེས་གསུངས་པ་བཞིན། དེ་དག་བསྒྲུབ་པ་ལ་ཐོག་མར་དགེ་རྒན་གྱིས་འཛིན་གྲྭར་མ་ཕེབས་གོང་སློབ་ཚན་འཆར་འགོད་ཡག་པོ་བསྒྲིགས་གནང་དགོས། དེ་ཡང་འཆར་འགོད་བསྒྲིགས་པ་འདི་གཏན་འབེབས་མ་ཡིན་པར་འཛིན་གྲྭའི་ནང་སློབ་ཁྲིད་དངོས་གནང་དུས་སློབ་མའི་ཁམས་དང་མོས་པ་ལ་བསྟུན་ནས་བརྗེ་ཐུབ་མཁན་གྱི་འཆར་འགོད་སྒྱུར་བཅོས་བདེ་པོ་ཞིག་དགོས། དེ་འདྲ་བྱུང་ན། དགེ་རྒན་གྱིས་འཛིན་གྲྭ་སྟངས་འཛིན་ཡག་པོ་ཐུབ་པར་དཀའ་ངལ་ཅུང་ཙམ་ཞིག་ཀྱང་འཕྲད་རྒྱུ་མིན་པའི་ཡིད་ཆེས་ཡོད། སྐབས་རེ་དགེ་རྒན་གྱིས་འཆར་འགོད་ཡག་པོ་མེད་པའི་ཐོག་འཛིན་གྲྭའི་ནང་སློབ་ཁྲིད་དང་བྱེད་སྒོ་སྤེལ་དུས་སློབ་མས་བཏོན་པའི་རྣམ་དཔྱོད་འདྲ་མིན་ལ་སྟངས་འཛིན་བྱེད་མ་ཐུབ་པའི་གནས་སྟངས་ཤིག་གིས་སློབ་ཚན་ཡག་པོ་འགྲོ་མ་ཐུབ་པའི་དཀའ་ངལ་ཆེན་པོ་འཕྲད་ཀྱི་རེད། དེ་ནི་དགེ་རྒན་གྱིས་སློབ་ཚན་འཆར་འགོད་ཡག་པོ་མ་སྒྲིག་པའི་རྐྱེན་གྱིས་སློབ་མའི་བྱ་སྤྱོད་ལ་ལམ་སེང་གདོང་ལེན་བྱེད་མ་ཐུབ་པ་རེད། དེ་ལ་བརྟེན་ནས་འཛིན་གྲྭ་སྟངས་འཛིན་ཡག་པོ་བྱེད་མ་ཐུབ་པ་ཞིག་བྱུང་བ་རེད། ༥། […]

ལྷག་པ་དོན་གྲུབ། སྦེལ་ཀོབ་བོད་ཁྱིམ་འབྲིང་རིམ་གོང་མའི་བོད་དགེ ཕྱོགས་མཚམས་བྲལ་བའི་འཛམ་གླིང་འཛིན་མའི་ཁྱོན་འདིར་མིའི་སེམས་ཁམས་ཀྱི་ནུས་པ་གོང་ནས་གོང་དུ་འཕེལ་བར་ཤེས་ཡོན་གྱིས་ཞབས་འདེགས་ཧ་ཅང་ཆེན་པོ་སྒྲུབ་ཐུབ་པ་སྨྲ་བསམ་བརྗོད་མེད་ལགས། ཤེས་ཡོན་གྱིས་སྤྱི་ཚོགས་མིག་དཔེར་འོས་པ་ཞིག་ཏུ་ཁྲིད་ཐུབ་ལ་དེ་མཚུངས་དམའ་འབེབས་ཀྱི་གནས་སུའང་ལྷུང་དུ་འཇུག་ཐུབ། ཤེས་ཡོན་གྱིས་གང་ཟག་ཅིག་བསྟོད་པའི་གནས་སུ་འདྲེན་ཐུབ་ལ་གང་ཟག་ཅིག་སྨད་པའི་གནས་སུའང་བསྐྱལ་ཐུབ་པ་སོགས་ནི་བདེན་པའི་གནས་ཚུལ་སྐྱུར་མོ་ཞིག་ལགས། ཤེས་ཡོན་གནས་ཚད་ཇི་ཙམ་ཆེ་བའི་ཚོད་ཀྱིས་སྒོ་གསུམ་སྤྱོད་པའང་ཞི་དུལ་དུ་གྱུར་ནས་འགྲོ་བ་ཀུན་ལ་མིག་དཔེར་འོས་པའི་ལམ་སྟོན་བཟང་པོ་སྤེལ་མཁན་མཁས་དབང་གྲངས་ལས་འདས་པ་བྱུང་བ་བདེན་མོད། ཤེས་ཡོན་ཅན་གྱི་མི་སྣས་འཛམ་གླིང་ངོ་གནོང་དགོས་པ་ཞིག་ཏུ་བཟོས་པའང་ང་ཚོར་ལྐོག་གྱུར་གྱི་གནས་ཤིག་ནམ་ཡང་མ་ལགས། སྐབས་འདིར་འཛིན་གྲྭ་ཞེས་པ་སྒྲོག་རྩེ་དང་ཞབས་བཀྱག་གིས་ཁེངས་པའི་ཁང་སྟོང་ཞིག་ལ་མི་འཇུག་པར་དུས་ཚོད་དང་སློབ་ཚན་ངེས་ཅན་ཞིག་གི་ཐོག་སློབ་དགེ་དང་སློབ་ཕྲུག་ལྷན་འཛོམས་ཀྱིས་སློབ་ཁྲིད་བྱ་བའི་བརྒྱུད་རིམ་སྤེལ་སའི་གནས་ཤིག་ལ་གོ་ཞིང་། དེ་ལྟའི་འཛིན་གྲྭའི་ནང་དུ་ཤེས་ཡོན་སློབ་སྦྱོང་ཚད་དང་ལྡན་པ་ཞིག་འཐོབ་པར་སློབ་དགེའི་སྟངས་འཛིན་གྱི་བྱ་རིམ་ནི་ཆེས་གལ་འགངས་ཤིག་ཡིན་པ་ནི་སློབ་གྲྭར་འགྲིམས་མྱོང་མཁན་ཤེས་ལྡན་ཀུན་ལ་མངོན་སུམ་གྱིས་གྲུབ་སྙམ། འཛིན་གྲྭ་སྟངས་འཛིན་ཞེས་པ་ནི་གཙོ་བོ་སྒྲིག་འཛུགས་དང་འབྲེལ་བ་དམ་ཟབ་ཡོད་ཅིང་། དེ་ཡང་སྒྲིག་འཛུགས་མེད་ན་ཡོན་ཏན་མི་ཐོབ་པ་ལྟར་འཛིན་གྲྭ་སྟངས་འཛིན་ལེགས་པོ་མེད་ཚེ་དེ་མཚུངས་སློབ་ཕྲུག་རྣམས་ལ་ཤེས་ཡོན་སྦྱོར་རྒྱུའི་རེ་བའང་དཀའ། སྤྱིར་འཛིན་གྲྭར་སློབ་ཕྲུག་རྣམས་ལ་ཤེས་ཡོན་སློབ་སྦྱོང་སྤྲོད་རྒྱུའི་བརྒྱུད་རིམ་ནང་དུ་དགེ་རྒན་ནི་གལ་ཆེ་ཤོས་སུ་བརྩིས་པའི་རྒྱུ་མཚན་ཡང་དེར་ཐུག་སྙམ། དགེ་རྒན་ལ་ཤེས་ཡོན་ཕུན་སུམ་ཚོགས་པ་ལྡན་ཡང་འཛིན་གྲྭ་སྟངས་འཛིན་ལུགས་མཐུན་དུ་གནང་མ་ཐུབ་ཚེ་ཐོབ་ངེས་ཀྱི་འབྲས་བུ་བཟང་པོ་ནི་ཉིན་མོར་སྐར་མའི་རེ་བ་དང་མཚུངས། དེས་ན་འཛིན་གྲྭ་སྟངས་འཛིན་བྱེད་སྟངས་ཀྱི་གནས་ཚུལ་རང་གི་ཉམས་མྱོང་དང་སྤེལ་ནས་ཞུ་རྒྱུར། དགེ་རྒན་གྱིས་འཛིན་གྲྭའི་སློབ་ཕྲུག་རྣམས་ལ་སྙིང་རྗེས་ཀུན་ནས་བསླངས་ཏེ་བསྐྱངས་མ་ཐུབ་པ་ཡིན་ནའང་། དགེ་རྒན་ཕལ་མོ་ཆེ་ཕ་མར་གྱུར་གཤིས་རང་ཉིད་ཀྱི་བུ་ཕྲུག་ལ་གཟིགས་ཚུལ་ཇི་ཡོད་ལྟར་འཛིན་གྲྭའི་སློབ་ཕྲུག་རྣམས་ལ་ཡང་དེ་བཞིན་བསྐྱངས་ཐུབ་པ་ཡིན་ན་རིམ་པས་སྐྱོང་སའི་སློབ་ཕྲུག་གི་གཤིས་རྒྱུད་ཇི་ལྟར་རྩུབ་ཀྱང་ནམ་ཞིག་ཞི་འཇམ་དུལ་བར་གྱུར་ནས་མཛུབ་མོ་གར་སྟོན་ཤར་ལ་ངོས་འཛིན་གྱིས་དགེ་རྒན་གྱི་ལམ་སྟོན་ཇི་བྱས་དོན་ལྡན་དུ་གྱུར་པ་མ་ཟད་དགེ་རྒན་ལ་ཡིད་ཆེས་ཀྱང་དམིགས་བསལ་སླེབས་ངེས་ལགས། འཛིན་གྲྭའི་སློབ་ཕྲུག་རྣམས་ནི་ཁོར་ཡུག་འདྲ་མིན་ནས་འཚར་ལོངས་བྱུང་ཞིང་ཁམས་མོས་སྣ་ཚོགས་པ། སེམས་ཁམས་ཀྱི་གནས་སྟངས་ཐ་དད་པ། རྒྱབ་ལྗོངས་ཀྱི་ལོ་རྒྱུས་མི་གཅིག་པ་སོགས་ཀྱིས་ཁེངས་པའི་སྤྱི་ཚོགས་ཆུང་ཆུང་ཞིག་ཡིན་སྟབས། དེ་དག་སྟངས་འཛིན་བྱེད་སྟངས་ཀྱང་ཀུན་ལ་སྙོམས་པ་གཅིག་མཚུངས་ལྟ་བུ་མིན་པར་ནད་འདྲ་མིན་ལ་སྨན་གཅིག་གིས་མི་ཕན་པ་ལྟར། སྐབས་མཚམས་ཡུལ་གྱི་གནས་བབས་ལ་བལྟས་ནས་སྟངས་འཛིན་གནང་རྒྱུ་ནི་ཤིན་ཏུ་གལ་ཆེར་མཐོང་། དེ་ཡང་སློབ་ཕྲུག་ཚོའི་གནས་བབས་ཇི་བཞིན་རྟོགས་པ་ལ་དགེ་རྒན་དང་སློབ་ཕྲུག་དབར་མཐུན་མིན་གྱི་འབྲེལ་བ་བཟང་པོ་དང་བརྟན་པོ་ཞིག་ཚུགས་དགོས་རྒྱུ་ནི་མེད་དུ་མི་རུང་བའི་ཆ་རྐྱེན་དགོས་ངེས་ཅན་ཞིག་ཏུ་མཐོང་། ལྷག་པར་སློབ་ཕྲུག་ཚོའི་སེམས་ཁོངས་སུ་དགེ་རྒན་ལ་འཇིགས་སྣང་གིས་བརྩི་བཀུར་ཞུས་པ་ཙམ་མིན་པར་དགའ་ཞེན་དང་བརྩེ་ཞེན་གྱིས་བརྩི་བཀུར་སྐྱེད་སྲིང་ཐུབ་སླད་སློབ་དགེས་དུས་རྒྱུན་བཀའ་མོལ་དང་བྱ་སྤྱོད་བརྒྱུད་ནས་མིག་དཔེ་སྟོན་ཐབས་ངེས་པར་གནང་གལ། འཛིན་གྲྭའི་ནང་དུ་སློབ་ཕྲུག་རྣམས་ལ་དྲི་བ་འགོད་དུས་འཇིགས་སྣང་དང་ལན་འདེབས་བྱེད་སྐབས་ཞུམ་སེམས་མེད་པར་རང་དབང་གི་ཁོར་ཡུག་ཅིག་ངེས་པར་བསྐྲུན་དགོས། དེ་མིན་སློབ་ཕྲུག་གི་སེམས་སུ་དགེ་རྒན་གྱི་དྲི་བར་ལན་འདེབས་བྱེད་འདོད་ཡོད་པ་དང་། དྲི་བ་འགོད་འདོད་ཡོད་རུང་ལན་འདེབས་ནོར་བ་དང་དྲི་བའི་རང་བཞིན་སོགས་ལ་བལྟས་ནས་རང་ཉིད་དམངས་ཀྱི་མདུན་སར་དམའ་འབེབས་དང་ཁྱད་གསོད་ཀྱི་གནས་སུ་ལྷུངས་ཉེན་གྱི་འཇིགས་པས་ལན་འདེབས་མ་ཐུབ་པ་དང་དྲི་བ་བཀོད་མ་ཐུབ་པར་ལུས་ན། སློབ་ཕྲུག་གི་ནང་གི་ནུས་པ་ཕྱི་རུ་འདོན་སའི་སྡིངས་ཆ་བརླགས་པའི་རྐྱེན་གྱིས་ཤེས་ཡོན་ལ་དོ་དབྱིངས་ཇེ་ཞན་དུ་གྱུར་པ་ནི་འཛིན་གྲྭ་སྟངས་འཛིན་ཡག་པོ་མེད་པའི་མཚོན་རྟགས་ཤིག་ལགས། ལྷག་དོན་འཛིན་གྲྭར་སློབ་ཕྲུག་རྣམས་ཁ་ཁུ་སིམ་པོ་ཡོད་པ་ཙམ་གྱིས་འཛིན་གྲྭའི་སྟངས་འཛིན་ལེགས་པོ་ཡོད་པའི་ངོས་འཛིན་མི་ཐུབ། འཛིན་གྲྭ་ཞེས་པ་སློབ་ཕྲུག་ལ་སྒྲོ་འདོགས་གཅོད་སའི་ཁོར་ཡུག་བཟང་པོ་ཞིག་བསྐྲུན་པའི་གནས་ཁྱད་པར་ཅན་ཞིག་ཏུ་ངོས་འཛིན་བྱེད་དགོས་པས། དེར་ཕྲན་བུ་ནོར་འཁྲུལ་དང་། དྲི་བ་དྲིས་ལན་གྱི་སྐད་ཅོར་རམ་ཕན་ཚུན་གོ་བསྡུར་གྱི་སྐད་སྒྲ་ཡོད་ན་དོན་དམ་དུ་ཤེས་ཡོན་སྤྲོད་ལེན་བྱེད་སའི་གནས་ཤིག་ཏུ་ངོས་འཛིན་དང་འཛིན་གྲྭའི་སྟངས་འཛིན་ཡོད་པ་ཞིག་ཏུ་བརྩི་དགོས་སྙམ། དེས་ན་སློབ་ཕྲུག་རྣམས་ལ་དུས་ནམ་ཡང་རང་གི་རྣམ་རྟོག་ལས་འཁྲུངས་པའི་དྲི་བ་འགོད་རྒྱུ་དང་འགྲིགས་ནོར་གང་བྱུང་ཡང་ལན་འདེབས་བྱ་རྒྱུའི་རང་དབང་གི་ཁོར་ཡུག་ཅིག་བསྐྲུན་ཐུབ་ན་འཛིན་གྲྭ་སྟངས་འཛིན་ཡོད་པའི་མཚོན་རྟགས་སུ་མངོན། འཛིན་གྲྭའི་ནང་དུ་སློབ་ཕྲུག་ཕན་ཚུན་ཚིག་རྩུབ་དང་། དམའ་འབེབས། ཁྱད་གསོད། མཐོང་ཆུང་སོགས་ཀྱི་ཚིག་ངན་བེད་སྤྱོད་མི་ཆོག་པའི་ཚུལ་ཁྲིམས་བསྲུང་རྒྱུ་ཇི་ཙམ་གལ་ཆེར་འཛིན་པ་དེ་ལས་ལྡབ་ཀྱིས་དགེ་རྒན་ཚོས་ཚུལ་ཁྲིམས་བསྲུང་རྒྱུ་ཤིན་ཏུ་གལ་འགངས་ཆེ། དེ་མིན་སློབ་ཕྲུག་ཚོར་བྱེད་མི་ཆོག་པའི་ཁྲིམས་བསྡམས་ཀྱང་སློབ་དགེ་ཚོས་སློབ་ཕྲུག་དམངས་ཀྱི་མདུན་དུ་དེ་ལྟའི་ཚིག་ངན་བེད་སྤྱོད་བྱས་པ་ནི་སློབ་ཕྲུག་ཚོ་ཆེས་དམའ་འབེབས་ཀྱི་ཡུལ་མཐར་བསྐྱལ་བ་དང་མཚུངས་ཤིང་། སློབ་དགེ་རང་ཉིད་ཀྱི་ཆེ་མཐོང་ཡང་སློབ་ཕྲུག་གི་སེམས་ཁམས་ལས་ཆེས་དམའ་སར་ཟགས་ཤིང་ཡིད་ཆེས་ཀྱང་བརླགས་ངེས། དེས་ན་འཛིན་གྲྭར་བྱེད་མི་ཆོག་པའི་བྱ་སྤྱོད་ནི་དགེ་སློབ་ཐུན་མོང་གིས་བསྲུང་དགོས་པ་ལས་སློབ་དགེར་འབྲེལ་མེད་དོན་གཞན་དུ་བསམས་པ་ནི་ཆེས་མ་འོས་པའི་སྟངས་འཛིན་བྱེདསྟངས་ཤིག་ཡིན་པ་ནི་བདེན་པའི་གནས་ཚུལ་ཞིག་ལགས། འཛིན་གྲྭ་ཞེས་པ་གོང་མས་གཏན་འབེབས་བྱས་པའི་དེབ་ཀྱི་སློབ་སྦྱོང་བསླབ་རྒྱུ་ཙམ་མིན་པར་སློབ་ཕྲུག་རྣམས་ཀྱི་མ་འོངས་པའི་མི་ཚེར་ཕན་ཕྱིར་མ་རུངས་པའི་སེམས་འཆོས་སའི་གནས་ཤིག་ཀྱང་ཆགས་ཀྱི་ཡོད་ན། འཛིན་གྲྭའི་སློབ་ཕྲུག་ཁྲོད་ནས་རྩིང་པོར་སྤྱོད་པ་རྣམས་ལ་ཐད་ཀར་ཁོང་ཁྲོའི་རྣམ་འགྱུར་གྱིས་བཀའ་བཀྱོན་གཏོང་བ་ནི་ཀུན་སློང་བཟང་ཡང་མེའི་སྟེང་དུ་ས་སྣུམ་བླུགས་པའི་བྱ་བ་དང་མཚུངས། དེ་ལས་ལྡོག་སྟེ་འཛིན་གྲྭ་གྲོལ་རྗེས་ཐུག་འཕྲད་དགོས་པའི་ལམ་སྟོན་ཞུས་ནས་སྒེར་དང་སྒེར་གཏུགས་ཀྱིས་བཀའ་མོལ་གནང་རྒྱུ་ནི་ཆེས་ཕན་རླབས་ཆེ་བ་ཡོད་པ་ནི་མངོན་སུམ་མཐོང་ཆོས་སུ་གྲུབ། དེ་མིན་སློབ་ཕྲུག་དམངས་ཀྱི་མདུན་དུ་ཁོང་ཁྲོས་བཀའ་བཀྱོན་གཏོང་བ་ནི་སློབ་ཕྲུག་གི་སེམས་ཚོར་ལ་གནོད་དེ་དགེ་སློབ་ཀྱི་འདུ་ཤེས་བརླགས་ནས་འཛིན་གྲྭའི་སློབ་དམངས་ཀྱི་མདུན་དུ་སློབ་ཕྲུག་གིས་དགེ་རྒན་ལ་ཁ་ལན་བསློགས་ཏེ་གཉིས་ཀའི་ཁོང་ཁྲོའི་མེ་ཤུགས་ཆེ་ཆེར་བསྐྱེད་དེ་དཀའ་ངལ་ཆེན་པོར་གྱུར་པའང་ཡོད། དེས་ན་དཀའ་ངལ་ཅན་གྱི་སློབ་ཕྲུག་ཟུར་དུ་ཆེད་བཀུག་གིས་སློབ་གསོ་ལམ་སྟོན་ཐུབ་ན་དེས་དགེ་ཕན་ཆེ་བར་ཐོན། འཛིན་གྲྭར་སྟངས་འཛིན་བྱེད་སྐབས་ནང་སྦྱོང་དུས་ཐོག་མི་གནང་མཁན་དང་། སློབ་ཁྲིད་བྱ་བར་འགོག་རྐྱེན་བཟོ་བ། འཛིན་གྲོགས་ལྷན་དུ་འཆམ་མཐུན་མེད་པ། སློབ་དགེའི་ཞལ་ལ་མི་ཉན་མཁན་སོགས་ཀྱི་སློབ་ཕྲུག་གཅུན་སྐབས་སློབ་དགེ་རྣམ་པས་རང་གི་འདོད་པ་གཙོ་བོར་བཟུང་ནས་འཕྲལ་མར་སློབ་ཕྲུག་དོ་བདག་ལ་ཉེས་ཆད་དགལ་རྒྱུའི་ཚབ་ཏུ་སློབ་ཕྲུག་དེའི་རྒྱབ་ལྗོངས་ཀྱི་ལོ་རྒྱུས་སྔོག་འདོན་དང་སློབ་སྦྱོང་གནང་རྒྱུ་གལ་ཆེ། དེ་མིན་སྒྲིག་འགལ་སློབ་ཕྲུག་དེར་ནང་དུ་ཕ་མའི་བྱམས་བརྩེ་ཚུལ་མཐུན་མ་ཐོབ་པ་དང་། ཕ་མ་ཡ་བྲལ། ཕ་མས་ཆང་རག་ཚད་མེད་སྤྱད་དེ་ཕྲུ་གུར་ཉེས་རྡུང་ཤ་སྟག་བཏང་ནས་སེམས་ཁམས་སོགས་ལ་དཀའ་ངལ་ཅན་གྱི་སློབ་ཕྲུག་ཀྱང་གྲངས་མི་ཉུང་བ་ཞིག་ཡོད་སྟབས་རྒྱབ་ལྗོངས་ཀྱི་གནས་ཚུལ་དེ་དག་མཁྱེན་རྟོགས་ཡོད་ཚེ་སློབ་ཕྲུག་དེར་གོ་སྐོན་སློབ་གསོ་བྱེད་སྟངས་མི་འདྲ་བ་ཞིག་བློ་ངོར་འཆར་ངེས། མཐའ་དོན་དགེ་རྒན་དང་སློབ་ཕྲུག་དབར་འཛིན་གྲྭའི་ཚོགས་དུས་ཙམ་ལས་གཞན་དུ་ཐུག་འཕྲད་ཀྱི་གོ་སྐབས་དཀའ་བས་སློབ་དགེ་ཚོས་འཛིན་གྲྭ་སྟངས་འཛིན་གནང་སྐབས་ངེས་པར་ཡིད་བཅངས་དགོས་པ་ནི། སློབ་གྲྭར་སློབ་ཕྲུག་དུ་མའི་དཀྱིལ་ནས་ཕ་མས་གཅེས་ལངས་སུ་བཏང་བ་དང་དགོས་ངེས་ཀྱི་ཕ་མའི་བྱམས་བརྩེ་མ་ཐོབ་པའི་སློབ་ཕྲུག་རྣམས་དང་སློབ་དགེའི་དབར་འཁོན་ཉེན་ཆེ་བ་ཡོད་སྟབས། དུས་རབས་ཉེར་གཅིག་གི་སློབ་ཕྲུག་རྣམས་ལ་དྲག་པོའི་ཐོག་ནས་ཉེས་རྡུང་བཀལ་ཏེ་བཅུན་ཐབས་བྲལ་བས་དུས་ནམ་ཡང་ཞི་བས་འདུལ་ཐབས་གནང་རྒྱུ་ནི་སྐབས་བབ་དགེ་རྒན་གྱི་འོས་འགན་ཆེ་ཤོས་ཤིག་ཏུ་མཐོང་། མཐའ་དོན་སློབ་ཕྲུག་དང་དགེ་རྒན་དབར་མཐུན་པའི་འབྲེལ་བ་སྔར་ལྷག་བརྟས་ཏེ་ད་ཡོད་སློབ་ཕྲུག་རྣམས་ཀྱིས་༸གོང་ས་མཆོག་གི་ཐུགས་དགོངས་དང་ཕ་མའི་རེ་བ་ཇི་བཞིན་ཤེས་ཡོན་སློབ་སྦྱོང་ལ་འབད་པ་ལྷུར་ལེན་གྱིས་གྲུབ་འབྲས་ཡར་རྒྱས་ཕྱོགས་སུ་གོམ་སྟབས་བསྒྱུར་ཏེ་གང་མྱུར་གཞིས་བྱེས་བོད་མི་མཉམ་འཛོམས་ཐུབ་པའི་ཉིན་བཟང་སྐྲུན་མཁན་གྱི་བོད་མི་ཚད་ལྡན་ཤ་སྟག་ཐོན་པར་གྱུར་ཅིག། […]