བསྟན་འཛིན་རིགས་སྲས་བསམ་མཁར། འཛིན་གྲྭ་དྲུག་པ།
མེས་དབོན་གཙུག་ལག་དཔེ་སྟོན་སློབ་གྲྭ།
གུས་མོས་ཉལ་ཁང་གི་སྒེའུ་ཁུང་གི་ཕྱི་ལ་ལྟ་སྐབས། དེ་རིང་ནི་རྒྱུན་གཏན་དང་མི་འདྲ་བར་གནམ་སྔོ་ཞིང་དྭངས་ལ་ཉི་མ་སེར་ཐིང་ངེར་ཤར་འདུག། གནམ་གཤིས་དེར་བལྟས་བ་ཙམ་གྱིས་དེ་རིང་གི་ཉིན་མོ་ནི་གལ་ཆེན་ཞིག་ཡིན་པ་ཚོར་ཐུབ། གློ་བུར་དུ་ཁ་སྔོན་ཨ་མ་ལགས་ཀྱིས་དེ་རིང་༸གོང་ས་མཆོག་གི་འཁྲུངས་སྐར་རེད་ཅེས་གསུངས་པ་དྲན་ལྷང་ལྷང་བྱས་བྱུང་། དེའི་རྗེས་གུས་མོས་མགྱོགས་མྱུར་ངང་གཙང་འཁྲུས་བྱས་ཏེ་རང་གི་བོད་ཆས་ཕྱུ་པ་སྙིང་རྗེ་མོ་དེ་གྱོན་པ་ཡིན། ཡུན་ཙམ་སོང་རྗེས་ནང་མི་ཚང་མ་གྲ་སྒྲིག་ཚར་མ་ཐག་ཏུ་གཙུག་ལག་ཁང་དུ་ཐོན་པ་ཡིན། ལམ་ཟུར་དུ་བོད་པ་མང་དག་ཅིག་རང་གི་ནང་མི་དང་ལྷན་དུ་གཙུག་ལག་ཁང་ཕྱོགས་སུ་འགྲོ་བཞིན་པ་དང་། སྤོ་བོ་དང་རྨོ་བོ་འགའ་ཤས་འཛུམ་མུལ་མུལ་ངང་མ་ཎི་འདོན་བཞིན་པ། དེ་བཞིན་གྲྭ་པ་དང་ཨ་ནེ་ཚོ་ངག་འཇམ་ཞི་དུལ་ངང་ཕེབས་ལམ་དུ་བསྐྱོད་བཞིན་པ་བཅས་གུས་མོའི་མིག་ཆུང་གཉིས་ཀྱིས་གསལ་ཐིང་ངེར་མཐོང་བྱུང་། དགོན་པའི་ཉེ་འགྲམ་དུ་འབྱོར་སྐབས་སྤྲང་པོ་འགའ་ཤས་ལ་རྐང་ལག་གཅིག་ལས་མེད་པ་དང་། འགའ་ཤས་ནི་མིག་ལོང་བ་ཅན། འགའ་ཤས་ལུས་པོ་ཐང་པོ་ཡིན་ཡང་དངུལ་མེད་པས་ལམ་ཟུར་དུ་སྒོར་མོ་སློང་བཞིན་པ་མཐོང་དུས་རང་དབང་མེད་པར་མིག་ནང་མཆི་མ་འཁོར་བྱུང་།
དེ་རྗེས་དགོན་པའི་རྒྱལ་སྒོའི་ནང་འཛུལ་མ་ཐག་ཏུ་སེམས་ནང་གི་དཀའ་ངལ་དང་མིག་ནང་གི་མཆི་མ་དེ་དག་རླུང་ལ་སྐུར་བ་ལྟར་མེད་པ་ཆགས་སོང་། སྐས་འཛེག་སྟེང་འཛེགས་རྗེས་གཙུག་ལག་ཁང་གི་ནང་དུ་འཛུལ་དུས། མི་སྟོང་ཕྲག་མང་པོ་༸གོང་ས་མཆོག་གི་འཁྲུངས་སྐར་ལ་འཛོམས་ཡོད་པ་མ་ཟད། ད་དུང་ཁོར་ཡུག་དེ་ཡང་མཛེས་སྡུག་ལྡན་པ་ཞིག་ཏུ་གྲ་སྒྲིག་གནང་འདུག་པ་མཐོང་བྱུང་། དགོན་པའི་ནང་གི་གྱང་དང་ཀ་བ་སོགས་ལ་མཛེས་སྡུག་ལྡན་པའི་མེ་ཏོག་སྣ་ཚོགས་ཀྱིས་བརྒྱན་ཡོད་པ་དང་། སྦྲང་ཆར་འབབ་དུས་ལྷ་ཡུལ་ནས་ལྷ་རྣམས་ཀྱིས་དགའ་སྤྲོའི་མེ་ཏོག་གི་ཆར་པ་སྤབས་པ་ལྟར་སེམས་ནང་དགའ་སྤྲོ་ཤུགས་ཆེ་ཚོར་བྱུང་། མི་ཚོགས་ཧ་ཅང་མང་བས་བསྡད་ས་མ་རག་ཀྱང་༸གོང་ས་མཆོག་གི་གསུང་སྐད་ཐོས་པ་ཙམ་གྱིས་སེམས་དགའ་སྤྲོས་ཁེངས་བྱུང་།
འཛམ་གླིང་ནང་གི་ས་ཆ་འདྲ་མིན་སྣ་ཚོགས་ནས་ཕེབས་པའི་གཞས་པ་དང་། གཞས་མ། འཁྲབ་སྟོན་པ་རྣམས་ཀྱིས་གཞས་སྣ་འཁྲབ་སྟོན་སྣ་ཚོགས་འགྲེམས་སྤེལ་གནང་སོང་། ཁོ་ཚོའི་ཕུན་སུམ་ཚོགས་པའི་སྒྱུ་རྩལ་དེ་ཚོ་མཐོང་དུས་མི་དམངས་ཚང་མས་སྤྲོ་སྣང་ཆེན་པོའི་ངང་ལག་པ་ཤུགས་ཆེ་བརྡབས་པ་མ་ཟད་། ཁོ་ཚོའི་གྱོན་ཆས་དང་འཁྲབ་སྟངས་དམིགས་བསལ་དེ་ཚོ་ཧང་སང་ཡག་གི་ཡག་པོ་ཡོད་པས་བལྟས་བ་ཙམ་གྱིས་སེམས་པ་ཤོར་འོས་པ་ཞིག་རེད་འདུག མཐར་འཁྲབ་སྟོན་ཚང་མ་མཇུག་བསྒྲིལ་རྗེས་སོ་སོའི་ཁྱིམ་ལ་ལོག་དགོས་པའི་དུས་ལ་བབ་སྐབས་སེམས་ནང་སྐྱིད་སྣང་ཞིག་ཤར་བྱུང་། གང་ཡིན་ཞུས་ན་༸གོང་ས་མཆོག་གི་འཁྲུངས་སྐར་ཉིན་ཧ་ཅང་སྐྱིད་པོ་བྱུང་བས་ཡིན། མཐའ་བསྡོམས་སུ་༸གོང་ས་མཆོག་སྐུ་ཚེ་ཁྲི་ལོར་བརྟན་པའི་སྨོན་འདུན་དང་གུས་མོས་དུས་རྟག་ཏུ་ཁོང་གི་བཀའ་བཞིན་བསྒྲུབ་རྒྱུའི་དམ་བཅའ་བཞག་གི་ཡིན།
ད་བར་དཔྱད་མཆན་མེད།