བསྟན་འཛིན་དཔལ་མོ། འཛིན་གྲྭ་བརྒྱད་པ།གུ་རུ་པུ་ར་སཾ་བྷོ་ཊ་ཉིན་སློབ། ༸སྐྱབས་མགོན་བསྟན་འཛིན་རྒྱ་མཚོ།།འགྲོ་བ་ཡོངས་ཀྱི་ལྷ་རྒྱལ།།འཛམ་གླིང་ཞི་བདེའི་དེད་དཔོན།།བོད་མི་ཡོངས་ཀྱི་མགོན་སྐྱབས།། ད་ལོ་ནི་གོ་སྟོན་བྱམས་བརྩེའི་ལོ་ཞེས་བོད་མི་སྤྱི་ཚོགས་ཡོངས་དང་འཛམ་གླིང་ས་ཕྱོགས་གང་སར་སྲུང་བརྩི་བྱེད་བཞིན་ཡོད། ང་ཚོས་གོ་སྟོན་ག་རེ་བྱས་ནས་སྲུང་བརྩི་བྱེད་ཀྱི་ཡོད་མིན་དང་། གོ་སྟོན་ཟེར་ན་ཅི་ཞིག་ལ་ཟེར་མིན་ཤེས་རྒྱུ་ནི་ཧ་ཅང་གི་གལ་ཆེན་པོ་རེད། གོ་སྟོན་ནི་ང་ཚོའི་རྩ་བའི་བླ་མ་སྤྱི་ནོར་༸གོང་ས་༸སྐྱབས་མགོན་ཆེན་པོ་བསྟན་འཛིན་རྒྱ་མཚོ་མཆོག་དགུང་ལོ་་དགུ་བཅུ་ལ་ཕེབས་པའི་དགའ་བསུའི་རྟེན་འབྲེལ་ཆེད་ཡིན་པ་མ་ཟད། ཁོང་གིས་ད་བར་བོད་རྒྱ་ཆེ་མི་མང་དང་འཛམ་གླིང་མི་མང་གི་དོན་དུ་སྐུ་ངལ་བསྐྱོན་པའི་བཀའ་དྲིན་རྗེས་དྲན་དང་བཀའ་དྲིན་གསོ་བའི་ཆེད་དུ་ཡིན། གོ་སྟོན་བསྲུང་བརྩི་བྱེད་དགོས་དོན་གཞན་ཞིག་ནི་༸གོང་ས་མཆོག་གི་ང་ཚོ་འགྲོ་བ་མི་ཡོངས་ལ་བྱམས་བརྩེ། སྙིང་རྗེ། བཟོད་སྒོམ། མཆོག་ཤེས། འཚེ་མའི་ཞི་བའི་ལམ་བཅས་མིའི་རྒྱུད་ཀྱི་བཟང་སྤྱོད་གོང་མཐོར་སྤེལ་ཐབས་ཀྱི་རྩ་ཆེ་བའི་ལམ་་སྟོན་མང་པོ་གནང་ཡོད། ད་ལོ་བྱམས་བརྩེའི་ལོ་ལ་ང་ཚོས་༸གོང་ས་མཆོག་གིས་ལམ་སྟོན་གནང་བ་དེ་ཚང་མ་ལག་ལེན་བསྟར་རྒྱུ་དང་། འཛམ་གླིང་ཡོངས་ལ་སྤེལ་དགོས། གང་ཡིན་ཟེར་ན། ཁོང་གི་ཐུགས་ལ་ང་ཚོའི་འཇིག་རྟེན་ཁམས་འདི་ཞི་བདེ་དང་དགའ་འཚོར་གྱི་སྣང་བ་བསྐྲུན་ཐུབ་པའི་རེ་བ་ཡོད། ཁོང་གི་ཐུགས་ཀྱི་རེ་བ་རྣམས་ང་ཚོས་སྒྲུབ་ཐུབ་ཐབས་བྱེད་རྒྱུ་ནི་ང་ཚོའི་ལས་འགན་རེད་བསམ་གྱི་འདུག ༸གོང་ས་མཆོག་ནི་དམིགས་གསལ་ང་ཚོ་ཤ་ཁྲག་གཅིག་པའི་བོད་རིགས་སྤུན་ཟླ་ཀུན་ལ་བཀའ་འདྲིན་ཆེ་པོ་ཡིན། ད་ལྟ་ང་ཚོར་ལྟོགས་ན་ཟས། འཁྱགས་ན་གྱོན་རྒྱུའི་གྱོན་ཆས། འཚོ་སྡོད་བྱེད་སའི་ས་ཆ་གཞིས་ཆགས་གནང་ཡོད་པ་འདི་༸གོང་ས་མཆོག་གི་བཀའ་དྲིན་རེད། རང་ཉིད་སློབ་ཕྲུག་ཞིག་ཡིན་པའི་ཆ་ནས་ཤེས་ཡོན་སློབ་སྦྱོང་སྦྱང་རྒྱུ་སྐལ་པ་བཟང་པོ་འདི་ཚོ་ཆ་ཚང་ཁོང་གི་བཀའ་དྲིན་ཡིན་པ་དང་ང་ཚོས་ནམ་ཡང་མ་བརྗེད་པར་སེམས་ལ་བཞག་དགོས། ས་ཕྱོགས་གང་སར་གོ་སྟོན་སྲུང་བརྩི་ཞུ་ཡི་ཡོད་པ་བཞིན་ཕྱི་ལོ་ ༢༠༢༥ ཟླ་ ༧ ཚེས་ ༡༩ ཉིན། ང་ཚོ་ལྷོ་ཕྱོགས་གཞིས་ཆགས་ཧུན་སུར་དང་། སྦེལ་ཀོབ་པི། ཀོ་ལེ་གྷལ་། མཉམ་རུབ་ཀྱིས་མའེ་སོར་གྲོང་ཁྱེར་ཀ་ལ་མན་དིར་ལ་བོད་ཀྱི་ཉིན་མོར་དཀྱིལ་འཁོར་དང་། གཞས་སྣ་འཁྲབ་སྟོན། ༸གོང་ས་མཆོག་གི་མཛད་རྣམ་འགྲེམས་སྟོན་སོགས་གོ་སྟོན་སྲུང་བརྩི་གྲ་རྒྱས་པོ་ཞུས་སོང་། དེ་བཞིན་དུ་ང་ཚོའི་གཞིས་ཆགས་ཧུན་སུར་རབ་རྒྱས་གླིང་ཚོགས་ཁང་ནང་ལ་འདི་ལོའི་ཟླ་ ༩ ཚེས་ ༡༥ ཉིན་གོ་སྟོན་སྲུང་བརྩི་གྲ་རྒྱས་པོ་ཞིག་བྱས་པ་རེད། ཉིན་དེར་བོད་ཀྱི་ཉིན་མོ་ཞེས་བཏགས་ཏེ་བོད་ཀྱི་ཆས་གོས་འགྲན་བསྡུར། བོད་ཆས་གོས་གྱོན་སྟངས། བོད་ཀྱི་ཀྱི་ཟས་རིགས་རྩམ་པས་སྤགས་བརྫིས་སྟངས། དེ་བཞིན་ཐུད། འབྲས་ཆང་། ཕྱུ་ར། བག་ཚ་མར་ཁུ་སོགས་འགྲེམས་སྟོན་གནང་སོང་། བོད་ཟས་འདྲ་མིན་སྣ་ཚོགས་ང་ཚོར་འབྲོ་བ་མྱོང་བཅུག་པ་དང་དེའི་ཚོའི་འབྱུང་རིམ་སོགས་འགྲེལ་བཤད་བརྒྱབ་སོང། དེ་སྐབས་སྤོ་ལགས་ཞིག་གིས་དམིགས་བསལ་ང་ཚོ་གཞོན་སྐྱེས་ལ་རྩམ་པས་སྤགས་བརྫིས་སྟངས་བསླབས་སོང། དེ་ནས་བཟུང་སྤགས་བཟའ་སྟངས་ཤེས་སོང་། དེ་བཞིན་བོད་ཀྱི་སྲོལ་རྒྱུན་གྱི་་ཞབས་བྲོ། གནའ་བོའི་བོད་ཀྱི་རྩེད་རིགས་སོགས་ཀྱི་ལས་གཞི་མང་པོ་སྤེལ་སོང་། དགོང་མོ་གྲོང་སྡེ་སོ་སོས་བོད་ཀྱི་ལུང་ཚན་ཀོང་པོའི་ཆས་གོས། དབུས་གཙང་གི་ཆས་གོས། […]