བསྟན་འཛིན་པདྨ། འཛིན་གྲྭ་བཞི་པ།སཾ་བྷོ་ཊ་གྷོ་ལ་ཐ་ལ་བོད་སློབ།    འཛམ་གླིང་ནང་ལ་སྙན་གྲགས་ཅན་གྱི་མི་སྣ་མང་པོ་ཡོད། ཡིན་ཡང་ང་ཡི་དགའ་བའི་སྙན་གྲགས་ཅན་ནི་ང་ཡི་བླ་མ་༸གོང་ས་མཆོག་ཡིན། ཁོང་ནི་བོད་ལྗོངས་ཁ་བའི་ཡུལ་དུ་ཨ་མདོ་སྟག་འཚེར་ཡུལ་དུ་ཡབ་ཆོས་སྐྱོང་ཚེ་རིང་དང་ཡུམ་བདེ་སྐྱིད་ཚེ་རིང་གཉིས་ཀྱི་སྲས་སུ་སྐུ་འཁྲུངས། ཁོང་ནི་སྤྱི་ལོ་ ༡༩༣༥ ཟླ་བ་ ༧ ཚེས་ ༦ ཉིན་བཟང་པོར་འཁྲུངས། ད་ལོ་ནི་ཁོང་དགུང་གྲངས་ ༩༠ ལ་ཕེབས་ཀྱི་ཡོད་པས་གོ་སྟོན་གྱི་རྟེན་འབྲེལ་ཞེས་སྲུང་བརྩི་གནང་གི་ཡོད་པ་རེད། ཁོང་དགུང་ལོ་ཆུང་དུས་ན་ཆོས་སྲིད་གཉིས་ཀྱི་ཐུགས་འགན་བཞེས་པ་རེད། ཁོང་ནི་ང་ཚོ་བོད་མི་རྣམས་ཀྱི་ལྟ་བའི་མིག་དང་ཁོག་པའི་སྙིང་ལྟ་བུ་ཡིན། ཁོང་ནི་ང་ཚོ་བོད་མི་རྣམས་ལ་ཤིན་ཏུ་ནས་བཀའ་དྲིན་ཆེ་བའི་སྐྱབས་མགོན་ཡིན། ཁོང་ནི་དུས་རྒྱུན་དུ་ནས་འགྲོ་བ་རིགས་དྲུག་སེམས་ཅན་ཐམས་ཅད་ལ་བྱམས་དང་བརྩེ་བའི་ངང་ནས་ལམ་སྟོན་དང་བཀའ་ཆོས་བཟང་པོ་གནང་གི་ཡོད། ད་ལོ་དམིགས་བསལ་གྱི་གུས་མོ་ང་རང་ངོས་ནས་གོ་སྟོན་རྟེན་འབྲེལ་དང་སྟབས་བསྟུན་ནས་༸གོང་ས་མཆོག་སྐུ་ཚེ་ཡུན་རིང་བརྟན་པའི་ཕྱིར། ཉིན་གྲངས་ལྔ་བཅུའི་གུང་སེང་སྐབས་དེབ་གྲངས་དགུ་བཅུ་ཀློག་རྒྱུའི་དམ་བཅའ་བཞག་པ་ཡིན། ང་རས་དུས་ཚོད་དང་མཉམ་དུ་དཔེ་ཀློག་དགུ་བཅུ་ལྷག་ལྷོད་ལྷོད་ངང་ཀློག་ཐུབ་པ་བྱུང་། དེ་ནི་སྐལ་བཟང་ཞིག་དུ་ངོས་འཛིན་བྱེད་བཞིན་ཡོད་དོ།། ༸གོང་ས་མཆོག་གི་འཁྲུངས་སྐར་ལ་བཀྲ་ཤིས་བདེ་ལེགས། ཁྱེད་སྐུ་ཚེ་ཡུན་རིང་བརྟན་པའི་སྨོན་ལམ་ཞུ།

རཏྣ་རྒྱལ་མཚན་ལྕང་ར། འཛིན་གྲྭ་བཞི་པ།སཾ་བྷོ་ཊ་ཀེ་ལཱཤ་པུ་ར་ཉིན་སློབ།    ལུང་པ་ཚང་མ་ལ་དབུ་ཁྲིད་ཡོད། དབུ་ཁྲིད་ཁ་ཤས་ནི་སློབ་སྦྱོང་ཧ་ཅང་པོ་ཡག་པོ་ཡོད་པ་དང་ཀུན་སྤྱོད་ཡག་པོ་མེད་པ་ཡོད། དབུ་ཁྲིད་ཁ་ཤས་ནི་སློབ་སྦྱོང་དང་ཀུན་སྤྱོད་གཉིས་ཀ་ཡག་པོ་ཡོད། དབུ་ཁྲིད་ལ་རིགས་སྣ་ཚོགས་ཡོད། ང་ཚོ་བོད་མི་རྣམས་ནི་བསོད་ནམས་ཆེན་པོ་ཡིན། ང་ཚོ་ལ་སློབ་སྦྱོང་དང་ཀུན་སྤྱོད་གཉིས་ཀ་ལྡན་པའི་དབུ་ཁྲིད་ཡོད། ང་ཚོའི་དབུ་ཁྲིད་༸གོང་ས་མཆོག་ནི། སངས་རྒྱས་བྱམས་སེམས་ཅན་ཞིག་ཡིན། ཁོང་གིས་རྒྱལ་ཁབ་གཞན་སུ་ལ་ཡང་འཚེ་བ་བྱེད་ཀྱི་མེད། ཁོང་ནི་གཞན་ལ་བདེ་བ་འདོད་མཁན་གྱི་དབུ་ཁྲིད་ཞིག་ཡིན། ཁོང་གིས་གཞན་ལ་ཕན་པའི་ཕྱག་ལས་ཧ་ཅང་མང་པོ་གནང་གི་ཡོད། ༸གོང་ས་མཆོག་ནི་འཛམ་གླིང་ནང་གི་དབུ་ཁྲིད་ཡག་ཤོས་དེ་ཡིན།    དང་པོ་དེ་ལ། ༸གོང་ས་མཆོ་གིས་བོད་མི་རྣམས་ལ་ལམ་སྟོན་དང་རོགས་པ་མང་པོ་གནང་ཡོད། ང་ཚོ་བོད་མི་རྣམས་ཀྱིས་ལས་ངན་པ་མ་བསགས་པའི་ཆེད་དུ་བཀའ་སློབ་མང་པོ་གནང་གི་ཡོད། ཁོང་གིས་བོད་མི་ཞིག་ཡིན་པའི་ཆ་ནས་འཛམ་གླིང་ནང་ཡ་རབས་ཀྱི་མིག་དཔེ་བཟང་པོ་ཞིག་སྟོན་དགོས་པ་ཡང་ཡང་གསུང་གནང་གི་ཡོད། དཔེར་ན། མི་གཞན་ལ་མཐོང་ཆུང་མ་བྱེད་རྒྱུ། རང་ལས་སྐྱོ་བ་རྣམས་ལ་རོགས་པ་བྱེད་རྒྱུ། སྤྱོད་པ་བཟང་པོ་རིགས་བྱས་ན། ང་ཚོ་འཛམ་གླིང་འདིའི་ནང་ལ་། མིག་དཔེ་ཡག་པོ་ཞིག་ཆགས་ཀྱི་རེད་གསུང་གི་ཡོད། ཁོང་གིས་བོད་མི་ཚོ་ལ་དམིགས་བསལ་གྱིས་དཀའ་ལས་མང་ཙམ་རྒྱག་དགོས་པ་གསུང་གནང་གི་ཡོད། གང་ཡིན་ཟེར་ན། ང་ཚོ་སོ་སོའི་ལུང་པ་སྟོན་རྒྱུ་མེད་པས། རང་བཙན་ཡོད་མཁན་གྱི་དཀའ་ལས་བརྒྱབ་པ་ལས་ལྡབ་བཞི་མང་བ་རྒྱག་དགོས་གསུང་གནང་གི་ཡོད། དེ་འདྲ་སོང་ཙང་། ང་ཚོ་བོད་མི་རྣམས་ཀྱིས་སེམས་ཤུགས་མ་ཆག་ནས་དཀའ་ལས་མང་པོ་རྒྱག་རྒྱུ་གལ་ཆེན་པོ་ཆགས་ཡོད། ད་དུང་ང་ཚོ་སློབ་ཕྲུག་རྣམས་ཀྱིས་རང་ལ་དགོས་པའི་སློབ་སྦྱོང་བྱེད་སྐབས། ལེ་ལོ་དང་རྣམ་གཡེང་མ་བྱས་པར། སློབ་སྦྱོང་ལ་དུས་ཚོད་མང་ཙམ་གཏོང་དགོས་རེད། ང་ཚོ་རྒན་གཞོན་ཚང་མས་༸གོང་ས་མཆོག་གི་བཀའ་རྣམས་ཡག་པོ་ཉན་ནས་ཁོང་གིས་གསུངས་པའི་ལམ་དུ་སོང་ན། ཉིན་མ་གཅིག་ང་ཚོ་བོད་ལ་ལོག་ཐུབ་པའི་རེ་བ་ཆེན་པོ་ཡོད།    ༸གོང་ས་མཆོག་གིས་འཛམ་གླིང་ནང་ཡོད་པའི་མི་ཚང་མས་ཁས་ལེན་བྱེད་ཐུབ་པའི་ཆོས་ལུགས་ལ་མ་བརྟེན་པའི་བཟང་སྤྱོད་ཅེས་པ་བཟོས་གནང་ཡོད། ཁོང་གིས་བོད་མི་ཙམ་མ་ཡིན་པ། འཛམ་གླིང་ཡོངས་ཀྱི་མི་རྣམས་ཡ་རབས་བཟང་སྤྱོད་ཞིག་འགྱུར་རྒྱུའི་རེ་བ་གནང་གི་ཡོད། འགྲོ་བ་མི་དང་དུད་འགྲོ་ཚང་མ་ལ་བདེ་སྐྱིད་དགོས་པ་དེ་གཅིག་པ་ཡིན། ང་ཚོས་སྡུག་བསྔལ་གྱི་རྒྱུ་རྣམས་སྤོང་ཐུབ་ཀྱི་མེད། དེ་འདྲ་སོང་ཙང་། ༸གོང་ས་མཆོག་གིས་ང་ཚོ་ལ་དགོས་པའི་བདེ་སྐྱིད་དེ་ག་འདྲ་བྱས་ནས་འཚོལ་དགོས་པ་དེབ་དེའི་ནང་གསུངས་ཡོད། དེང་སང་ཕྱི་རྒྱལ་མི་དང་ཆོས་ལ་དད་པ་མེད་མཁན་ཚོས་སློབ་ཚན་དེ་ལ་དགའ་པོ་བྱེད་ཀྱི་ཡོད། ང་ཚོ་སློབ་གྲྭའི་ནང་དུ་སློབ་ཚན་དེ་སྦྱོང་གི་ཡོད། ང་ཚོས་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སློབ་ཚན་ནང་ལ། རྗེས་སུ་ཡི་རངས། མི་གཞན་གྱི་ལས་ཀ་ཡག་པོ་བྱེད་པ་ལ་རང་གི་སེམས་ལ་དགའ་བ་སྐྱེས་པའི་ཐོག་ནས་ང་ཡང་མི་དེ་ནང་བཞིན་གྱི་ལས་ཀ་ཡག་པོ་བྱེད་ཀྱི་ཡིན་ཞེས་དམ་བཅའ་བཞག་ན་ང་ཚོ་ཡང་མི་ཡག་པོ་ཞིག་ཆགས་རྒྱུ་རེད། ང་ཚོ་ཚང་མས་དེ་འདྲ་བྱས་ན། ང་ཚོའི་འཛམ་གླིང་འདིའི་ནང་ལ་ཡོད་པའི་མི་ཚང་མར་ཞི་བདེ་ཐོབ་ཀྱི་རེད།    ང་ཚོའི་རྒན་ལགས་ཀྱིས་སློབ་ཁྲིད་དེ་གནང་བའིརྗེས་སུ།ང་ཚོའི་འཛིན་གྲོགས་རྣམས་སྔོན་ལས་སེམས་དེ་བཟང་དུ་ཕྱིན་པ་དང་འཛིན་གྲོགས་ཚང་མ་འཆམ་པོའི་ངང་སྡོད་ཐུབ་ཀྱི་ཡོད། ད་དུང་། ང་ཚོས་དྲན་ཤེས་ཐོག་སྦྱོང་བརྡར་མང་པོ་བྱས་པ་དྲན་གྱི་འདུག ང་ཚོའི་འཛིན་གྲྭའི་སློབ་གྲོགས་མང་པོ་ཞིག་གིས་ལེ་ལོ་ཉུང་དུ་ཕྱིན་ནས་ནང་ལས་དུས་ཐོག་བྲིས་པ་བྱུང་ཡོད། ང་ཚོའི་དགེ་ལགས་ཀྱང་ཧ་ཅང་དགའ་པོ་བྱུང་འདུག ང་ཚོ་སེམས་མྱོང་གི་ཐོག་སློབ་སྦྱོང་བྱས་པ་ཡིན། […]

བསྟན་འཛིན་རབ་དཀར། འཛིན་གྲྭ་ལྔ་པ།བོན་གཞིས་སཾ་བྷོ་ཊ་དྷོ་ལན་ཇི་ཉིན་སློབ།    ངས་བོད་མིའི་མགོན་སྐྱབས་སྤྱི་ནོར་༧གོང་ས་རྒྱལ་བ་རིན་པོ་ཆེ་མཆོག་ཞལ་མངོན་སུམ་ལ་མཇལ་མྱོང་མེད་ཀྱང་ཁོང་གི་མཛད་རྣམ་ཤེས་ཀྱི་ཡོད། ༸གོང་ས་མཆོག་ནི་བོད་མི་ཞིག་ཡིན་པ་དང་གྲྭ་བ་ཡང་རེད་ལ་བླ་མ་ཡང་རེད། དེ་མ་ཟད་དགེ་བཤེས་ལྷ་རམས་པ་ཡང་རེད་ལ་བོད་མིའི་བླ་ན་མེད་པའི་མགོན་སྐྱབས་ཀྱང་རེད། ཕྱི་ལོ་ ༡༩༨༩ལོར་༸གོང་ས་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་པས་ཁོང་ནི་འཛམ་གླིང་ཞི་བདེའི་དེད་དཔོན་ཞིག་ཡིན། ༸གོང་ས་མཆོག་འཁྲུངས་ཡུལ་བོད་ཨ་མདོ་སྟག་འཚེར་རེད་ལ་ཡོངས་འཛིན་དྲུང་ནས་སློབ་སྦྱོང་གནང་ཡོད་དེ་བོད་ལ་དེ་ཙམ་མང་པོ་བཞུགས་མེད། རྒྱ་གར་དུ་བཙན་བྱོལ་ཕེབས་ནས་མཛད་པ་འཕྲིན་ལས་རྒྱས་པོ་བྱུང་ཡོད། ༸གོང་ས་མཆོག་ནི་བོད་མི་གཅིག་པུ་མིན་པར་འཛམ་གླིང་ཡོངས་ལ་ཐུགས་འཁུར་བཞེས་མཁན་ཞིག་ཡིན། འཛམ་བུ་གླིང་ལ་ཞི་བདེ་ཡོང་བར་རྒྱལ་ཁབ་ཕན་ཚུན་འཆམ་མཐུན་ངང་གནས་དགོས་པའི་བཀའ་སློབ་མང་པོ་གནང་ཡོད།    ང་ཚོའི་སློབ་གྲྭའི་ནང་༸གོང་ས་མཆོག་གི་ཐུགས་བསྐྱེད་དམ་བཅའ་བཞི་བྲིས་པའི་འཕྲེད་དར་ཞིག་རྩིག་པར་སྦྱར་ཡོད་པ་དེ་ངས་ཉིན་ལྟར་ཀློག་གི་ཡོད། ངས་ཐུགས་བསྐྱེད་དམ་བཅའ་གཉིས་པ་དེ་གྲུབ་ཐུབ་པ་ལ་འབད་བརྩོན་བྱེད་ཀྱི་ཡོད། ང་རང་བོད་པ་ཞིག་ཡིན་པའི་ཆ་ནས་བོད་པའི་སྐད་དང་ཡི་གེ། རིག་གཞུང་བདག་གཅེས་བྱ་རྒྱུ་དེ་ངས་ལས་འགན་གཙོ་བོ་ཞིག་ལ་ངོས་འཛིན་བྱེད་ཀྱི་ཡོད། ང་བོད་ཡིག་སྒྲུང་དེབ་ལ་དགའ་པོ་ཡོད་ལ་བྱམས་བརྩེ་ས་བོན་ཞེས་པའི་དེབ་དེ་དགའ་ཤོས་ཡིན།

བསྟན་འཛིན་སྨིན་གྲོལ། འཛིན་གྲྭ་ལྔ་པ།མེས་དབོན་གཙུག་ལག་དཔེ་སྟོན་སློབ་གྲྭ།    ཕྱི་ལོ་ ༢༠༢༥ ཟླ་བ་ ༤ པའི་ཚེས་ ༢༥ ཉིན་བོད་ཡིག་རྒན་ལགས་ཀྱིས་ང་ཚོར་༸གོང་ས་མཆོག་གི་སྐོར་རྩོམ་ཞིག་བྲིས་ཞེས་ངག་འཇམ་པོའི་ངང་བཤད་སྐབས། ངའི་སེམས་སུ་དེ་མ་ཐག་༸གོང་ས་མཆོག་དང་འབྲེལ་བའི་བརྗེད་དཀའ་བའི་གནས་ཚུལ་ཞིག་དྲན་བྱུང་། བྱས་ཙང་ངས་རྩོམ་གྱི་མགོ་བརྗོད་དུ་བརྗེད་དཀའ་བའི་ཉིན་མོ་ཞེས་བྲིས། ངའི་བརྗེད་དཀའ་བའི་ཉིན་མོ་ནི་༸གོང་ས་༸སྐྱབས་མགོན་ཆེན་པོ་མཆོག་ཁོང་ཞབས་པུས་ཡུན་རིང་སྙུང་སྟེ་མཐར་ཕྱི་རྒྱལ་དུ་སྨན་བཅོས་གནང་དུ་ཕེབས་པའི་ཉིན་མོ་དེ་ཡིན། ངས་གནས་ཚུལ་དེ་ཐོས་མ་ཐག་དངངས་སྐྲག་ངང་སྐད་ཤུགས་ཆེ་ཞིང་ངོ་གདོང་ན་ཡིད་མ་ཆེས་པའི་རྣམ་འགྱུར་ཞིག་གིས་ཨ་མ་ལ་བཤད། ཨ་མས་སྐད་གདངས་དམའ་པོས་སྐད་ཆ་གཞན་གང་ཡང་མ་གསུངས་པར། ང་ལ་མཆོད་གཤོམ་སྟེང་མཆོད་མེ་ཞིག་འབུལ་དུ་བཅུག།།    ངས་སེམས་ཚོར་དྲག་པོའི་ངང་མཆོད་མེ་ཆེ་བ་ཞིག་ཞལ་ཁ་ཕྱེས་ཏེ་ཁོང་བདེ་ཐང་ཡོང་བའི་སྨོན་ལམ་ཐེངས་མང་བཏབ་སྟེ་ཉལ་བ་ཡིན། སང་ཞོགས་དེར་ངས་སླར་ཡང་མཆོད་མེ་ཞིག་ཕུལ་བ་ཡིན། ཉིན་ཤས་རྗེས་ཨ་མས་ང་ལ་ཁོང་གི་གཤག་བཅོས་ལེགས་གྲུབ་བྱུང་འདུག་ཅེས་སེམས་པ་དགའ་བའི་གཏམ་བཟང་དེ་བཤད་དུས།  ངའི་ལུས་སེམས་གཉིས་ཀ་ལྷོད་པོར་གྱུར་སོང། ད་ལྟ་ཁོང་སྐུ་གཟུགས་བདེ་ཐང་ངང་འགྲུལ་བཞུད་གནང་ཐུབ་ཀྱི་ཡོད། གུས་མོ་ངས་ལག་ཟུང་ཐལ་མོ་སྦྱར་ཏེ་ཁོང་སྐུ་གཟུགས་གསལ་ཐང་ཡོང་བའི་སྨོན་ལམ་འདེབས་ཀྱི་ཡོད།

བསྟན་འཛིན་ཡིད་སྨོན། འཛིན་གྲྭ་ལྔ་པ།གུ་རུ་པུ་ར་སཾ་བྷོ་ཊ་སློབ་གྲྭ།    སྤྱིར་བཏང་འཛམ་གླིང་ནང་ལ་བླ་མ་དང་མཁས་པ་ཧ་ཅང་མང་པོ་ཡོད། བླ་མ་དང་མཁས་པ་ཚང་མས་ཕྱག་ལས་ཡག་པོ་གནང་གི་ཡོད། དམིགས་བསལ་དུ་༸གོང་ས་མཆོག་ནི་འཛམ་གླིང་ནང་དུ་སྙད་སྒྲགས་ཆེ་ཤོས་རེད། རྒྱུ་མཚན་ནི། ༸གོང་ས་མཆོག་གིས་ག་དུས་ཡིན་ནའང་སེམས་བཟང་པོ་བྱས་ཏེ་བཀའ་སློབ་གནང་བ་དང་སོ་སོའི་དགྲ་བོ་རྒྱ་མི་ལའང་སྙིང་རྗེ་བྱེད་ཀྱི་ཡོད། ༸གོང་ས་མཆོག་ནི་ཉི་མ་ནང་བཞིན་རེད། ཉི་མ་ཡིས་ཡག་སྡུག་དབྱེ་བ་མེད་པར་ཚང་མར་འོད་དང་དྲོད་སྤྲོད་སྟངས་ཤེས་ཐུབ། ༸གོང་ས་མཆོག་ནི་ཆུ་ནང་བཞིན་རེད། དེ་ཡང་ཆུ་མེད་ན་སེམས་ཅན་དང་རྩི་ཤིང་ཚང་མ་སྐོམ་ནས་ཤི་འགྲོ་བ་ནང་བཞིན། ༸གོང་ས་མཆོག་མེད་ན་ང་ཚོ་བོད་མི་ཚོ་བརླགས་ནས་མེད་པར་ཆགས་ཀྱི་རེད། ༸གོང་ས་མཆོག་ནི་འབྱུང་བཞི་འདྲ་བོ་རེད། ༸གོང་ས་མཆོག་ནི་ཕྱི་ལོ་ ༡༩༣༥ ལོ་བོད་ཨ་མདོ་སྟག་འཚེར་ལ་སྐུ་ཁྲུངས་པ་རེད། ༸གོང་ས་མཆོག་ལ་ཕྱི་ལོ་ ༡༩༨༩ ལོ་ནོར་ཝེལ་ཞི་བདེའི་གཟེངས་རྟགས་ཕུལ་བ་རེད།    ༸གོང་ས་མཆོག་གིས་དེབ་མང་པོ་ལྗགས་རྩོམ་གནང་ཡོད། དེ་དག་ནང་ནས་ཕྱག་དེབ་གསར་ཤོས་དེ་ནི་<<བོད་དང་བོད་མིའི་མགྲིན་ཚབ།>>ཅེས་པ་དེ་ཆགས་ཀྱི་ཡོད། མི་ཚང་མས་ཧ་ཅང་དགའ་པོ་བྱེད་ཀྱི་འདུག ངའི་ནང་ལ་དེབ་དེ་ཉོས་ཡོད། ད་ལོ་༸གོང་ས་མཆོག་དགུང་ལོ་ ༩༠ ལ་ཕེབས་ཀྱི་ཡོད། ཉིན་མ་རྟག་པར་ངའི་རྨོ་མོ་ཡིས་ཞལ་འདོན་སྐྱོར་བའི་སྐབས་སུ་༸གོང་ས་མཆོག་སྐུ་ཚེ་ཡུན་རིང་བརྟན་པའི་སྨོན་ལམ་འདེབས་ཀྱི་འདུག མཚམས་མཚམས་མི་ཆུ་ཤོར་བཞིན་འདུག ང་ཚོའི་ནང་དུ་༸གོང་ས་མཆོག་གི་སྐུ་པར་ཆེན་པོ་ཡོད། ཉིན་མ་རྟག་པར་སློབ་གྲྭ་མ་འགྲོའི་སྔོན་དུ་སྐུ་པར་མདུན་ལ་སྨོན་ལམ་འདེབས་ཀྱི་ཡོད། ༸གོང་ས་མཆོག་དགུང་ལོ་ ༡༣༠ བཞུགས་པར་ཤོག

ཀུན་གསལ་ལྷ་མོ། འཛིན་གྲྭ་བཞི་པ།རྡོར་གླིང་སཾ་བྷོ་ཊ་གཏན་སློབ། བདུན་པའི་ཚེས་དྲུག་གི་ཉིན་མོར།།བོད་ཡུལ་ཤར་ཕྱོགས་ཀྱི་ཨ་མདོ།།སྟག་འཚེར་ཡུལ་ལུང་དུ་འཁྲུངས་པའི།།༸གོང་ས་ཡིད་བཞིན་གྱི་ནོར་བུ།། ཁྱེད་ཀྱི་ཞལ་རས་དེ་མཛེས་པ།།ཁྱེད་ཀྱི་ཐུགས་སེམས་དེ་བཟང་བ།།སྤྱོད་པ་ཡག་པོ་དང་དྲང་པོ།།ཁྱེད་ནི་སྤྱན་རས་གཟིགས་དངོས་རེད།། ང་ཡི་མི་ཚེ་ཡི་ནང་དུ།།འཛམ་གླིང་མི་མང་གི་ཁྲོད་ན།།༸གོང་ས་ཡིད་བཞིན་གྱི་ནོར་བུ།།ཁྱེད་ལས་བཟང་བ་ཞིག་མ་མཇལ།། ཁྱེད་ཀྱིས་རྒྱ་གར་གྱི་ལུང་པར།།སློབ་གྲྭ་མང་པོ་ཞིག་བཙུགས་ནས།།བོད་ཕྲུག་ཧ་ཅང་གི་མང་པོར།།སློབ་སྦྱོང་གོ་སྐབས་དེ་གནང་བྱུང་།། དེ་བཞིན་དགོན་པ་ཡང་མང་པོ།།ས་ཕྱོགས་གང་ས་ལ་བཞེངས་ཏེ།།མི་རིགས་འདྲ་མིན་ལ་དེ་འདྲའི།།ནང་ཆོས་སྦྱོང་ས་ཞིག་གནང་སོང་།། ང་ཚོ་སྐྱབས་བཅོལ་བའི་བོད་མིར།།ཕ་མ་ལྟ་བུ་དེ་གནང་མཁན།།༸གོང་ས་ཡིད་བཞིན་གྱི་ནོར་བུ།།ཁྱེད་ལས་ལྷག་པ་གཞན་མི་འདུག། ང་ཚོ་བོད་མི་ཙམ་མིན་པར།།འཛམ་གླིང་སྐྱེ་འགྲོ་ཡོངས་གཟིགས་ནས།།ཁྱེད་ཀྱི་བྱམས་པ་དང་བརྩེ་བའི།།བཀའ་དྲིན་འཇལ་ཐབས་ཤིག་མི་འདུག། ད་ལོ་ཁྱེད་རང་གི་དགུང་གྲངས།།ཕྱི་ལུགས་དགུ་བཅུ་རུ་ཕེབས་ཀྱང་།།སྐུ་ཁམས་བདེ་མོ་རུ་བཞུགས་པས།།གུས་མོ་སྤྲོ་བ་ཡིས་ཁེངས་ཡོད།། ང་ཚོ་བོད་མི་ཡི་སྐྱབས་གནས།།ལྷ་གཅིག་གངས་ཅན་མགོན་པོ།།སྐུ་ཚེ་བསྐལ་བརྒྱ་བར་བཞུགས་པའི།།གསོལ་བ་སྙིང་ཁོངས་ནས་འདེབས་སོ།།