སྤྱིར་སྙན་གྲགས་ཆེ་བའི་ཕྱི་རྒྱལ་གྱི་རྩོམ་པ་པོ་མི་འདྲ་བ་མང་པོ་ཞིག་གིས། རང་ཉིད་དགེ་རྒན་གྱི་ཉམས་མྱོང་དང་། སློབ་མར་དཔྱད་ཞིབ་ཀྱི་སྒོ་ནས་བསྔགས་བརྗོད་དང་། མཐོང་ཆེན་ཡོད་པའི་སློབ་ཁྲིད་ཐབས་ལམ་སྐོར་དཔེ་དེབ་མང་པོ་ཞིག་འདོན་སྤེལ་གནང་ཡོད་པ་ལྟར། ཤེས་ཡོན་དང་འབྲེལ་བའི་ལས་ཀྱི་སྣེ་མོ་བ་མང་པོས་དགེ་རྒན་ཚོ་ལ་དེ་དག་བཀླག་དགོས་པའི་ལམ་སྟོན་ཡང་མི་ཉུང་བ་ཞིག་ཕེབས་ཡོད། ངས་ཀྱང་མཁས་པ་ཁོང་རྣམ་པས་བྲིས་པའི་ཕྱག་དེབ་རེ་ཟུང་ཞིག་སློབ་གྲྭའི་དཔེ་མཛོད་དང་དགེ་རྒན་དཔེ་དེབ་ཁང་ནས་གཡར་ཏེ་ཀློག་མྱོང་ཡོད། དེ་བཞིན་དྲྭ་རྒྱ་དང་དགེ་རྒན་ཟབ་སྦྱོང་སྐབས་སློབ་ཁྲིད་ཐབས་ལམ་སྐོར་ལ་ཡང་ཉན་མྱོང་ཡོད། སློབ་ཁྲིད་ཐབས་ལམ་སྐོར་དཔེ་དེབ་དེ་འདྲ་མང་པོ་ཡོད་བཞིན་དུ་ང་དགེ་རྒན་དཀྱུས་མ་ཞིག་གིས་སློབ་ཁྲིད་ཐབས་ལམ་སྐོར་བཤད་ན། ཉིན་མོའི་གུང་ལ་སྒྲོན་མེ་སྤར་བའི་ཚོར་སྣང་ཞིག་སྐྱེས་ཀྱི་འདུག